Read Xitsonga Mark 11 Bible Online

Mark 11 - Xitsonga bible

Mark 11

¹Kuteloko va tshinelele Yerusalema, va ri ekusuhi na Betefage, na Betaniya, eNtshaveni ya Mitlhwari, a rhuma vadyondzisiwa va yena vambirhi,

²a ku eka vona: “Fambani emutini lowu mi wu kongomaka, kutakuloko mi nghenile eka wona, mi ta kuma ximbhongolwana lexi kulekiweke, lexi nga siki khandziyiwaka hi munhu, xi tshunxeni, mi xi tisa la.

³Kungakuloko munhu a ku eka n'wina: ‘Mi endlisela yini sweswo?’ Mi ta ku: ‘Hosi ya xi lava, kutani u ta hatlisa a xi rhumela halenu.’ ”

⁴Kutani va famba, va ya kuma ximbhongolwana xi kulekiwile ehandle enyangweni, emahandzeni ya tindlela, kutani va xi tshunxa.

⁵Van'wana lava yimeke kwalaho va ku eka vona: “Mi endla yini hi ku tshunxa ximbhongolwana lexi xana?”

⁶Vona va va byela leswi Yesu a nga va lerisa swona, kutani va va tshika va famba.

⁷Loko va yisile ximbhongolwana eka Yesu, va andlala tinguvu ta vona ehenhla ka xona, Yesu a xi khandziya.

⁸Kutani lavo tala va andlala tinguvu ta vona endleleni, van'wana va tsema mahlampfu emirhini, va ma andlala endleleni.

⁹Lava rhangaka emahlweni, ni lava landzaka, va huwelela, va ku: “Hosanna! A ku vongiwe la taka hi vito ra Hosi!

¹⁰A ku dzunisiwe ku fuma loku taka eka tata wa hina, Davhida! Hosanna ematilweni la ma nga ehenhlahenhla.”

¹¹Kutani Yesu a nghena eYerusalema, ni le tempeleni, kuteloko a rhalarhalile hinkwako, wu ri nkarhi wa madyambu, a huma, a ya eBetaniya, a ri ni la va khume na vambirhi.

¹²Nimpundzu, loko va huma eBetaniya, a twa ndlala.

¹³Kutani a vona, a ri kule, murhi wa nkuwa lowu nga ni matluka; a hambuka a kamba kumbe a nga kuma nchumu eka wona; kambe loko a fika eka wona, a nga kumanga nchumu, loko ma nga ri matluka ntsena, hikuva a wu nga ri nkarhi wa makuwa.

¹⁴Kutani Yesu a ku eka wona: “Ku sungula sweswi, a ku nga ha vi na munhu la nga ta dya mihandzu ya wena hi laha ku nga heriki!” Vadyondzisiwa va yena a va ri karhi va swi twa.

¹⁵Kutani va fika eYerusalema. Kuteloko Yesu a nghenile etempeleni, a sungula ku hlongola lava xavisaka ni lava xavaka etempeleni, a wisa matafula ya lava bindzurisaka mali ni switshamo swa lava xavisaka matuva.

¹⁶Na swona a nga pfumelelanga munhu ku tsemakanya tempele a rhwele xanchumu.

¹⁷Kutani a dyondzisa, a ku eka vona: “Xana a ku tsariwanga leswaku: ‘Yindlu ya mina yi ta vuriwa yindlu ya xikhongelo ya matiko hinkwawo!’ Kasi n'wina mi yi endlile bako ra makhamba.”

¹⁸Kambe vatsari ni vaprista lavakulu, loko va n'wi twa a vula sweswo va lava hilaha va nga ta n'wi lovisa hakona; hikuva a va n'wi chava, hikuva tiko hinkwaro a ri hlamala dyondzo ya yena.

¹⁹Kuteloko ri perile, a huma emutini.

²⁰Ni mixo, loko va hundza, va vona murhi wa nkuwa wu omile hinkwawo, ku sungula hi timitsu.

²¹Kutani Petro a anakanya, a ku eka yena: “Rabi, vona murhi wa nkuwa lowu u nga wu rhuketela, wu omile.”

²²Yesu a hlamula, a ku eka vona: “Vanani ni ku pfumela eka Xikwembu!

²³Ndzi tiyisile, ndzi ri eka n'wina: Un'wana ni un'wana la nge eka ntshava leyi: ‘Suka, u ya tihoxa elwandle,’ a nga vileri embilwini ya yena, kambe a pfumela leswaku leswi a swi vulaka swi nga endleka, u ta endleriwa hinkwaswo leswi a swi vuleke, hambi yi ri yini na yini.

²⁴Hikwalaho ndzi ri eka n'wina: Hinkwaswo leswi mi swi kombelaka hi ku khongela, pfumelani leswaku mi swi nyikiwile, kutani swi ta endleriwa n'wina.

²⁵Kungakuloko mi yima mi khongela, rivalelani loyi mi nga va ni mhaka na yena leswaku na yena Tata wa n'wina la nga ematilweni, a mi rivalela ku dyoha ka n'wina.

²⁶Hikuva loko mi nga rivaleri van'wana Tata wa n'wina la nga ematilweni na yena, a nga ka a nga mi rivaleri ku dyoha ka n'wina.”

²⁷Kutani va tlhela, va ya Yerusalema, kuteloko a ri karhi a tifambela etempeleni, vaprista la vakulu ni vatsari ni vakulukumba va ta eka yena; va ku:

²⁸“Xana leswi, u swi endla hi matimba wahi xana? Matimba walawo ma nyikiwile hi mani ku endlisa sweswo?”

²⁹Yesu a va hlamula, a ku: “Ndzi ta mi vutisa mhaka, na mina, mi ta ndzi hlamula, hi kona ndzi nga ta mi byela matimba lawa ndzi endlaka leswi ha wona.

³⁰Ku khuvula ka Yohane xana ku hume etilweni, kumbe ka vanhu xana? Ndzi hlamuleni.”

³¹Vona, va tsundzuxana va ku: “Loko hi ku: ‘Ku hume etilweni,’ u ta ku: ‘Loko swi ri tano, a mi pfumelanga ha yini-ke?’

³²Kambe loko hi ku: ‘Eka vanhu,’ a va chava tiko; hikuva hinkwavo a va ku: ‘Yohane i muprofeta wa xiviri.’ ”

³³Kutani va hlamula, va ku eka Yesu: “A hi swi tivi.” Yesu a va hlamula a ku: “Na mina, ndzi nga ka ndzi nga mi byeri matimba lawa ndzi endlaka swilo leswi ha wona.”