Read Xitsonga Zechariah 11 Bible Online

Zechariah 11 - Xitsonga bible

Zechariah 11

¹Wena, Lebanoni, pfula tinyangwa ta wena, ndzilo wu ta hisa tikedari ta wena!

²Rila, kipresi, hikuva kedari yi wile, hikuva mirhi leyo leha yi onhiwile! Rilani, n'wina, tieike ta Baxani, hikuva xihlahla lexi nga ngheniwiki xi wisiwile!

³Ku twakala swirilo swa varisi, hikuva ku tibombisa ka vona ku herisiwile ku twakala ku vuvula ka swinghalana hikuva ku tidzunisa ka Yordani ku herisiwile.

⁴Yehovha, Xikwembu xa mina, u te eka mina: “Risa tinyimpfu leti dlayiwaka, leti lava nga ti xava, va ti dlayaka va nga vekiwi nandzu,

⁵ni lava xavisaka tona va ku: ‘A ku dzunisiwe Yehovha! Hikuva ndzi mufuwi!’ ... Ni leti varisi va tona va nga ti tsetseleriki.

⁶Hikuva a ndzi nga ha tsetseleli vaaki va misava, ku vula, Yehovha; ndzi ta nyiketa vanhu hinkwavo, un'wana ni un'wana emavokweni ya warikwavo, ni le mavokweni ya hosi ya yena; va ta onha misava, kasi a ndzi nga va lamuleri emavokweni ya vona.”

⁷Kavaloko ndzi risa tinyimpfu leti dlayiwaka, ti ri leti tsaneke ta ntlhambi; ndzi titekela mikhavi mimbirhi, wun'wana ndzi wu thya Tintswalo, wun'wana ndzi wu thya Vamba; ndzi risa ntlhambi kutani.

⁸Ndzi lovisa varisi vanharhu hi n'hweti yin'we; ntsena moya wa mina wu herisiwa mbilu hi tinyimpfu; na tona, mimoya ya tona yi phiriwa hi mina.

⁹Kutani ndzi ku: “A ndzi nga ha mi risi! Leyi faka, a yi fe; ni leyi lovaka, a yi love; loko ti ri leti salaka, a ti dye yin'wana ni yin'wana nyama ya yin'wana.”

¹⁰Kutani ndzi teka nkhavi wa mina lowu vuriwaka Tintswalo, ndzi wu tshova, ndzi ta tsema ntwanano wa mina lowu ngi ndzi wu endlile ni matiko hinkwawo.

¹¹Wu tsemiwa hi siku rero; kutani leti tsaneke ta ntlhambi, leti a ti ndzi langutele, ti swi vona hi sweswo leswaku a ri ri rito ra Yehovha.

¹²Ndzi ku eka tona: “Loko swi nga va swinene emahlweni ka n'wina, ndzi nyikeni hakelo ya mina: loko swi nga ri tano, yi tshikeni.” Kutani va ndzi pimela hakelo ya mina, yi va mali ya makume manharhu.

¹³Yehovha a ku eka mina: “Yi hoxele muvumbi wa timbita,” nxavo wolowo lowukulu, lowu va ndzi pimeke ha wona! Kutani ndzi teka mali yoleyo ya makume manharhu, ndzi yi hoxela eka muvumbi endlwini ya Yehovha.

¹⁴Ndzi tshova ni nkhavi wa mina wa vumbirhi, ri nga vamba, ndzi ta herisa vuxaka exikarhi ka Yuda na Israele.

¹⁵Yehovha a ku eka mina: “U engeta u titekela leswi nga swa murisi wa swahava!

¹⁶Hikuva ndzi ta pfuxa emisaveni, murisi loyi a nga taka a nga hlayisi tinyimpfu leti lovaka, a nga lavi leyi lahlekeke, leyi tshovekeke, a nga yi ongoli, ni leyi fambaka a nga ka a nga yi phameli, ntsena u ta dya nyama ya leti noneke, a ko a pandza ni swinyondzwana swa tona.

¹⁷“U ni khombo murisi wa swahava, la tshikaka ntlhambi! Fumu ri ta ba voko ra yena, ri ta omelela kunene, tihlo ra yena ra xinene ri ta fa.”