Read Xitsonga Habakkuk 2 Bible Online

Habakkuk 2 - Xitsonga bible

Habakkuk 2

¹Ndzi ta yima exitshan'weni xa mina xa vulanguteri, ndzi ta khandziya exihlungweni xa mulanguteri, ndzi langutisa ku vona lexi Yehovha a nga ta xi vulavula eka mina, ni lexi ndzi nga hlamulaka eswirilweni leswo swa mina.

²Kwalaho Yehovha a ndzi hlamula, a ku: “Tsala hlavutelo, yi vatle emahantini, leswaku la yi hlayaka a yi hlaya hi ku tsutsuma;

³hikuva hlavutelo leyo ya ha tshamele nkarhi wa kona, kambe yi ta hatlisa eku heteleleni, yi nga ka yi nga xisi. Hambi yi nga hlwela, u yi langutela, hikuva yi ta endlakala swinene, yi nga ka vi nga hlweri.

⁴“Vona, moya wa yena wu kukumukile, a wu lulamanga eka yena; kambe la lulameke u ta hanya hi ku pfumela ka yena.

⁵Kambe, vhinyo ya xisa; la tikukumuxaka a nga ka a nga rhuli. U ahlamisa moya wa yena ku fana ni sirha; a fana ni rifu, la nga riki na ku xurha, la tihlengeletelaka matiko hinkwawo, a ya tihlengeletela tinxaka hinkwato.”

⁶Matiko walawo hinkwawo xana ma nga ka ma nga endli xifaniso ehenhla ka yena, ni risimu ra xisandzu, ni mawetana xana? Kutani va ta ku: “U ni khombo la tihlengeletelaka leswi nga riki swa yena, u ta tshama a endlisa sweswo ku ri kangani? ... la tirhwexaka milandzu!”

⁷Xana va nga ka va nga yimi kan'we lava taka ku ta ku luma? Xana va nga ka va nga pfuki lava taka ku ta ku hlongola, u va mbhari ya vona xana?

⁸Hikuva u onhile matiko lamanyingi, misalo hinkwayo ya matiko yi ta ku onhela, hikwalaho ka ngati ya vanhu, ni hikwalaho ka ku pfukela tiko matimba, ni muti, ni hinkwavo lava akeke eka wona.

⁹U ni khombo la fuwelaka yindlu ya yena rifuwo lero biha, la vekaka vuako bya yena ehenhla, leswaku a tisirheleta khombo!

¹⁰U kanelele yindlu ya wena tingana hi ku kanela ku lovisa matiko layo tala, u onhile moya wa wena.

¹¹Hikuva ribye ri huwelela ri ri ekhumbini kutani yona mhandze yi ri hlamula yi ri vufulelweni!

¹²U ni khombo la akaka muti hi ngati, la yimisaka muti wa matimba hi ku kanganyisa!

¹³Vonani, xana a hi mhaka leyi pfaka eka Yehovha wa tinyimpi loko matiko ma tikarhatela lexi nga ta hisiwa hi ndzilo, kutani tinxaka ti humesela matimba ya tona swahava?

¹⁴Hikuva misava yi ta tala hi ku tiva ka ku kwetsima ka Yehovha, ku fana ni mati loko ma funengeta lwandle.

¹⁵U ni khombo la nwisaka warikwavo, na wena, la pfanganiselaka van'wana swakunwa swa ku kariha swa wena, u va u va pyopyisa leswaku u ta hlalela vuhava bya vona!

¹⁶U tixurhise tingana ematshan'weni ya ku kwetsima; n'wana u ri wena, u ta kombisa vukhuna bya wena. Xi ta tlhelela eka wena, xinwelo lexi nga evokweni ra xinene ra Yehovha, kutani mahlanta ya tingana ma ta va kona ehenhla ka ku kwetsima ka wena.

¹⁷Hikuva vumbabva lebyi endliweke eLebanoni byi ta ku funengeta, ni ku onha loku vuyeke ku chavisa swiharhi. Swi ta va tano hikwalaho ka ngati ya vanhu, ni hikwalaho ka ku pfukela tiko matimba, ni muti ni hinkwavo lava akeke eka wona.

¹⁸Xifaniso lexi vatliweke xi pfuna yini leswi muvatli wa xona a xi vatleke; ni xifaniso lexi chuluriweke, lexi dyondzisaka vunwa, leswaku muvatli a titshembela eka lexi vatliweke hi yena, a ta swi endla swikwembu leswi nga vulavuriki?

¹⁹U ni khombo la nge eka ntsandze: “Pfuka!” ni ka ribye ra mbheveve: “Yima!” Xana ku ta dyondzisa rona-ke? Vonani, ri namarhetiwe hi nsuku ni silivhere; a ku na moya eka rona.

²⁰Kambe Yehovha u le tempeleni ya yena leyi hlawulekeke. Misava hinkwayo a yi miyele emahlweni ka yena!