Read Xitsonga Micah 1 Bible Online

Micah 1 - Xitsonga bible

Micah 1

¹Rito ra Yehovha leri byeriweke Mikiya wa Morexeta, enkarhini wa Yotamu, ni wa Akazi ni wa Hezekiya tihosi ta Yuda, byi ri vuprofeta ehenhla ka Samariya na Yerusalema.

²N'wina vamatiko hinkwawo, yingisani! Rhiya ndleve, wee misava, ni hinkwaswo leswi nga eka wena! Hosi Yehovha a ve yena mbhoni ya n'wina yi ri Hosi leyi nga endlwini ya yona leyo kwetsima!

³Hikuva, vonani, Yehovha u ta huma endlwini ya yena, u ta rhelela, a famba eswivandleni leswi tlakukeke swa misava.

⁴Tintshava ti ta n'oka ehansi ka yena, ni mikova yi ta handzuka, kukotisa swihlenga swa tinyoxi loko swi ri kusuhi ni ndzilo, ni mati loko ma halatiwa laha ku rhelelaka.

⁵Leswi hinkwaswo swi ta endlakala hikwalaho ka ku tlhela ka Yakobo ni hikwalaho ka ku dyoha ka yindlu ya Israele.

⁶Ku dyoha ka Yakobo i yini? Xana a hi Samariya? Ni swivandla leswi tlakukeke swa Yuda hi swihi? Xana a hi Yerusalema? Hikwalaho ndzi ta hundzula muti wa Samariya, wu kotisa nhulu wa maribye ensin'wini, laha ku nga rimiwa kona tivhinya; kutani ndzi cukumeta maribye ya kona enkoveni ndzi funungula masungulo ya wona.

⁷Swifaniso hinkwaswo swa yena leswi vatliweke swi ta fayeteriwa, ni tinyiko leti nga amukeriwa hi yena ti ta hisiwa, ndzi va ndzi onha swifaniso swa yena hinkwaswo; hikuva u tilavele swona hi hakelo ya vumbhisa, swi ta tlhela swi hundzuka hakelo ya mbhisa.

⁸Hikwalaho, ndzi ta rila, ndzi kolola; ndzi ta famba ndzi nga ambalanga; ndzi rila kukotisa mhungubye, ndzi rila kukotisa yimbhu.

⁹Hikuva timbanga ta Samariya ti bihile khombo ra yena ri humelele ni ka Yuda; ri fikile enyangweni ya tiko ra mina, eka Yerusalema.

¹⁰Mhaka leyi mi nga tshuki mi yi twarisa eGati; ni ku rila, mi nga tshuki mi rila! EBeta-Leyafara (yindlu ya ntshuri) ndzi tichela hi ntshuri!

¹¹Suka, wena la akeke eXafiri (ku saseka), a ku ambalanga, u ni tingana. Muaki wa Saanana (ku huma) a nga humi; Swirilo swa Beta-Esele (yindlu ye kusuhi) swi mi pfumata ku tshemba.

¹²Muaki wa Maroti (ku bava) u vabya hi ku rilela tintswalo, hikuva khombo ri humile eka Yehovha ri fikile enyangweni ya Yerusalema.

¹³Wena la akeke eLakixi, bohela tihanci leta matimba egolonyini; hi wona masungulo ya xidyoho xa n'wana Siyoni, hikuva ku dyoha ka Israele ku humelele eka wena.

¹⁴Hikwalaho, wena Siyoni, u ta hambana na Morexeta-Gati; tindlu ta Akizibi wu ta va nambu lowu phyeke eka tihosi ta Israele.

¹⁵Ndzi ta tlhela ndzi tisa eka wena la dyaka ndzhaka ya mina, wena, muaki wa Marexa (ndzhaka) lava nga ku kwetsima ka Israele va ta balekela eAdulama (ku kwetsima ka tiko).

¹⁶Tsemela misisi ya wena, u byewula nhloko hikwalaho ka vana va wena lava rhandzekaka! Anamisa mpandhla wa wena wu kula, hikuva va yisiwa evukhumbini, ekule na wena.