Read Xitsonga Numbers 9 Bible Online

Numbers 9 - Xitsonga bible

Numbers 9

¹Yehovha a byela Muxe emananga ya Sinayi, hi lembe ra vumbirhi ra ku huma ka vona eEgipta, hi n'hweti yo rhanga, a ku:

²“Vana va Israele a va endle Paseka enkarhini wa yona.

³Mi ta yi endla hi nkarhi lowu vekiweke hi siku ra 14 ra n'hweti leyi, nimadyambu, mi ta yi endla hi milawu hinkwayo ni ku lerisa hinkwako ka yona.”

⁴Muxe a byela vana va Israele ku endla Paseka.

⁵Kutani va endla Paseka hi n'hweti yo rhanga, hi siku ra 14 ra n'hweti, nimadyambu, emananga ya Sinayi; vana va Israele va endlisa sweswo hilaha Yehovha a leriseke hinkwaswo eka Muxe.

⁶Kambe vanhu van'wana a va yirisiwile hi mufi, kutani va tsandzeka ku lunghisa Paseka hi siku rolero; va ta emahlweni ka Muxe na Aroni hi siku lero,

⁷va ku eka yena: “Hi yirisiwile hi mufi; kambe xana hi ta siveriwa ku humesa nhlengo wa Yehovha hi nkarhi lowu vekiweke exikarhi ka vana va Israele, xana?”

⁸Muxe a ku eka vona: “Tshamani la, ndzi ta yingisa leswi Yehovha a nga ta swi lerisa ehenhla ka n'wina.”

⁹Kutani Yehovha a byela Muxe, a ku:

¹⁰“Byela vana va Israele, u ku: ‘Kungakuloko munhu exikarhi ka n'wina a yirisiwile hi mufi, hambiloko a endzile ekule, hambi a ri un'wana wa ka n'wina, hambi wa vatukulu va n'wina, u ta endla Paseka ya Yehovha.

¹¹Va ta yi endla hi n'hweti ya vumbirhi, hi siku ra 14, nimadyambu; va ta yi dya ni xinkwa lexo kala comela, ni matsavu layo bava.

¹²Va nga tshuki va siyela nchumu nimixo, va nga tshuki va faya ni rhambu rin'we va ta yi endla hi milawu hinkwayo ya Paseka.

¹³“ ‘Kambe la tengeke, ni la nga endzangiki, kutakuloko a titsona ku dya Paseka, munhu loyi u ta hungutiwa etikweni ra yena, hikuva a nga humeselanga Yehovha nhlengo hi nkarhi wa wona; munhu loyi, u ta rhwala nandzu wa yena.

¹⁴Kungakuloko muluveri u akile na n'wina, kutani a endla Paseka ya Yehovha, u ta yi endla hi nawu wa Paseka, hi ku lerisa ka wona. Nawu wu ta va wun'we eka n'wina hileswaku eka muluveri ni ka la tsariweke etikweni.’ ”

¹⁵Siku va yimiseke Yindlu, papa ri ungamela Yindlu, yi nga tabernakela ya vumbhoni; nimadyambu kambe ku va ni leswi fanaka ni ndzilo ehenhla ka Yindlu ku fika nimixo.

¹⁶A swi ri tano hi masiku hinkwawo; papa a ri tshama ri ungamela Yindlu, nivusiku kambe, a ri fana ni ndzilo.

¹⁷Loko papa ri suka ehenhla ka tabernakela, vana va Israele a va suka, kutani laha papa ri nga yima kona, vana va Israele a va dzima mixaxa kona.

¹⁸A va tshama kona hi masiku hinkwawo lawa papa ri nga yima ehenhla ka Yindlu.

¹⁹Ni loko papa ri hlwela, ehenhla ka Yindlu masiku layo tala, vana va Israele a va yingisa ku lerisa ka Yehovha, a va nga suki.

²⁰Kambe loko papa ri yima masikwanyana ntsena ehenhla ka Yindlu, a va dzima mitsonga hi rito ra Yehovha; kutani hi rito ra Yehovha a va suka.

²¹Ni loko papa ri yima ku suka nimadyambu ku fika nimixo, kutani nimixo ri suka, a va suka. Hambi ri suka ninhlekanhi, hambi vusiku, a va suka na vona.

²²Hambi papa ri yima ehenhla ka Yindlu masiku mambirhi, kumbe n'hweti, kumbe nkarhi lowo leha ku tlurisa, vana va Israele va tshama emixaxeni, a va nga suki; kutani loko ri suka, a va suka.

²³Hi rito ra Yehovha, a va dzima mitsonga, kambe hi rito ra Yehovha, a va suka; a va hlayisa ku lerisa ka Yehovha hilaha Yehovha a leriseke Muxe hakona.