Read Xitsonga Numbers 8 Bible Online

Numbers 8 - Xitsonga bible

Numbers 8

¹Yehovha a byela Muxe, a ku:

²“Byela Aroni, u ku eka yena: ‘Kutakuloko u tlhoma mavoningo, mavoningo ya 7, ma ta voningela emahlweni ka kandelari.’ ”

³Kutani Aroni a endlisa sweswo, a tlhoma mavoningo ehenhla ka kandelari, emahlweni hilaha Yehovha a leriseke Muxe hakona.

⁴Kandelari a yi ri ya nsuku lowu furiweke. Ku suka ensinyeni wa yona ku fika eswiluveni swa yona, a yi ri ya nsuku lowu furiweke va endle kandelari hilaha Yehovha a kombiseke Muxe hakona.

⁵Yehovha a byela Muxe, a ku:

⁶“Teka Valevhi exikarhi ka vana va Israele, u va basisa.

⁷Lexi u nga ta va endlela xona ku va basisa, hi lexi: U ta va xuva hi mati lama hlantswaka swivi, kutani va ta fambisa rikari emirini hinkwawo wa vona; va hlantswa tinguvu ta vona, kutani va ta tibasisa.

⁸Va ta teka nkunzi ni nhlengo wa yona, lama nga mapa layo saseka, lama pfuviweke hi mafurha, kutani u ta teka nkunzi ya gandzelo ra xidyoho.

⁹U ta tshineta Valevhi emahlweni ka tabernakela ya nhlengeletano, kutani u ta vitana nhlengeletano hinkwayo ya vana va Israele.

¹⁰Kavaloko u ta tshineta Valevhi emahlweni ka Yehovha; vana va Israele va ta tlhandleka mavoko ya vona ehenhla ka Valevhi;

¹¹kutani Aroni u ta humesa Valevhi hi vito ra vana va Israele, wu va nhlengo lowu ndziwitiweke emahlweni ka Yehovha, wu huma eka vana va Israele; kutani va ta tirha ntirho wa Yehovha.

¹²Valevhi va ta tlhandleka mavoko ya vona etinhlokweni ta tinkunzi kutani u ta endla hi yin'wana gandzelo ra xidyoho, hi yin'wana u endla holokosta eka Yehovha, leswaku Valevhi va ta phahleriwa mhamba.

¹³U ta yimisa Valevhi emahlweni ka Aroni ni le mahlweni ka vana va yena, kutani u ta va humesa, wu va nhlengo lowu ndziwitiweke wa Yehovha.

¹⁴U ta hlawurisa sweswo Valevhi exikarhi ka vana va Israele, kutani Valevhi va ta va va mina.

¹⁵“Endzhaku ka swona va ta tiva ku tirha ntirho wa tabernakela ya nhlengeletano. U ta va basisa, kutani u va humesa wu va nhlengo lowu ndziwitiweke;

¹⁶hikuva ndzi nyikiwile vona kunene exikarhi ka vana va Israele; ndzi titekele vona ematshan'weni ya mativula hinkwawo ya vana va Israele.

¹⁷Hikuva mativula hinkwawo ya vana va Israele, i ya mina hambi a ri munhu, hambi xi ri xifuwo; siku ndzi beke mativula hinkwawo etikweni ra Egipta, ndzi tihlawulele vona.

¹⁸Ndzi tekile Valevhi ematshan'weni ya mativula hinkwawo ya vana va Israele,

¹⁹kutani ndzi nyikile kunene Valevhi eka Aroni ni ka vana va yena, exikarhi ka vana va Israele, ku tirha ntirho wa vana va Israele etabernakeleni ya nhlengeletano, ni ku phahlela vana va Israele timhamba, leswaku khombo ri nga tshuki ri humelela exikarhi ka vana va Israele, loko vana va Israele va ta tshinelela vukwetsimelo.”

²⁰Muxe na Aroni ni nhlengeletano hinkwayo ya vana va Israele va endlela vana va Levhi sweswo; va va endlela hinkwaswo hilaha Yehovha a leriseke Muxe hakona.

²¹Valevhi va tibasisa, va hlantswa tinguvu ta vona; Aroni a va humesa, wu va nhlengo lowu ndziwitiweke emahlweni ka Yehovha, kutani a va phahlela mhamba ku va basisa.

²²Kavaloko Valevhi va ta, va tirha ntirho wa vona etabernakeleni ya nhlengeletano, emahlweni ka Aroni ni le mahlweni ka vana va yena, hilaha Yehovha a leriseke Muxe hakona ehenhla ka vana va Levhi; va va endlela sweswo.

²³Yehovha a byela Muxe, a ku:

²⁴“Milawu ya Valevhi hi leyi: Mulevhi wa malembe ya 25, ni la tlulaka, u ta nghena enxaxeni wa ntirho wa tabernakela ya nhlengeletano.

²⁵Wa malembe ya 50 u ta huma enxaxeni wa ntirho, a nga ha tirhi.

²⁶U ta pfuna vamakwavo etabernakeleni ya nhlengeletano ku hlayisa leswi fanelaka ku hlayisiwa, kambe a nga ha khomi ntirho lowo tika. U ta endlela Valevhi sweswo eswilweni leswi va swi vekeriweke.”