Read Xitsonga Matthew 8 Bible Online

Matthew 8 - Xitsonga bible

Matthew 8

¹Kuteloko a ngirimela entshaveni, mitshungu leyikulu yi n'wi landzelela.

²Kutani ku fika eka yena munhu wa nhlokonho, a n'wi khinsamela, a ku: “Hosi, loko u swi rhandza, u nga swi kota ku ndzi basisa.”

³Kutani Yesu a tshambuluta voko, a n'wi khumba, a ku: “Ndza swi rhandza, basisiwa.” Sweswo nhlokonho wa yena wu basisiwa hi nomu wolowo.

⁴Kutani Yesu a ku eka yena: “U nga tshuki u byela munhu; kambe u ya tikomba eka muprista, kutani u humesa mhamba leyi nga lerisiwa hi Muxe, byi ta va vumbhoni eka vona.”

⁵Kakuloko Yesu a nghena eKapernawume, ndhuna ya dzana yi ta eka yena, yi n'wi khongela,

⁶yi ku: “Hosi nandza wa mina u lo lakahla, endlwini, u ome swirho, u vaviseka ngopfu.”

⁷Yesu a ku eka yena: “Ndzi ta ya ndzi ya n'wi hanyisa.”

⁸Kambe ndhuna ya dzana yi angula, yi ku: “Hosi, a swi ku fanelanga ku ta nghena endlwini ya mina, kambe vula rito rin'we ntsena nandza wa mina u ta hanya.

⁹Hikuva, na mina, ndzi nga munhu la fumiwaka hi van'wana, ndzi ni masocha lama nga ehansi ka mina; loko ndzi ku eka un'wana: ‘Famba!’ wa famba; eka un'wana: ‘Tana!’ wa ta; ni ka nandza wa mina: ‘Endla swo karhi,’ wa swi endla.”

¹⁰Kuteloko Yesu a swi twa, a hlamala, a byela lava n'wi landzaka, a ku: “Kunene ndza mi byela, ndzi ku: A ndzi si vona ku pfumela loko tano, ni le Israeleni.

¹¹Hikwalaho-ke ndza mi byela, ndzi ri: Lavo tala va ta huma evuxeni ni le vupeladyambu, va ta tshama eswakudyeni eku fumeni ka matilo, na Abrahama, na Isaka, na Yakobo.

¹²Kambe vana va ku fuma va ta cukumetiwa ehandle emunyameni, laha mikosi yi nga ta va kona ni ku getsela ka meno.”

¹³Kwalaho Yesu a ku eka ndhuna ya dzana: “Muka, u endleriwile hilaha u pfumeleke hakona.” Kutani nandza wa yena a hanya enkarhini wolowo.

¹⁴Kutani loko Yesu a ta endlwini ya Petro, a kuma mukon'wana wa yena a lo lakahla, a vabya hi nhloko.

¹⁵Kuteloko a n'wi khumbile hi voko, nhloko yi miyela; kutani a pfuka a va tirhela.

¹⁶Kute nimadyambu, va n'wi tisela van'wanyana lava nga ni mademona; kutani a hlongola mimoya eka vona hi rito ntsena; kutani a hanyisa hinkwavo lava nga tsakangiki,

¹⁷leswaku ku endleka leswi nga vuriwa hi muprofeta Esaya loko a te: “U titekele mikarhalo ya hina, u tibyarhele ni mavabyi ya hina.”

¹⁸Kuteloko Yesu a vone mitshungu leyikulu yi n'wi rhendzele, a lerisa vadyondzisiwa va yena leswaku va n'wi perisela entsungeni.

¹⁹Kutani mutsari un'wana a n'wi tshinelela a ku eka yena: “Mufundhisi, laha u yaka kona, hambi ku ri kwihi ni kwihi, ndzi ta ku landza.”

²⁰Kutani Yesu a ku eka yena: “Timhungubye ti ni micele, ni tinyanyana ta le tilweni ti ni swisaka, kambe N'wana wa Munhu a nga na laha a nga seketelaka nhloko ya yena kona.”

²¹Kutani un'wana wa vadyondzisiwa va yena a ku eka yena: “Hosi, ndzi pfumelele ndzi rhanga ndzi ya lahla tatana.”

²²Kambe Yesu a ku eka yena: “Ndzi landze, u tshika va ku fa, va lahla va ku fakulobye.”

²³Kuteloko a nghene ebyatsweni, vadyondzisiwa va yena na vona, va nghena.

²⁴Kutani maswivo, ku pfuka moya wa xihuhuri lexikulu elwandle, byatso byi va byi khubumetiwa hi magandlati; Yesu, yena, a etlele.

²⁵Kavaloko vadyondzisiwa va yena va n'wi tshinelela; va n'wi pfuxa, va ku: “Hosi, hi ponise, ha lova.”

²⁶Kutani a ku eka vona: “Vanhu va ku pfumela lokutsongo, mi ni vutoya ha yini-ke?” Kutani a yima, a tshinya xihuhuri ni lwandle, ku rhula lokukulu ku va kona.

²⁷Kutani vanhu valavo va hlamala ngopfu, va ku: “Yeloyi hi lowo yini, loko a yingisiwa hi mheho ni lwandle?”

²⁸Kuteloko a fikile entsungeni wa hase, etikweni ra Vagadara, a hlanganisiwa hi vanhu vambirhi lava ngi va ri ni rihuhu va huma emasirheni, va ri lava chavisaka ngopfu; ku nga ri na munhu la nga tiyaka mbilu ku hundza hi ndlela yoleyo.

²⁹Kutani va sungula ku huwelela, va ku: “Hi ni mhaka yihi na wena, Yesu, N'wana wa Xikwembu? Xana u te laha ku hi xanisa, wu nga si va nkarhi wa kona-ke?”

³⁰Kutani kulenyana a ku vonaka ntlhambi lowukulu wa tinguluve, ti ri karhi ti dya.

³¹Kutani mademona ma n'wi khongela, ma ku: “Kungakuloko u hi hlongola, hi pfumelele hi tiyela entlhambini wa tinguluve.”

³²Kutani a ku eka wona: “Yanani.” Kwalaho ma huma ma ya entlhambini wa tinguluve; kutani hi nomu wolowo, ntlhambi hinkwawo wa tinguluve wu tsutsumela eribuwini hi matimba lamakulu, wu tihoxa elwandle, wu ya lova ematini.

³³Kutani varisi va tsutsuma va ya emutini; va ya byela hinkwaswo leswi humeleleke varihuhe.

³⁴Kutani hinkwavo va muti va huma ku ya hlangana na Yesu, kuteloko va n'wi vona, va n'wi khongela ngopfu leswaku a suka etikweni ra vona.