Read Xitsonga Micah 5 Bible Online

Micah 5 - Xitsonga bible

Micah 5

¹Sweswi, tilunghise, Siyoni wa mavandla! Hi ta rhendzeriwa hi valala; va n'wi ba hi xigombo erhameni, yena muavanyisi wa Israele!

²Loko u ri wena Betlehema-Efrata, u lontsongo ku hlayiwa exikarhi ka tinxaka ta Yuda, eka wena ku ta huma loyi a nga ta va hosi ya Israele, a nga loyi a nga kona ka ha ri eku sunguleni, emikarhini leyi nga riki na ku sungula.

³Hikwalaho u ta va nyiketa valala, ku ko ku fika nkarhi lowu muveleki a nga ta veleka ha wona, vamakwavo lava seleke va ta tlhela hinkwavo eka vana va Israele.

⁴U ta yima, a risa hi matimba ya Yehovha, ni ku kwetsima ka vito ra Yehovha, Xikwembu xa yena; va ta aka hi ku rhula, hikuva u ta va nkulukumba ku yisa emakun'wini ya misava.

⁵U ta vuyisa ku rhula. Kutakuloko Muaxuru a nghena etikweni ra hina a khandziya etindlwini ta hina ta vuhosi, hi ta va ni valanguteri va 7, hambi ti ri tihosi ta vanhu ta 8 ku n'wi sivela.

⁶Va ta risa tiko ra Asiriya hi fumu, va langutela ni le tinyangweni ta tiko ra Nimrodo; yena u ta hi lamulela eka Asiriya, siku a nghenaka etikweni ra hina, ni loko a tlula mindzilekana ya hina.

⁷Lava seleke va ka Yakobo va ta va exikarhi ka matiko lamanyingi kukotisa mberha leyi humaka eka Yehovha, ni mathonsi lama nga ehenhla ka byanyi; lama nga languteleki ku lerisa ka munhu, hambi ku ri ku fumiwa hi vana va vanhu.

⁸Kambe lava seleke va Yakobo va ta va exikarhi ka matiko ni tinxaka leto tala kukotisa nghala exikarhi ka swiharhi swa nhova, ni xinghalana exikarhi ka ntlhambi wa tinyimpfu; yi nga loko yi hundza yi kandziyela, yi handzula, ku nga ri na loyi a ponisaka!

⁹Voko ra wena a ri tlakukele lava ku xanisaka, valala va wena a va herisiwe hinkwavo!

¹⁰Hi siku lero, ku vula Yehovha, ndzi ta lovisa tihanci ta wena, ndzi herisa ni tigolonyi ta wena;

¹¹ndzi ta lovisa miti ya tiko ra wena, ndzi nhlanhla makhokholo ya wena hinkwawo.

¹²Kutani ndzi ta susa ku kanganyisa evokweni ra wena, ni vangoma a va nga ha vi kona eka wena.

¹³Loko swi ri swifaniso swa wena leswi vatliweke ni leswi chuluriweke, ndzi ta swi herisa exikarhi ka wena, a ku nga ha khinsameri mitirho ya mavoko ya wena.

¹⁴Kutani ndzi ta tsuvula swifaniso swa Axera leswi nga eka wena, ndzi herisa miti ya wena;

¹⁵ndzi ta tirihisela hi vurhenha ni ku kariha ehenhla ka matiko lama nga yingisangiki.