Read Xitsonga Zechariah 13 Bible Online

Zechariah 13 - Xitsonga bible

Zechariah 13

¹“Xihlovo xi ta va kona, hi siku rolero, lexi nga ta funungulelwa yindlu ya Davhida ni vaaki va Yerusalema, ku hlantswa xivi ni thyaka.

²Hi siku rolero, ku vula Yehovha wa tinyimpi! Ndzi ta susa emisaveni mavito ya swifaniso, a swi nga tshami swi tsundzukiwa, na vona vaprofeta, ndzi ta va rhurhisa emisaveni ni moya lowa thyaka.

³Loko ku nga va ni un'wana loyi a ha profetaka, tata wa yena ni mana wa yena lava nga n'wi veleka va ta ku eka yena: ‘U nga ka u nga hanyi, hikuva u vurile vunwa hi vito ra Yehovha!’ Tata wa yena ni mana wa yena lava nga n'wi veleka va ta n'wi tlhava hikwalaho ka ku profeta ka yena.

⁴Hi siku rolero vaprofeta va ta khomiwa hi tingana, un'wana ni un'wana hi ku bvumbha ka yena loko a ri karhi a profeta, a va nga ha ambali nguvu ya voya ku vula swa mavunwa.

⁵Va ta ku: ‘A ndzi muprofeta, ndzi munhu la rimaka misava, hikuva ndzi xaviwile hi munhu evuntshweni bya mina.’

⁶Kutakuloko va ku eka yena: ‘Timbanga ta yini leti nga emavokweni ya wena?’ U ta ku: ‘Hi leti ndzi nga ti endliwa endlwini ya lava ndzi rhandzaka.’ ”

⁷“Wena, fumu, pfukela murisi wa mina, a nga wanuna la nga nakulobye,” ku vula Yehovha wa tinyimpi. “Bana murisi, tinyimpfu ti ta hangalaka! Kutani ndzi ta vuyisa voko ra mina ehenhla ka lavatsongo.

⁸Emisaveni hinkwayo, ku vula Yehovha, miti minharhu ya vanhu yi ta avanyisiwa, ku lova mimbirhi, ku sala wa vunharhu kona.

⁹Lowu wa vunharhu, ndzi ta wu nghenisa endzilweni, ndzi va n'okisa ku kota loko ku n'okisiwa silivhere, ndzi va ringa kukota loko ku ringiwa nsuku. Va ta khongela vito ra mina, kutani ndzi va hlamula, ndzi ku: ‘I tiko ra mina,’ rona ri ta ku: ‘Yehovha, Xikwembu xa mina!’ ”