Read Xitsonga Haggai 1 Bible Online

Haggai 1 - Xitsonga bible

Haggai 1

¹Hi lembe ra vumbirhi ra ku fuma ka hosi Dariyosi, hi n'hweti ya vuntlhanu na yin'we, hi siku ro sungula ra n'hweti, rito ra Yehovha ri ta hi muprofeta Hagayi eka Zerubabele, hosana ya Yuda n'wana Salatiele, ni ka Yoxuwa, muprista lonkulu, n'wana Yosadaki, ri ku:

²“Ku vula Yehovha wa mavandla, leswaku: Vanhu lava va ri: Nkarhi a wu si fika; a hi wona nkarhi lowu yindlu ya Yehovha yi nga akiwaka ha wona!”

³Kutani rito ra Yehovha ri ta hi muprofeta Hagayi, ri ku:

⁴“Xana eka n'wina i nkarhi wo aka tindlu ta n'wina leti sasekisiweke hi mapulangi, kasi yindlu leyi, i rhumbi?

⁵Kutani sweswi, ku vula Yehovha wa mavandla: Langutisisani tindlela ta n'wina etimbilwini ta n'wina: Mi byarile ngopfu, kambe mi tshoverile switsanana;

⁶ma dya, kambe a mi xurhi, ma nwa, kambe a mi kolwi; ma funengela, kambe a mi kufumeli; la tirhelaka hakelo, u yi tirhela ku yi nghenisa exikhwameni lexi boxekeke.

⁷“Yehovha wa mavandla u ri: Langutisani tindlela ta n'wina etimbilwini ta n'wina.

⁸Tlhandlukelani entshaveni, mi neha timhandze, mi aka yindlu, kutani ndzi ta yi tsakela, ndzi va ndzi yi twarisa, ku vula Yehovha.

⁹A mi langutela leswo tala, kasi vonani, mi kumile leswitsongo; mi swi tisa ekaya, kutani ndzi pfurhete ehenhla ka swona. Hikwalaho ka yini, ku vula Yehovha wa mavandla? Hikwalaho ka yindlu ya mina, yi nga rhumbi, kasi n'wina, un'wana ni un'wana a tsutsumela endlwini ya yena.

¹⁰Hikwalaho tilo ri aleke ni mberha ehenhla ka n'wina, ni misava yi aleke ku veka ka yona;

¹¹kambe ndzi vitane ku oma ehenhla ka tiko, ni le henhla ka tintshava, ni le henhla ka koro, ni le henhla ka vhinyo ni mafurha, ni le henhla ka hinkwaswo leswi vekiwaka hi tiko, ni le henhla ka vanhu, ni swiharhi ni le henhla ka ntirho hinkwawo wa mavoko.”

¹²Hilaha Zerubabele, n'wana Salatiele, na Yoxuwa, muprista lonkulu n'wana Yosadaki, ni nsalo hinkwawo wa vanhu va yingisa rito ra Yehovha, Xikwembu xa vona, hi marito ya muprofeta Hagayi, hilaha ingi a rhumiwile hakona hi Yehovha, Xikwembu xa vona; kutani tiko ri chava Yehovha.

¹³Kutani Hagayi, murhumiwa wa Yehovha, a vulavula ni vanhu hi ku lerisa ka Yehovha, a ku: “Ndzi na n'wina, ku vula Yehovha.”

¹⁴Hilaha Yehovha a pfuxaka hakona moya wa Zerubabele, hosana ya Yuda, n'wana Salatiele, ni moya wa Yoxuwa, muprista lonkulu, n'wana Yosadaki, ni moya wa nsalo hinkwawo wa vanhu, kutani va ya, va sungula ku tirha ku aka yindlu ya Yehovha wa mavandla, Xikwembu xa vona,

¹⁵hi siku ra makume mambirhi na mune ra n'hweti ya ntlhanu na yin'we, hi lembe ra vumbirhi ra ku fuma ka hosi Dariyosi.