Read Xitsonga Mark 12 Bible Online

Mark 12 - Xitsonga bible

Mark 12

¹Kutani a sungula ku vulavula hi swifaniso, a ku: “Munhu a simekile vhinya ensin'wini, a yi biyerile hi rihlampfu, a cele xikhuvutelo, a aka ni tshala; kutani a yi lerisela varimi, yena a ya ku endzeni.

²Hi nkarhi wa kona, a rhuma nandza eka varimi leswaku a ya teka mihandzu ya vhinya eka vona.

³Kambe va n'wi khoma, va n'wi ba, kutani va n'wi tlherisa a nga ri na nchumu.

⁴A tlhela a rhuma nandza un'wana eka vona; kambe yena, va n'wi khandla hi maribye va n'wi balesa nhloko, kutani va n'wi tlherisa hi tingana.

⁵A engeta a rhuma un'wana; yena, va n'wi dlaya. Kutani a rhuma van'wana lavo tala; ku biwa van'wana, van'wana va dlawa.

⁶Kambe, hikuva a ha ri ni n'wana wa yena a ri swakwe la rhandziwaka, na yena, a n'wi rhuma eka vona, a ri wa makumu, a ku: ‘Va ta chava n'wananga.’

⁷Kambe varimi va byelana, va ku: ‘Mudyandzhaka hi loyi; tanani, hi n'wi dlaya, ndzhaka yi ta va ya hina.’

⁸Kutani va n'wi khoma, va n'wi dlaya, va n'wi cukumeta ehandle ka nsimu ya vhinya.

⁹Xana n'wini wa nsimu u ta endla yini xana? U ta ta, u ta lovisa varimi, kutani nsimu ya vhinya, u ta yi nyika van'wana.

¹⁰“Xana a mi si hlaya tsalwa le ri nge: ‘Ribye leri vaaki va nga ri nyenya, hi rona le ri nga endliwa ribye ra masungulo ya yinhla?

¹¹Swi endlisiwe sweswo hi Hosi, i mhaka leyi hlamarisaka emahlweni ka hina’?”

¹²Hi laha va rhandzaka ku n'wi khoma, kambe va chava vunyingi, hikuva va tivile leswaku u ringanisile vona loko a vula xifaniso lexi; kutani va n'wi tshika, va tifambela.

¹³Kutani va rhuma eka yena van'wana va Vafarisi ni Vaheroda leswaku va n'wi phasa hi marito.

¹⁴Vona va ta, va ku eka yena: “Mufundhisi, ha tiva leswaku u vula lexi tiyeke, ni leswaku a ku na vutoya ha munhu, hikuva a ku languti nghohe ya vanhu, kambe ndlela ya Xikwembu u yi dyondzisa hi ku tiyisa, Xana swa hi fanela ku humesela Khezari ndzuvo, kumbe a hi swona-ke? Xana hi ta humesa, kumbe hi nga humesi?”

¹⁵Kambe yena, hi ku xiya ku kanganyisa ka vona, a ku eka vona: “Mi ndzi ringela yini? Ndzi tiseleni denari, ndzi yi vona.”

¹⁶Va yi tisa. A ku eka vona: “Xifaniso lexi, i xa mani, ni ku tsala loku, i ka mani xana?” Va ku eka yena: “I swa Khezari.”

¹⁷Kavaloko Yesu a va hlamula, a ku: “Tlheriselani Khezari leswi nga swa Khezari, ni Xikwembu leswi nga swa Xikwembu.” Kutani va n'wi hlamala ngopfu.

¹⁸Vasaduki lava vulaka leswaku ku hava ku pfuka ka vafi, va ta eka yena va n'wi vutisa va ku:

¹⁹“Mufundhisi, Muxe u hi tsalele, a ku: ‘Makwavo wa munhu, loko a file, a siye nsati, kambe a nga siyanga vana, makwavo a ta teka nsati wa yena, a pfuxela makwavo rixaka.’

²⁰Kambe a ku ri ni munhu loyi ngi a ri ni vana va ntlhanu na vambirhi, lo wa hosi a teka nsati, kutani a fa, a nga siyanga vana. Wa vumbirhi, na yena, a n'wi teka, kutani a fa, a nga siyanga n'wana; ni ka wa vunharhu swi va tano.

²¹Kutani va n'wi teka va ri va ntlhanu na vambirhi, kambe va nga siyanga vana.

²²Endzhaku ka vona hinkwavo, wansati na yena a fa.

²³Hi siku ra ku pfuka, loko va pfukile, xana wansati loyi, u ta va wa mani ka vona xana, hikuva a tekiwile hi vona va ntlhanu na vambirhi?”

²⁴Yesu a va hlamula, a ku: “Xana a mi lahlekanga hi leswi mi nga tiviki Matsalwa, ni loko ma ri matimba ya Xikwembu xana?

²⁵Hikuva kutakuloko va pfukile eku feni, a va nga ha teki, ni loko ku ri ku tekiwa kambe vanhu va ta va tanihi tintsumi ematilweni.

²⁶Loko va ri vafi, ni leswi va nga ta pfuka, xana a mi hlayanga ebukwini ya Muxe, hilaha Xikwembu xi nga vulavula na yena exihlahleni, xi ku: ‘Hi mina Xikwembu xa Abrahama, Xikwembu xa Isaka, Xikwembu xa Yakobo’?

²⁷Xona, a hi Xikwembu xa vafi, kambe i Xikwembu xa lava hanyaka. Loko swi ri tano, n'wina mi lahlekile ngopfu.”

²⁸Un'wana wa vatsari la nga va twa loko va hlamulana, kuteloko a vone leswaku u va hlamurile swinene, a n'wi tshinelela ku n'wi vutisa, a ku: “Nawu lowo rhanga eka milawu hinkwayo, hi wihi xana?”

²⁹Yesu a n'wi hlamula, a ku: “Nawu lowo rhanga hi lowu nge: ‘Yingisa, Israele: Hosi, Xikwembu xa hina, i Hosi yi ri yoxe.

³⁰Kutani: Rhandza Hosi, Xikwembu xa wena, hi mbilu ya wena hinkwayo, ni moya wa wena hinkwawo, ni ku anakanya ka wena hinkwako, ni matimba ya wena hinkwawo’; hi wona nawu lowo rhanga.

³¹Kutani wa vumbirhi lowu fanaka na wona, hi lowu nge: ‘Rhandza warikwenu, kukota loko u tirhandza’; a ku na nawu lowukulu eka yona yoleyo.”

³²Mutsari a ku eka yena: “Hi swona mufundhisi, u vurile swinene loko u te: Xikwembu i xin'we, kambe a ku na xin'wana loko xi nga ri xona;

³³kutani ku xi rhandza hi mbilu hinkwayo, ni ku anakanya hinkwako, ni moya hinkwawo, ni matimba hinkwawo, ni ku rhandza warikwavo tanihi loko munhu a tirhandza, swi tlula magandzelo hinkwawo.”

³⁴Yesu loko a vona leswaku u hlamule hi ku anakanya, a ku eka yena: “A ku kule ni ku fuma ka Xikwembu.” Kutani a ka ha vanga na munhu la tiyisaka mbilu ku n'wi vutisa.

³⁵Yesu, loko a ri karhi a dyondzisa etempeleni, a vulavula, a ku: “Vatsari va vurisa ku yini leswaku Kriste i n'wana Davhida-ke?

³⁶Kasi yena Davhida u vurile hi Moya lowo kwetsima, a ku: ‘Hosi yi te eka Hosi yanga: Tshama evokweni ra mina ra xinene, ndzi kondza ndzi endla valala va wena vunavelo bya milenge ya wena.’

³⁷Xana loko yena Davhida a n'wi vula hosi, a nga va n'wana wa yena hi mukhuva wihi xana?” Kutani ntshungu lowunyingi a wu n'wi yingisa hi ku tsaka.

³⁸Eku dyondziseni ka yena, a ku eka vona: “Chavani vatsari lava rhandzaka ku tifambela hi tinguvu leto leha ni ku xewetiwa emitsendzeleni;

³⁹lava rhandzaka switshamo swa le mahlweni emasinagogeni, ni switshamo leswo rhanga emikhubyeni;

⁴⁰va mita tindlu ta tinoni, kambe va endla swikhongelo leswo leha, leswaku va tivonakarisa ntsena. Va ta avanyisiwa hi ku avanyisa loku tlurisaka.”

⁴¹Yesu, kakuloko a tshamile kusuhi ni laha ku hlayisiwaka nhlengo, a languta hilaha vanhu va hoxaka mali enhlengweni; kambe vafuwi lavo tala va hoxa ngopfu.

⁴²Ku ta ni noni ya xisiwana, yi hoxa swipambatana swimbirhi leswi ringanaka fadeni.

⁴³Kuteloko a vitanile vadyondzisiwa va yena, a ku eka vona: “Kunene ndzi ri eka n'wina: Noni leyi ya xisiwana, yi humesile ku tlurisa hinkwavo lava nga humesa nhlengo.

⁴⁴Hikuva hinkwavo va tekile eku taleriweni ka vona, kambe loyi u humesile evusiwaneni bya yena, hinkwaswo leswi ngi a ri na swona, hinkwaswo leswi a nga ta hanya ha swona.”