Read Xitsonga Zechariah 10 Bible Online

Zechariah 10 - Xitsonga bible

Zechariah 10

¹Kombelani mpfula eka Yehovha hi nkarhi wa timpfula ta xirimo! Yehovha u ta humesa tihati; kutani u ta va nyika mpfula ya dzonga, a nyika un'wana ni un'wana leswi milaka ensin'wini ya yena.

²Hikuva titerafi ti vula swahava. Vangoma va bvumbhile swa mavunwa, i milorho yo xisa leyi va nga yi lorha, va chavelela hi swahava. Hikwalaho, tiko ri sukile kukotisa ntlhambi, va xaniseka hi ku pfumala murisi.

³“Vukari bya mina byi pfurhele varisi, ndzi ta tshinya swiphongo; hikuva Yehovha wa tinyimpi u endzela ntlhambi wa yena, yi nga yindlu ya Yuda, u ta yi endla hanci ya yena yo saseka enyimpini.

⁴Eka Yuda ku ta huma ribye ra yinhla, eka yena ku huma mhingu, eka yena ku huma vurha bya nyimpi, ku ta huma ni ka yena vafumi hinkwavo swin'we.

⁵Va yindlu ya Yuda va ta kota tinhenha leti kandziyelaka valala endzhopeni wa ndlela enyimpini, va ta lwa, hikuva Yehovha u na vona; lava khandziyeke tihanci va khomiwa hi tingana.

⁶“Ndzi ta kurisa yindlu ya Yuda, ndzi ponisa yindlu ya Yosefa, ndzi ta va akisa, hikuva ndzi va tsetselele; swi ta kotisa loko swa nga a ndzi nga va lahlanga, hikuva hi mina Yehovha, Xikwembu xa vona, ndzi ta va yingisa.

⁷Efrayimi u ta kota nhenha; timbilu ta vona ti ta tsaka kukotisa loko swa nga va nwile vhinyo. Vana va vona va ta swi vona, va tsaka; timbilu ta vona ti ta titsakela eka Yehovha.

⁸Ndzi ta va bela noti, ndzi va hlengeleta; hikuva ndzi va kutsurile va ta andza ku kota leswi ngi va andzile eku sunguleni.

⁹Ndzi ta va byala exikarhi ka matiko, va ta ndzi tsundzuka ematikweni ya le kule va ta hanya ni vana va vona va ko va tlhela.

¹⁰Ndzi ta va tlherisa etikweni ra Egipta, ni le Asiriya, ndzi va hlengeleta, ndzi va tisa etikweni ra Giliyadi ni le Lebanoni, xivandla xi ko xi nga va ringani.

¹¹Israele u ta famba exikarhi ka lwandle ra makhombo, kambe exikarhi ka lwandle u ta ba magandlati, kutani swidziva hinkwaswo swa nambu swi ta phya: ku tidzunisa ka Asiriya ku ta tsongahatiwa, ku susiwa ni nhonga ya vuhosi ya Egipta.

¹²Ndzi ta va kurisela eka Yehovha, kutani va ta famba hi vito ra yena,” ku vula Yehovha.