Read Xitsonga Matthew 27 Bible Online

Matthew 27 - Xitsonga bible

Matthew 27

¹Kuteloko byi xile, vaprista hinkwavo ni vakulukumba va tiko va kanela ku dlaya Yesu.

²Kuteloko va n'wi bohile va famba na yena, va ya n'wi nyiketa hosi Pontiyo Pilato.

³Kutani Yudasi la nga n'wi xenga loko a vona leswaku Yesu u avanyisiwile, a va ni tingana, kutani a tlherisa mali ya makume manharhu eka vaprista lavakulu,

⁴a ku eka vona: “Ndzi dyohile hi ku xenga ngati leyi nga riki na nandzu.” Va ku: “Swi na yini ka hina? Tilangutele u ri wena kwalaho.”

⁵Kavaloko a cukumeta mali etempeleni, a suka a ya tisunga.

⁶Kutani vaprista lavakulu va teka mali leyi, va ku: “A swi fanelanga leswaku yi nghenisiwa enhlengweni wa tempele, hikuva i nxavo wa ngati.”

⁷Kuteloko va kanerile va xava ha yona nsimu ya muvumbi ku lahlela kona vamatiko.

⁸Hikwalaho nsimu leyi yi vuriwaka Nsimu ya Ngati, ni namuntlha.

⁹Hilaha ku hetisekeke leswi vuriweke hi muprofeta Yeremiya, loko a te: “Va tekile mali ya makume manharhu, wu ri nxavo wa la ringanisiweke, ni loyi vana va Israele va n'wi ringaniseke,

¹⁰va yi humesile ku xava nsimu ya muvumbi, hilaha Hosi yi nga ndzi lerisa hakona.”

¹¹Yesu a yima emahlweni ka hosi; kutani hosi yi n'wi vutisa, yi ku: “Xana u hosi ya Vayuda xana?” Yesu a ku eka yena: “U vula swona.”

¹²Kutani, hambi a hehliwa hi vaprista lavakulu ni vakulukumba, a nga hlamulanga nchumu.

¹³Kutani Pilato a ku eka yena: “Xana a wu twi loko va ku hehla swonghasi xana?”

¹⁴Kambe a nga hlamulanga rito ni rin'we; hosi yi va yi hlamala ngopfu.

¹⁵A wu ri mukhuva wa hosi hi nkhuvo ku tshunxela tiko mubohiwa un'wana loyi va n'wi rhandzaka.

¹⁶Enkarhini wolowo a ku ri ni mubohiwa un'wana la twaleke, la vuriwaka Barabasi. Kuteloko va hlengeletene.

¹⁷Pilato a ku eka vona: “Mi rhandza loko ndzi mi tshunxela wihi, hambi Barabasi, kumbe Yesu, la vuriwaka Kriste?”

¹⁸Hikuva a a swi tiva leswaku va n'wi nyikete yena hi mona.

¹⁹Kuteloko a tshamile exitshan'weni xa ku avanyisa, nsati wa yena a rhumela eka yena, a ku: “U nga tshuki u va ni mhaka, hambi yi ri yin'we, ni munhu loyi wo lulama, hikuva ndzi twile ku vaviseka lokukulu enorhweni hikwalaho ka yena.”

²⁰Kambe vaprista lavakulu ni vakulukumba va hlohlotela vunyingi leswaku va kombela Barabasi, Yesu, yena a dlawa.

²¹Hosi yi tlhela yi vulavula, yi ku eka vona: “Mi rhandza leswaku ndzi mi tshunxela wihi eka lavambirhi lava?” Va ku: “Barabasi.”

²²Pilato a engeta a ku eka vona: “Kambe Yesu, la vuriwaka Kriste, ndzi ta endla yini ha yena-ke?” Hinkwavo va ku: “A a vambiwe.”

²³Kutani hosi yi ku: “Xana u onhile yini-ke?” Kambe va huwelela hi matimba ku tlurisa, va ku: “A a vambiwe.”

²⁴Pilato, loko a vona leswaku a nga ha pfuni nchumu, hikuva dzolonga a ri engeteleka, a teka mati, a hlamba mandla emahlweni ka ntshungu, a ku: “A ndzi na nandzu engatini ya munhu loyi la lulameke, tilanguteleni mi ri n'wina.”

²⁵Kutani tiko hinkwaro ri hlamula, ri ku: “Ngati ya yena a yi ve ehenhla ka hina ni le henhla ka vana va hina.”

²⁶Kutani a va tshunxela Barabasi; loko a ri Yesu, kuteloko va n'wi xupurile, a n'wi nyiketa leswaku a vambiwa.

²⁷Kutani masocha ya hosi ma yisa Yesu endlwini ya vuhosi, ma n'wi hlengeletela ntlawa hinkwawo wa wona;

²⁸kutani va n'wi susa tinguvu, va n'wi ambexa nguvu ya xivunguvungu.

²⁹Kutani va luka harhi ya mitwa, va n'wi tlhandleka enhlokweni, va n'wi khomisa rihlanga evokweni ra xinene; kutani va khinsama hi matsolo emahlweni ka yena, va n'wi tseketsela, va ku: “Xewani, hosi ya Vayuda.”

³⁰Va n'wi tshwutela hi marhi, va teka rihlanga, va n'wi ba nhloko ha rona.

³¹Kuteloko va n'wi tseketserile va n'wi funungula nguvu, va n'wi ambexa tinguvu ta yena, va n'wi yisa ku ya n'wi vamba.

³²Kuteloko va humile, va kuma wanuna wa Kirene, la vuriwaka Simoni, va n'wi byisa leswaku a rhwala xihambano xa Yesu.

³³Kuteloko va fikile exivandleni lexi vuriwaka Gologota, hileswaku xitsunga xa ripala,

³⁴va n'wi nyika ntsuvi lowu hlanganisiweke ni nyongwa leswaku a nwa kambe loko a nantswile, a ala ku nwa.

³⁵Kuteloko va n'wi vambile va pambulelana tinguvu ta yena, va ti hlahluva hi vuhlolotwana, leswaku ku endlakala lexi nga vuriwa hi muprofeta la nga te: “Va avelane mikhancu ya mina, ni nguvu ya mina, va yi hlahluva hi vuhlolotwana.”

³⁶Kutani va tshamisa, va n'wi langutela kwalaho.

³⁷Va nameka ehenhla ka nhloko ya yena papila ra nandzu wa yena leri nge: LOYI I YESU, HOSI YA VAYUDA.

³⁸Swidyohi swimbirhi swi vambiwe na yena, xin'wana evokweni ra xinene, xin'wana eka lera ximatsi.

³⁹Lava hundzaka va n'wi tseketsela, va n'wi nikinika tinhloko, va ku:

⁴⁰“Wena la hlanhlaka tempele, u ku u ta yi pfuxa hi masiku manharhu, tihanyise-ke! Loko u ri N'wana wa Xikwembu xika la exihambanweni!”

⁴¹Hi mukhuva wolowo, na vona vaprista lavakulu, va n'wi tseketsela, va ri ni vatsari ni vakulukumba, va ku:

⁴²“U hanyisile van'wana, kutani u hluleka ku tihanyisa! Loko a ri yena hosi ya Israele, a a xike sweswi exihambanweni, hi ta pfumela eka yena.

⁴³U tshembile Xikwembu; a xi n'wi lwele sweswi, loko xi n'wi tsakela, hikuva u te: ‘Ndzi N'wana wa Xikwembu.’ ”

⁴⁴Ni swidyohi leswi vambiweke na yena, swi n'wi tseketsela sweswo na swona.

⁴⁵Hi nkarhi wa ntlhanu na wun'we, munyama wu va kona emisaveni hinkwayo ku fikela nkarhi wa ntlhanu na mune.

⁴⁶Kuteloko ku lavile ku va nkarhi wa ntlhanu na mune Yesu a huwelela hi rito lerikulu, a ku: “Eli, Eli, lama sabaktani”; hileswaku: “Xikwembu xanga, Xikwembu xanga u ndzi tshikele yini?”

⁴⁷Van'wana lava ngi va ri kwalaho, loko va n'wi twa, va ku: “U vitana Eliya.”

⁴⁸Kutani un'wana wa vona a tsutsuma, a ya teka xikhuvi a xi tata hi ntsuvi a xi tlhoma erihlangeni, a n'wi nyika a nwa.

⁴⁹Kambe van'wana va ku: “Tshika, hi ta vona loko kumbe Eliya a ta ta n'wi ponisa.”

⁵⁰Kambe Yesu a tlhela a huwelela hi rito lerikulu, a nyiketa moya.

⁵¹Kutani vonani, nguvu ya Tempele yi handzuka hi le xikarhi, ku sungula ehenhla, ku ya fika ehansi; misava yi tsekatseka, maribye ma pandzeka, ni masirha ma pfuleka;

⁵²kutani mitsumbu ya lavo tala ya vakwetsimi lava etleleke va pfuka;

⁵³kuteloko va hume emasirheni, endzhaku ka ku pfuka ka yena, va nghena emutini lowu hlawuriweke va voniwa hi lavo tala.

⁵⁴Kutani ndhuna ya dzana ni lava ngi va ri na yona, lava languteleke Yesu, loko va vona ku tsekatseka ka misava ni leswi humeleleke va tshuka ngopfu, va ku: “Loyi a a ri N'wana wa Xikwembu kunene.”

⁵⁵Vavasati lavo tala a va ri kwalaho va languta va ri ekule va ri lava nga n'wi landzela loko a huma eGaleliya, lava n'wi tirheleke;

⁵⁶exikarhi ka vona, a ku ri na Mariya wa Magadala, na Mariya, mana wa Yakobo na Yose, ni mana wa vana va Zebediya.

⁵⁷Kuteloko ri perile, ku ta munhu la fuweke wa Arimatiya, vito ra yena a a ri Yosefa, na yena a a ri mudyondzisiwa wa Yesu;

⁵⁸a ya eka Pilato a kombela ntsumbu wa Yesu; kutani Pilato a lerisa leswaku va n'wi nyika wona.

⁵⁹Kuteloko Yosefa a wu tekile, a wu phutsela hi nguvu leyo basa,

⁶⁰a wu veka esirheni ra yena lerintshwa, leri a nga ri vatla eribyeni, kuteloko a vumbuluxile ribye lerikulu enyangweni ya sirha, a tifambela.

⁶¹Kutani Mariya wa Magadala a a ri kwalaho na Mariya lo un'wana, va tshamile va langutene ni sirha.

⁶²Loko ri xa, hi siku leri tlhandlamaka ra ku lunghisa, vaprista lavakulu ni Vafarisi va hlengeletana eka Pilato, va ku:

⁶³“Hosi, ha ha anakanya leswaku muxisi yeloyi, loko a ha hanya, u te: ‘Ndzi ta pfuka hi siku ra vunharhu.’

⁶⁴Hikwalaho, u nga lerisa leswaku sirha ri languteriwa ku ko ku fika siku ra vunharhu, hikuva kumbe vadyondzisiwa va yena va nga n'wi yiva, va ta ku eka tiko: ‘U pfukile eku feni,’ kutani mavunwa walawo kunene ma ta tlurisa layo rhanga.”

⁶⁵Pilato a ku eka vona: “Mi ni valanguteri, yanani mi ya langutela hilaha mi swi vonaka hakona.”

⁶⁶Kutani va ya, va tiyisa ribye hi mfungho wa vona, va veka ni valanguteri enyangweni ya sirha.