Read Xitsonga Zechariah 9 Bible Online

Zechariah 9 - Xitsonga bible

Zechariah 9

¹Hi byebyo vuprofeta lebyi vuriweke hi Yehovha ehenhla ka tiko ra Hadiraka, byi ta tshama ehenhla ka Damaska; hikuva Yehovha u languta vanhu kukota loko a languta tinxaka hinkwato ta Israele.

²Byi tshama ni le henhla ka Hamata la nga vandzakana na yena, ni le henhla ka Tiri na Sidoni, hikuva Tiri u tlharihile ngopfu.

³Tiri u tiakele khokholo, u hlengeletile silivhere kukota ntshuri, ni nsuku, kukota ndzhope wa ndlela.

⁴Vonani, Hosi yi ta n'wi teka, yi ta hoxela matimba ya wona elwandle, kutani u ta hisiwa hi ndzilo.

⁵Axikeloni u ta swi vona a tshuka; na Gaza, a rhurhumela ngopfu, na yena Ekroni, hikuva u ta va ni tingana hikwalaho ka ku langutela ka yena. Gaza u ta lahlekelwa hi hosi ya yena, na Axikeloni a a nga ha akiwi.

⁶Vana va timbuya va ta aka Axidodo, kutani ndzi ta herisa ku tidzunisa ka Mufilista.

⁷Ndzi ta susa ngati ya yena enon'wini wa yena, ni manyala ya yena exikarhi ka meno ya yena; na yena, u ta salela Xikwembu xa hina, u ta kotisa hosi exikarhi ka Yuda, Ekroni a kota Muyebusi.

⁸Ndzi ta yima emahlweni ka yindlu ya mina, ndzi yi sirhelela eka mavandla, ni ka loyi a yaka ni loyi a tlhelaka, muxanisi a nga ha fambi eka vona, hikuva sweswi, ndzi vonile hi mahlo ya mina.

⁹Tsaka ngopfu, mbhuri ya Siyoni; u ba mikulungwana, n'wana wa Yerusalema! Vona, hosi ya wena hi leyi; yi ta eka wena, hi la lulameke la nga ni ku hlayiseka, i xisiwana; la khandziyeke mbhongolo, xi nga ximbhongolwana xa xisati.

¹⁰Ndzi ta susa tigolonyi exikarhi ka Efrayimi, ni tihanci eka Yerusalema, kutani vurha bya nyimpi byi ta herisiwa. U ta vula ku rhula eka matiko, u ta fuma ku sukela elwandle rin'wana ku yisa elwandle rin'wana, ni ku suka enambyeni ku yisa makumu ya misava.

¹¹Loko u ri wena, hikwalaho ka ngati ya ntwanano wa wena, ndzi ta tshunxa vakhomiwa va wena ekheleni leri nga riki na mati.

¹²Tlhelelani ekhokholweni, n'wina vakhomiwa lava nga ni ku tshemba! Namuntlha ndza vulavula, ndzi ri: Ndzi ta ku tlherisela kambirhi.

¹³Hikuva ndzi ta konga Yuda kukota vurha, ndzi byi rhiya hi Efrayimi; ndzi ta pfuxa vana va wena, Siyoni, va pfukela vana va wena, Yavhani; ndzi ta ku endla u va ku kota fumu ra nhenha.

¹⁴Yehovha u ta humelela a tlakuka ehenhla ka vona, nseve wa yena wu ta copiwa kukota rihati. Hosi Yehovha u ta yimba nanga, u ta famba a ri exidzedzeni lexi humaka edzongeni.

¹⁵Yehovha wa tinyimpi u ta va sirhelela, va ta dya [valala va vona], va kandziya maribye ya swipelupelu; va ta nwa, va huvela kukotisa loko ku nga hi vhinyo; va ta tala kukotisa nkambana wa magandzelo, kukota tinhla ta alitari.

¹⁶Yehovha, Xikwembu xa vona, xi ta va ponisa hi siku rero, kukota ntlhambi lowu nga tiko ra yena; hikuva va ta kota maribye lama vangamaka ya harhi ya vuhosi etikweni ra yena.

¹⁷Hikuva ku saseka ka vona ku ta va lokukulu! Koro yi ta kurisa varisanyana, ni vhinyo leyintshwa vanhwanyana.