Read Xitsonga Malachi 2 Bible Online

Malachi 2 - Xitsonga bible

Malachi 2

¹“Kutani sweswi, ku lerisa loku ku ta eka n'wina, vaprista!

²Loko mi nga yingisi, mi nga ku veki embilwini, mi dzunisa vito ra mina, ku vula Yehovha wa mavandla, ndzi ta rhumela ndzhukano ehenhla ka n'wina, ndzi rhuketela mikateko ya n'wina; ina, ndzi ta swi rhukana, hikuva a mi swi veki etimbilwini.

³Vonani, ndzi ta onha timbewu ta n'wina, ndzi hangalasa vulongo emimombyeni ya n'wina, byi nga vulongo bya swilo leswi tlhaveriwaka mikhuvo ya n'wina, kutani va ta mi cukumeta ehandle na byona.

⁴Kutani mi ta tiva leswaku ndzi rhumele ku lerisa koloko eka n'wina, leswaku ntwanano wa mina na Levhi wu tiya, ku vula Yehovha wa mavandla.

⁵Ntwanano wa mina na yena ku va ku hanya ni ku rhula, kambe ndzi n'wi nyikile wona leswaku a ndzi chava; kunene u ndzi chavile, a vuya a rhurhumela emahlweni ka vito ra mina.

⁶Nawu wa swinene a wu ri enon'wini wa yena; ku biha a ku nga kumiwi enon'wini wa yena; a famba na mina hi ku rhula ni ku lulama a va a tlherisa lavo tala eku biheni ka vona.

⁷Hikuva milomu ya muprista yi fanekela ku hlayisa ku tiva, nawu wu ta laviwa enon'wini wa yena, hikuva i ntsumi ya Yehovha wa mavandla.

⁸Kambe n'wina mi hambukile ndlela, mi khunguvanyise lavo tala hi nawu; mi onhile ntwanano wa Levhi, ku vula Yehovha wa mavandla.

⁹Na mina, ndzi ta mi endla lava soriwaka, ni vabihi exikarhi ka matiko hinkwawo, hikuva a mi hlayisi tindlela ta mina, kambe mi avanyisa hi nghohe etimhakeni ta nawu.”

¹⁰Xana a hi velekiwanga hinkwerhu hi tatana un'we? Xana a hi vumbiwanga hi Xikwembu xin'we xana? Hikwalaho ka yini hi kanganyisana un'wana ni un'wana ni makwavo, hi onhela yini ntwanano wa vatata wa hina xana?

¹¹Yuda u kanganyisile, kutani ku endliwa leswo biha eIsraeleni ni le Yerusalema; hikuva Yuda u hahlurile lexo kwetsima xa Yehovha, lexi a xi rhandzaka, u lovola wanhwanyana wa xikwembu ximbe.

¹²Munhu la endlaka sweswo, Yehovha u ta n'wi hunguta ematendeni ya Yakobo la hitekaka, ni la pfumelaka, ni la tisaka nhlengo eka Yehovha wa mavandla.

¹³Kambe leswi mi engetaka mi swi endla hi leswi: Mi tata alitari ya Yehovha hi mihloti, ni swirilo ni ku rila, kutani a nga ha amukeri switlhavelo swa n'wina, a nga tsakisiwi hi lexi humaka emavokweni ya n'wina.

¹⁴Kutani mi ri: Hikwalaho ka yini? Hikuva Yehovha i mbhoni exikarhi ka wena ni wansati wa vuntshwa bya wena loyi u n'wi kanganyiseke kasi i nakuloni wa wena ni nsati wa xinakulobye xa wena.

¹⁵A ku na un'we la nga endlisaka sweswo, loko ku anakanya ku sele eka yena. Kambe i yini loko un'we ntsena a endle sweswo? A lave mbewu eka Xikwembu. Tivoneleni emimoyeni ya n'wina; u nga tshuki u endla hi ku kanganyisa wansati wa vuntshwa bya wena.

¹⁶“Hikuva ndzi vengile ku tshikana, ku vula Yehovha, Xikwembu xa Israele; ku tshikana i nguvu leyi funengetaka vubihi bya munhu, ku vula Yehovha wa mavandla. Tivoneleni emimoyeni ya n'wina, mi nga endli hi ku kanganyisa!”

¹⁷Mi karhata Yehovha hi marito ya n'wina, kambe mi ri: “Hi n'wi karhata hi yini?” Hi loko mi ku: “Un'wana ni un'wana la endlaka swo biha, u lulamile emahlweni ka Yehovha, kutani hi vona lava a tsakisiwaka ha vona!” Kumbe loko mi ku: “Xi kwihi Xikwembu xa ku avanyisa?”