Read Xitsonga Numbers 5 Bible Online

Numbers 5 - Xitsonga bible

Numbers 5

¹Yehovha a byela Muxe, a ku:

²“Lerisa vana va Israele leswaku va humesa emixaxeni un'wana ni un'wana wa nhlokonho, ni wa ndzundzwana, hambi la nyamisiweke hi mufi.

³Mi ta va humesa, hambi va ri vavanuna, hambi vavasati; mi va humesa emixaxeni, va nga tshuki va nyamisa mixaxa ya vona leyi ndzi tshamaka exikarhi ka yona.”

⁴Kavaloko vana va Israele va endlisa sweswo, va va humesa emixaxeni, hilaha Yehovha a leriseke Muxe hakona; vana va Israele va endlisa sweswo.

⁵Yehovha a byela Muxe, a ku:

⁶“Byela vana va Israele, u ku: ‘Loko munhu a dyohele warikwavo, hambi a ri wanuna, hambi a ri wansati, u dyohele na yena Yehovha; ni loko munhu loyi a ri ni nandzu wa xilo xihi ni xihi,

⁷u ta tivula nandzu wa yena kutani u ta tlherisela swilo hinkwaswo leswi a swi kumeke, ku nga ri hi ku lulama, a swi engetela hi ku avanyisa ka vuntlhanu, a nyika loyi a n'wi dyeleteke.

⁸Kutakuloko munhu loyi a nga ri na mudyandzhaka la tivaka ku amukela swilo leswi dyeletiweke, swi ta nyikiwa Yehovha, eka muprista, swin'we ni khuna ra ku riha, leri va nga ta phahlela lowa nandzu mhamba ha rona.

⁹Hinkwaswo leswi pamburiweke eka swilo leswi hlawuriweke, leswi vana va Israele va swi tisaka eka muprista, swi ta va swa yena.

¹⁰Swilo leswi hlawuriweke swa un'wana ni un'wana swi ta va swa yena; leswi nyikiweke muprista, swi ta va swa yena.’ ”

¹¹Yehovha a byela Muxe, a ku:

¹²“Byela vana va Israele, u ku eka vona: ‘Kungakuloko wansati a hunguka, u dyohele nuna wa yena;

¹³loko wanuna un'wana o etlela na yena, nuna wa yena a nga swi tivi; hambiloko a dyohile exihundleni, timbhoni ti nga ri kona ku vula swa yena, ni loko a nga khomiwangi eku dyoheni ka yena;

¹⁴loko moya wa rilondzo wu nghena eka nuna wa yena, kutani a va ni rilondzo eka nsati wa yena la endleke xivi, ni loko moya wa rilondzo wu nghene eka yena, kutani a londza nsati wa yena; hambiloko nsati wa yena a nga endlanga xivi,

¹⁵nuna loyi u ta yisa nsati wa yena emahlweni ka muprista, a tisa nyiko hikwalaho ka wansati, ku nga ku pambula ka vukhume bya efa ya mapa ya barley; ntsena a nga ka a nga cheli mafurha eka wona, hambi yi ri mirhi ya risuna, hikuva i nyiko ya rilondzo, i nyiko ya xitsundzuxo leyi tsundzuxaka xidyoho.

¹⁶Muprista u ta n'wi tshineta, kutani u ta yima emahlweni ka Yehovha.

¹⁷Muprista u ta teka mati lama hlawuriweke embiteni ya vumba, a teka ni ntshuri lowu nga ehansi endzeni ka yindlu, kutani a wu chela ematini.

¹⁸Muprista u ta yimisa wansati emahlweni ka Yehovha, kutani u ta funungula nhloko ya wansati, kutani a veka eswandleni swa yena nyiko ya xitsundzuxo, leyi nga nyiko ya rilondzo, kutani muprista u ta tamela evokweni ra yena mati yo dzunga lama nga ni ndzhukano.

¹⁹Kutani muprista u ta hlambanyisa wansati, a ku eka yena: “Kungakuloko wanuna ni un'we a nga sivamanga na wena, ni loko u nga hungukanga ku endla xivi, leswi u nga ehansi ka nuna wa wena, u nga tshuki u twa ku vaviseka hi mati lawa yo dzunga ya ndzhukano.

²⁰Kambe leswi u nga ni nuna wa wena, kutani u hambukele ku endla xivi ni nuna un'wana, a nga riki wa wena a oswana na wena,”

²¹muprista u ta hlambanyisa wansati hi ku hlambanya lokukulu, a ku eka yena: “Yehovha a a ku nyikete endzhukanweni ni ku yirisiwa etikweni ra wena, a ondzisa matsheve ya wena ni ku kukumukisa khwiri ra wena,

²²ni mati lawa ya ndzhukano a ma nghene emarhumbyini ya wena, a kukumukisa khwiri ra wena, ni ku ondzisa matsheve ya wena”; wansati u ta ku: “Kunene, kunene.”

²³Muprista u ta tsala ku hlambanya loku epapilweni, kutani u ta ku hlangula ematini yo dzunga;

²⁴kutani u ta nwisa wansati mati yo dzunga ya ndzhukano, kutani mati ya ndzhukano ma ta nghena endzeni ka yena, ma n'wi luma;

²⁵kutani muprista u ta teka emavokweni ya wansati nyiko ya rilondzo, a ndziwita nyiko emahlweni ka Yehovha, kutani u ta yi tshineta ealitarini;

²⁶muprista u ta nusa xandla xa nyiko leyi ya xitsundzuxo a swi hisa ealitarini, a ta nwisa wansati mati.

²⁷Kutakuloko a n'wi nwisile mati lawa, ku ta humelela leswaku loko a tinyamisile, ni loko a dyohele nuna wa yena hi ku endla vuoswi, mati ya ndzhukano ma ta nghena eka yena ku n'wi luma; khwiri ra yena ri ta kukumuka, matsheve ya yena ma ta ondza, kutani nsati loyi, u ta va ndzhukano etikweni ra yena.

²⁸“ ‘Kambe, kungakuloko nsati loyi a nga tinyamisanga, ni loko a tengile, a nga ka a nga twi ku vaviseka ha nchumu, a ta engeta a veleka.

²⁹“ ‘Hi wona nawu wa rilondzo; hileswaku loko wansati la nga ni nuna a hambukele ku endla vuoswi,

³⁰hambiloko moya wa rilondzo wu nghenile eka nuna un'wana, kutani a londza nsati wa yena, u ta yimisa nsati wa yena emahlweni ka Yehovha, kutani muprista u ta n'wi ringa hi nawu lowu hinkwawo.

³¹Wanuna u ta pfumala nandzu, kambe wansati u ta rhwala nandzu wa yena.’ ”