Read Xitsonga Matthew 3 Bible Online

Matthew 3 - Xitsonga bible

Matthew 3

¹Enkarhini wolowo ku humelela Yohane Mukhuvuri, a dyondzisa emananga ya Yudiya, a ku:

²“Hundzukani, hikuva ku fuma ka matilo ku tshinele.”

³Hikuva hi yena loyi a nga vuriwa hi muprofeta Esaya loko a ku: “Rito ra loyi a huwelelaka emananga, ri ri: ‘Khulelani gondzo ra Hosi, mi lunghisa tindlela ta yena.’ ”

⁴Yohane yeloyi a funengele nguvu ya voya bya kamela, a tikhame xisuti hi xifungha xa dzovo: swakudya swa yena a ti ri tinjiya ni vulombe bya nhova.

⁵Kutani va Yerusalema, ni va Yudiya hinkwavo, ni va tiko hinkwaro leri nga ekusuhi na Yordani, va humelela eka yena;

⁶kutani a va khuvuriwa hi yena eYordani, va ri karhi va tivula swidyoho swa vona.

⁷Kambe loko a vona Vafarisi ni Vasaduki lavo tala va ta eka yena eku khuvuriweni, a va byela, a ku: “Rixaka ra timhiri, i mani a nga mi kombisa ku balekela ku kariha loku taka?

⁸Loko swi ri tano, vekani mihandzu leyi fanelaka ku hundzuka.

⁹Kutani mi nga tshuki mi tianakanyela mi ku: ‘Hi na Abrahama, a nga tata wa hina’; hikuva ndza mi byela leswaku Xikwembu xi nga pfuxela Abrahama vana hi maribye lawa.

¹⁰Kambe xihloka xi vekiwile etimitswini ta mirhi; murhi wun'wana ni wun'wana lowu nga tswariki mihandzu leyo saseka, wu ta tsemiwa, wu hoxiwa endzilweni.

¹¹Loko ndzi ri mina, ndzi mi khuvula hi mati ntsena leswaku mi tshika swo biha, kambe loyi a taka endzhaku ka mina, wa ndzi tlula hi matimba, kutani a swi ndzi faneri ku n'wi rhwalela tintanghu; hi yena la nga ta mi khuvula hi moya lowo kwetsima ni ndzilo.

¹²Rihlelo ra yena ri le vokweni ra yena, kutani u ta kukula swinenenene xivuya xa yena, u ta hlengeleta mavele ya yena enguleni, mungu, wona, u ta wu hisa endzilweni lowu nga timekiki.”

¹³Enkarhini wolowo Yesu a huma eGaleliya a ta eYordani eka Yohane ku ta khuvuriwa hi yena.

¹⁴Kambe Yohane a ala, a ku: “Hi mina ndzi fanelaka ku khuvuriwa hi wena, kasi wena u tela yini eka mina xana?”

¹⁵Yesu a n'wi hlamula, a ku: “Ndzi pfumelele sweswi, hikuva hi fanele ku heta leswo lulama hinkwaswo.” Kutani Yohane a n'wi pfumelela.

¹⁶Kuteloko Yesu u khuvuriwile, a hatlisa a huma ematini; kutani hi nomu lowu, matilo ma pfuleka, a vona Moya wa Xikwembu wu xika, wo ngi i tuva, wu ta ehenhla ka yena.

¹⁷Kutani ku twakala rito leri humaka ematilweni, ri ku: “Loyi, i n'wana wa mina, loyi ndzi n'wi rhandzaka, loyi ndzi n'wi tsakelaka.”