Read Xitsonga Numbers 6 Bible Online

Numbers 6 - Xitsonga bible

Numbers 6

¹Yehovha a byela Muxe, a ku:

²“Byela vana va Israele, u ku eka vona: ‘Kungakuloko munhu, hambi a ri wanuna, hambi wansati, a tihlawulele hi ku tinyiketa Yehovha hi ku hlambanya, ku tiendla Munaziri,

³u ta titsona vhinyo ni byalwa; a nga ka a nga n'wi vhiniga ya byalwa; a nga ka a nga n'wi leswi humaka emihandzwini ya vhinya, a nga ka a nga dyi mihandzu ya vhinya hambi yi ri yimbisi, hambiloko yi omile.

⁴Hi masiku hinkwawo ya vunaziri bya yena, a nga ka a nga dyi leswi humaka evhinyeni, ku sungula hi timbewu ku yisa eka makamba.

⁵Hi masiku hinkwawo ya vunaziri bya yena, rikari ri nga tshuki ri khumba nhloko ya yena ku ko ku fika ku hela ka masiku lawa a tihlawuleleke ha wona ku tirhela Yehovha, u ta va la hlawuriweke, u ta tshika misisi ya yena yi tikulela ntsena.

⁶Hi masiku hinkwawo lawa a tihlawuleleke ha wona ku tirhela Yehovha, a nga tshuki a tshinelela mufi;

⁷hambi a ri tata wa yena, hambi mana wa yena, hambi makwavo, a nga tshuki a tinyamisela vona loko va file, hikuva ku hlawula ka Xikwembu xa yena ku le nhlokweni ya yena.

⁸Hi masiku hinkwawo ya vunaziri bya yena u hlawuleriwe Yehovha.

⁹Kungakuloko munhu a fa kan'wekan'we ekusuhi na yena, kutani a nyamisa nhloko ya yena leyi hlawuriweke, u ta byewula misisi hi siku ra ku tibasisa ka yena; u ta byewula hi siku ra 7.

¹⁰Hi siku ra 8, u ta tisa eka muprista matuva mambirhi, hambi ma ri mavondlo mambirhi ya magugurhwana, enyangweni ya tabernakela ya nhlengeletano.

¹¹Muprista u ta humesa yin'wana yi va mhamba ya nandzu, yin'wana yi va holokosta; u ta tiendlela sweswo mhamba hikuva u tinyamisile hi mufi; hi siku rolero u ta kwetsimisa nhloko ya yena.

¹²U ta hlawulela Yehovha masiku ya Vunaziri bya yena, kutani u ta humesa xinyimpfana xa lembe rin'we yi va mhamba ya ku riha; masiku lama hundzeke ma nga ka ma nga hlayiwi, hikuva Vunaziri bya yena byi nyamisiwile.

¹³“ ‘Hi wona nawu wa Munaziri. Siku a nga ta heta nkarhi wa Vunaziri bya yena, va ta n'wi yisa enyangweni ya tabernakela ya nhlengeletano,

¹⁴kutani u ta humesela Yehovha nyiko ya yena, xi va xinyimpfana xa lembe rin'we, lexi nga riki na xivati, xi va xa holokosta, ni nyimpfu ya lembe leyi nga riki na xivati, yi va ya gandzelo ra xidyoho ni khuna leri nga riki na xivati, ri va ra gandzelo ra ku khensa.

¹⁵U ta tisa ni xirhundzu xa swinkwa leswi nga riki na comela, swi ri swimbundzu swa mapa layo saseka lama pfuviweke hi mafurha, ni swinkwa leswo kala comela, leswi totiweke hi mafurha: ehenhla ka swona, u ta tisa nhlengo ni swakunwa.

¹⁶Muprista u ta swi humesa emahlweni ka Yehovha, kutani u ta humesa mhamba ya yena ya nandzu, ni holokosta ya yena.

¹⁷U ta humesa khuna ra gandzelo ra ku khensa Yehovha, ni xirhundzu xa swinkwa leswo kala comela, kutani u ta humesa nhlengo wa yena ni swakunwa.

¹⁸Munaziri u ta byewula nhloko ya yena leyi hlawuriweke enyangweni ya tabernakela ya nhlengeletano; u ta teka misisi ya nhloko ya yena leyi hlawuriweke, a yi hisa endzilweni lowu nga ehansi ka gandzelo ra ku khensa.

¹⁹Muprista u ta teka voko ra khuna loko ri swekiwile, ni ximbundzu lexo kala comela exirhundzwini, ni xinkwa lexo kala comela, u ta swi veka emavokweni ya Munaziri loko a byewurile nhloko ya yena leyi hlawuriweke.

²⁰Muprista u ta swi ndziwita emahlweni ka Yehovha; i xilo lexi hlawuriweke ngopfu, leswi nga swa muprista, ni xifuva lexi hlawuriweke, ni nenge lowu pamburiweke. Kutani Munaziri u ta tiva ku nwa vhinyo.

²¹“ ‘Hi wona nawu wa Munaziri la tiboheke hi ku hlambanya: hi wona nhlengo wa yena eka Yehovha hikwalaho ka vunaziri bya yena, swi ri handle ka leswi a swi kotaka ku swi humesa. U ta endlisa sweswo hi laha a tiboheke hi ku hlambanya; u ta endla hi nawu wa Vunaziri bya yena.’ ”

²²Yehovha a byela Muxe, a ku:

²³“Byela Aroni ni vana va yena, u ku: ‘Mi ta katekisa sweswo vana va Israele, mi ku eka vona:

²⁴“ ‘Yehovha a a ku katekise, a a ku hlayise.

²⁵Yehovha a a ku hatimisele mombo wa yena, a a ku endlele hi tintswalo!

²⁶Yehovha a a ku hundzukele mombo wa yena, a a ku nyike ku rhula!

²⁷“ ‘Va ta vekela sweswo vito ra mina ehenhla ka vana va Israele, kutani mina ndzi ta va katekisa.’ ”