Read Xitsonga Mark 1 Bible Online

Mark 1 - Xitsonga bible

Mark 1

¹Masungulo ya Evhangeli ya Yesu Kriste.

²Hilaha ku tsariweke hi muprofeta Esaya leswaku: “Vonani, ndzi rhuma emahlweni ka wena ntsumi ya mina, leyi nga ta lunghisa ndlela ya wena.”

³Rito ra loyi a huwelelaka emananga ri ku: “Lunghisani ndlela ya Hosi, mi lulamisa magondzo ya yena.”

⁴Yohane a humelele emananga, a khuvula vanhu, a dyondzisa ta nkhuvulo wa ku hundzuka loku yisaka eku rivaleriweni ka swidyoho.

⁵Kutani vanhu va tiko ra Yudiya ni ra Yerusalema a va ta eka yena, a va khuvuriwa hinkwavo enambyeni wa Yordani, va ri karhi va tivula swidyoho swa vona.

⁶Yohane a a ambele voya bya kamela, a tibohile xisuti hi vamba ra dzovo, a dya tinjiya ni vulombe bya nhova.

⁷A a dyondzisa, a ku: “Wa ta un'wana, endzhaku ka mina loyi a ndzi tlulaka hi matimba, loyi ndzi nga faneriki ku korhama emahlweni ka yena, ndzi tshunxa tinghole ta tintanghu ta yena.

⁸Loko ndzi ri mina, ndzi mi khuvula hi mati, kambe yena u ta mi khuvula hi Moya lowo Kwetsima.”

⁹Emikarhini yoleyo, Yesu a huma eNazareta, muti wa Galeliya, a ya khuvuriwa eYordani hi Yohane.

¹⁰Kakuloko a huma ematini, a vona tilo ri pfuriwa, Moya wu xikela henhla ka Yesu, wu fana ni tuva;

¹¹kutani rito leri humaka ematilweni ri twakala, ri ku: “U N'wananga la rhandziwaka, loyi ndzi titsakelaka ha yena.”

¹²Kutani hi nomu lowu Moya wu n'wi susumetela emananga;

¹³a ya tshama emananga hi masiku ya mune wa makume, a ri karhi a ringiwa i Satana, a ri exikarhi ka swivandzana, tintsumi a ti n'wi tirhela.

¹⁴Kuteloko Yohane a bohiwile, Yesu a fika eGaleliya, a vula Evhangeli ya ku fuma ka Xikwembu, a ku:

¹⁵“Mikarhi yi hetisekile, ku fuma ka Xikwembu ku tshinerile; hundzukani mi pfumela Evhangeli.”

¹⁶Loko a a ri karhi a famba, a lulama ni lwandle ra Galeliya, a vona Simoni na Andriya, makwavo, va hoxa rikoka ra vona elwandle, hikuva a va ri vaphasi va tinhlampfi.

¹⁷Yesu a ku eka vona: “Ndzi landzeni, ndzi ta mi endla vaphasi va vanhu.”

¹⁸Va hatlisa va tshika tinkoka ta vona, va n'wi landza.

¹⁹Kutani a ya emahlweni, a kuma Yakobo, n'wana Zebediya, na Yohane makwavo va ri ebyatsweni, va bohelela tinkoka ta vona.

²⁰Kuteloko a va vitanile va siya tata wa vona, Zebediya, ebyatsweni swin'we ni vatirhi, va n'wi landza.

²¹Kutani va nghena eKapernawume. Kute hi siku ra Savata, Yesu a nghena esinagogeni, a dyondzisa.

²²Kambe va hlamala hi dyondzo ya yena, hikuva a a va dyondzisa swa nga hi vuhosi, ku nga ri kukota vatsari.

²³Esinagogeni ya vona, munhu a a ri kona la ngheniweke hi moya wa thyaka, a huwelela, a ku:

²⁴“Mhaka ya hina na wena hi yihi, Yesu wa Nazareta? U tile ku hi lovisa xana? Ndza ku tiva leswaku u Mukwetsimi wa Xikwembu.”

²⁵Kambe Yesu a wu tshinya, a ku: “Miyela, u huma eka yena.”

²⁶Kutani moya wa thyaka wu n'wi tsekatsekisa hi matimba wu huwelela hi rito lerikulu, kutani wu huma eka yena.

²⁷Hinkwavo va hlamala, va vutisana, va ku: “I yini? I dyondzo leyintshwa xana, leswi a tshinyaka hi vuhosi hambi yi ri mimoya leya thyaka, kutani ya n'wi yingisa?”

²⁸Ku twakala ka yena ku hatlisa ku hangalaka hi matlhelo hinkwawo ya Galeliya.

²⁹Enkarhini wolowo, Yesu a huma esinagogeni, a ya na Yakobo na Yohane endlwini ya Simoni na Andriya.

³⁰Mukon'wana wa Simoni a a etlele emasangwini, a vabya hi ku hisa ka miri, kutani va hatlisa va n'wi vula ka Yesu.

³¹Yesu, kuteloko a tshinele a n'wi khoma hi voko a n'wi pfuxa; hi nomu lowu dari ri n'wi tshika kutani a va tirhela.

³²Nimadyambu, loko ri perile va tisa ka Yesu hinkwavo lava ngi va ri ni mavabyi, ni lava ngi va ri ni mademona.

³³Muti hinkwawo wu hlengeletana enyangweni.

³⁴Kutani a horisa vanhu lavo tala, lava vabyaka hi mavabyi layo tala, a hlongola ni mademona layo tala, kambe a nga pfumelanga leswaku mademona ma vula leswaku ma n'wi tiva.

³⁵Nimpundzu a pfuka bya ha ri vusiku, a huma endlwini, a ya mananga, a ya khongela kona.

³⁶Kambe Simoni ni lava ngi va ri na yena va ya n'wi lava.

³⁷Kuteloko va n'wi kumile va ku eka yena: “Hinkwavo va ku lava.”

³⁸Yesu a ku eka vona: “A hi yeni kun'wana, emitini leyi yi hi rhendzeleke, ndzi ta dyondzisa na kona, hikuva ndzi tele swona.”

³⁹A dyondzisa emasinagogeni ya vona, etikweni hinkwaro ra Galeliya a ri karhi a hlongola mademona.

⁴⁰Munhu wa nhlokonho a ta eka yena, a n'wi khongela, a khinsama hi matsolo emahlweni ka yena, a ku: “Loko u swi rhandza, u nga ndzi basisa.”

⁴¹Yesu a n'wi twela vusiwana, a tshambuluta voko, a n'wi khumba, a ku eka yena: “Ndza swi rhandza, u basisiwa.”

⁴²Loko a vurisile sweswo, nhlokonho yi n'wi sukela, a basisiwa.

⁴³Kutani Yesu a n'wi laya hi matimba, a n'wi tlherisa hi ku hatlisa, a ku eka yena:

⁴⁴“U nga tshuki u byela munhu nchumu, kambe famba u tikombisa ka muprista, u tlangela ku horisiwa ka wena hi leswi lerisiweke hi Muxe, xi ta va xikombiso eka vona.”

⁴⁵Kambe yena loko a sukile, a sungula ku vula timhaka leto tala, a hangalasa leswi endliweke; kutani Yesu a tsandzeka ni ku nghena emutini a nga tiviwi, kambe a titshamela handle emananga, kutani vanhu va huma ematlhelweni hinkwawo, va va ka yena.