Read Xitsonga Zechariah 3 Bible Online

Zechariah 3 - Xitsonga bible

Zechariah 3

¹Kutani a ndzi kombisa Yoxuwa, muprista lonkulu, a yimile emahlweni ka ntsumi ya Yehovha; yena Satana a yimile evokweni ra yena ra xinene ku n'wi alela.

²Yehovha a ku eka Satana: “Yehovha a a ku tshinye, Satana! E, Yehovha la nga tihlawulela Yerusalema, a a ku tshinye! Loyi xana a hi xisa lexi vutliweke endzilweni?”

³Yoxuwa a a ambele tinguvu ta thyaka, a yimile emahlweni ka ntsumi.

⁴Ntsumi yi ahlamisa nomu, yi byela lava yimeke ekusuhi na yona, yi ku: “N'wi hluvuriseni tinguvu ta thyaka.” Kutani yi ku eka yena: “Vona, ndzi cukumete ku biha ka wena kule na wena, ndzi ku ambexa tinguvu leto saseka.”

⁵Ndzi ku: “A va n'wi vehele xihuku lexinene enhlokweni!” Kunene va n'wi vehela xihuku lexinene enhlokweni va n'wi ambexa ni swiambalo; kambe ntsumi ya Yehovha a yi yimile kwalaho.

⁶Ntsumi ya Yehovha yi tiyisisa eka Yoxuwa, yi ku:

⁷“Yehovha wa tinyimpi u ri: Loko u famba etindleleni ta mina, u hlayisa leswi ndzi ku tshembiseke swona, na wena u ta va ni ku lawula endlwini ya mina, u langutela timbala ta mina, ndzi va ndzi ku nyika mfanelo yo famba exikarhi ka lava yimeke ekusuhi na mina.

⁸Twana-ke, Yoxuwa, muprista lonkulu, wena ni vamakwenu lava tshameke ka wena! Kunene mi vavanuna lava nga ta va swikombiso, hikuva ndzi ta tisa nandza wanga, Xihluke.

⁹Hikuva vona, loko ri ri ribye leri ndzi nga ri veka emahlweni ka Yoxuwa, ehenhla ka ribye leri ntsena, ku ni mahlo ya ntlhanu na mambirhi; ndza ri vatla, ku vula Yehovha wa tinyimpi, kutani ndzi ta hlangula ku homboloka ka misava leyi hi siku rin'we.

¹⁰Esikwini rero, ku vula Yehovha wa tinyimpi, mi ta vitanana, un'wana ni un'wana ehansi ka murhi wa vhinya ni wa nkuwa.”