Read Xitsonga Numbers 25 Bible Online

Numbers 25 - Xitsonga bible

Numbers 25

¹Israele a a tshamile Xitimi, kutani tiko ri sungula ku tinyiketa vuoswi ni vanhwanyana va Mowabu.

²Va vitana tiko emagandzelweni ya swikwembu swa vona, kutani tiko ri dya, ri khinsama emahlweni ka swikwembu swa vona.

³Israele a namarhela Baala-Peyori, kutani vukari bya Yehovha byi pfurhela Israele.

⁴Kavaloko Yehovha a ku eka Muxe: “Vitana tihosi hinkwato ta tiko, u hayeka swidyohi emahlweni ka Yehovha emun'wini, kutani ku pfurha ka vukari bya Yehovha ku ta sukela Israele.”

⁵Muxe a ku eka vaavanyisi va Israele: “Dlayani vanhu hinkwavo lava namarheleke Baala-Peyori.”

⁶Kavaloko munhu wa vana Vaisraele a ta a tisa eka vamakwavo wansati wa Midiyani, Muxe, ni nhlengeletano hinkwayo ya vana va Israele va n'wi vona, loko va ri karhi va rila enyangweni ya tabernakela ya nhlengeletano.

⁷Kuteloko Finiyasi, n'wana Eliyazara, n'wana Aroni, muprista, a vona sweswo, a suka enhlengeletanweni, a teke tlhari evokweni ra yena,

⁸a landza munhu wa Israele entsongeni wa yena, kutani a va tlhava havambirhi makhwiri, yena Muisraele, na yena wansati loyi. Kutani ntungu wu hlela exikarhi ka vana va Israele.

⁹Lava nga fa hi ntungu lowu a va ri vanhu va 24 000.

¹⁰Kutani Yehovha a byela Muxe, a ku:

¹¹“Finiyasi, n'wana Eliyazara, n'wana Aroni, muprista, u susile vukari bya mina ehenhla ka vana va Israele, hikuva a a ri ni rilondzo ra mina exikarhi ka vona; kutani a ndzi lovisanga vana va Israele evukarini bya mina.

¹²Hikwalaho u ta n'wi byela leswaku ndzi endla na yena ntwanano wa ku rhula,

¹³wu ta va eka yena ni ka vatukulu va yena ntwanano wa vuprista lowu nga heriki, hikuva u hisekele Xikwembu xa yena, kutani u endlele vana va Israele mhamba.”

¹⁴Vito ra wanuna wa Israele la dlayiweke ni wansati wa Midiyani, a a ri Zimri, n'wana Salu, hosi ya nyimba ya va Simiyoni.

¹⁵Vito ra wansati wa Midiyani la dlayiweke, a a ri Kozibi, n'wana Suru, la nga hosi ya nyimba yin'wana ya va Midiyani.

¹⁶Yehovha a byela Muxe, a ku:

¹⁷“Hlayani Vamidiyani kukotisa valala va n'wina, mi va dlaya;

¹⁸hikuva va mi endlile valala va vona hi ku mi rivata hi mano ya vona emhakeni ya Peyori, ni le mhakeni ya Kozibi n'wana hosi yin'wana ya Midiyani, a ri makwavo wa vona, la nga dlawa siku ra khombo leri nga humelela emhakeni ya Peyori.”