Read Xitsonga Zechariah 14 Bible Online

Zechariah 14 - Xitsonga bible

Zechariah 14

¹Vona, ra ta siku leri ri nga ra Yehovha, leri leswi nga phangiwa eka wena swi nga ta avanyisiwa exikarhi ka wena ha rona.

²Hikuva ndzi ta hlengeleta matiko hinkwawo ku lwa na Yerusalema; muti wu ta ngheniwa, ku ta phangiwa tindlu vavasati va ta pfinyiwa va etleriwa, hafu yin'wana ya muti yi yisiwa evukhumbini; kambe lava seleke va tiko a va nga susiwi emutini.

³Yehovha u ta humelela, a lwa ni matiko wolawo, kukota siku a lwaka esikwini ra ku dlaya.

⁴Milenge ya yena yi ta yima hi siku rolero ehenhla ka ntshava ya mitlhwari leyi nga ekusuhi na Yerusalema, hitlhelo ra vuxa, ntshava ya mitlhwari vi ta phemeka, ku sungula exikarhi, ku yisa evuxeni ni le vusikwini, ku ko ku humelela nkova lowukulu; tlhelo rin'wana ra ntshava ri ta tshinela en'walungwini, rin'wana ri tshinela edzongeni.

⁵Mi ta tsutsuma hi nkova wa tintshava ta mina, hikuva nkova wa tintshava wu ta fika eAsele; kutani mi tsutsuma kukotisa siku mi nga tsutsuma loko misava yi tsekatseka, emikarhini ya Uziya, hosi ya Yuda. Kutani Yehovha, Xikwembu xa mina, u ta ta, a ri ni vakwetsimi hinkwavo.

⁶Esikwini rolero, ku vonakala a ku nga vi kona, ku kwetsima ka tinyeleti ku ta swihala.

⁷Ri ta va siku ri ri rin'we leri tiviwaka hi Yehovha: A ri nga vi na nhlekanhi, ni loko byi ri vusiku; kambe enkarhini wa madyambu ku vonakala ku ta va kona.

⁸Esikwini rolero, mati lama pfelelaka ma ta huma eYerusalema, man'wana ya wona ma khulukela elwandle ra le vuxeni, man'wana elwandle ra le vupeladyambu; swi tshama swi va tano rihunga ni vuxika.

⁹Yehovha u ta va hosi ya misava hinkwayo hi siku rolero Yehovha u ta va un'we ni vito ra yena ri va rin'we.

¹⁰Tiko hinkwaro, ku suka eGeba ku ya fika eRimoni, ku nga tlhelo ra dzonga eka Yerusalema, ri ta hundzuka ri kota banyi, Yerusalema, u ta tlakuka, a tshama exiteni xa yena, ku sukela enyangweni ya Benjamini ku ya fika enyangweni yo rhanga, enyangweni ya tinhla, ni ku sukela ekhokholweni ra Hananele ku yisa eswikhuvutweni swa hosi.

¹¹Va ta aka kona, ndzhukano a wu nga ha vi kona, Yerusalema, u ta akiwa hi ku rhula.

¹²Hi rona khombo leri Yehovha a nga ta ba matiko hinkwawo lama hlaseleke Yerusalema: Nyama ya vona yi ta bola va ri karhi va yimile hi milenge ya vona, mahlo ya vona ma ta bola emakheleni ya wona, ni tindzimi ta vona emilon'wini ya vona.

¹³Hi siku rolero, dzolonga lerikulu leri humaka eka Yehovha ri ta va kona exikarhi ka vona, un'wana ni un'wana u ta khoma voko ra un'wana voko ra yena ri tlakukela ehenhla ka voko ra warikwavo.

¹⁴Na yena Yuda u ta lwa eYerusalema; ku ta hlengeletiwa rifuwo ra matiko hinkwawo lama nge matlhelo, nsuku ni silivhere, ni swa ku ambala hi vunyingi lebyikulu.

¹⁵Nkhavi wu ta ba hanci, ni mula, ni kamela ni mbhongolo, ni swifuwo hinkwaswo leswi nga emixaxeni yoleyo; nkhavi lowo wu ta fana ni lowun'wana.

¹⁶Masalela ya matiko hinkwawo lawa ma nga hlasela Yerusalema, ma ta tlhandlukela hi lembe rin'wana ni rin'wana, ku ya khongela Hosi, Yehovha wa tinyimpi, ni ku endla nkhuvo wa mitsonga.

¹⁷Loko va ri: va tinxaka hinkwato ta misava leti nga taka ti nga tlhandlukeli eYerusalema ku ya khinsamela Hosi, Yehovha wa tinyimpi, a va nga niseriwi mpfula.

¹⁸Va rixaka ra Egipta loko va nga tlhandluki, va nga ti, na vona, va nga ka va nga niseriwi; va ta biwa hi nkhavi lowu Yehovha a nga ta ba ha wona matiko hinkwawo lawa ma nga tlhandlukiki ku ya endla nkhuvo wa mitsonga.

¹⁹Wu ta va wona nkhavi wa xidyoho xa Egipta, ni wa xidyoho xa matiko hinkwawo lama nga taka ma nga tlhandlukeli eYerusalema, ku ya endla nkhuvo wa mitsonga.

²⁰Hi siku rolero ku ta tsariwa eka swingelengele leswi nga etihancini: “Ku kwetsima ka Yehovha”; timbita leti nga endlwini ya Yehovha ti ta kotisa mikambana leyi nga ekusuhi ni alitari.

²¹Ni timbita hinkwato ta Yerusalema, ni ta Yuda ti ta va leti hlawuleriweke Yehovha wa tinyimpi; hinkwavo lava endlaka magandzelo, va ta ta, va teka tona, va sweka ha tona; a ku nga ha vi na Mukanana endlwini ya Yehovha wa ti nyimpi, hi siku rolero.