Read Xitsonga Mark 13 Bible Online

Mark 13 - Xitsonga bible

Mark 13

¹Loko a ha ku suka etempeleni, un'wana wa vadyondzisiwa va yena a ku eka yena: “Mufundhisi, languta maribye layonghasi, ni tindlu tonghasi!”

²Yesu a hlamula, a ku eka yena: “Xana wa languta tindlu letikulu leti-ke? A ku nga tshikiwi ribye ehenhla ka ribye rin'wana le ri nga ta tshama ri nga mbundzuxiwi.”

³Kuteloko a tshamile Ntshaveni ya Mitlhwari, a langutene ni tempele, Petro na Yakobo, na Yohane, na Andriya, va n'wi vutisa etlhelweni va ku:

⁴“Hi byele nkarhi lowu timhaka leti ti nga ta humelela ha wona, ni xikombiso xi ta va xihi xa nkarhi lowu hinkwaswo leswo swi nga ta hetisiwa ha wona?”

⁵Yesu a sungula ku va byela, a ku: “Tilanguteleni leswaku mi nga tshuki mi xisiwa hi munhu.

⁶Hikuva lavo tala va ta ta hi vito ra mina, un'wana ni un'wana a ku: ‘Hi mina Kriste’ kambe va ta hambukisa lavo tala.

⁷Kutakuloko mi twa tinyimpi ni mimpfumawulo ya tinyimpi, mi nga tshukeni, hikuva leswi, swi fanele ku humelela; kambe a hi wona makumu.

⁸Hikuva tiko rin'wana ri ta pfukela tiko rin'wana matimba, ku fuma kun'wana ku ta lwa ni ku fuma kun'wana; ku tsekatseka ka misava ku ta va kona hi matlhelo layo tala, ni tindlala ti ta va kona ni madzolonga. Leswo i ku sungula ka mahlomulo.

⁹“Kambe n'wina, tilanguteleni; hikuva va ta mi yisa etihubyeni ni le masinagogeni; mi ta biwa, mi yimisiwa emahlweni ka tindhuna ni tihosi hikwalaho ka mina, mi va timbhoni eka vona.

¹⁰Kambe swi fanele leswaku Evhangeli yi rhanga yi byeriwa ematikweni hinkwawo.

¹¹Kambe siku va mi kokaka ku mi yisa eku avanyisiweni, mi nga tshuki mi vilela hi leswi mi nga ta swi vula, mi nga tshuki mi swi anakanya; kambe vulani leswi mi nga ta swi nyikiwa enkarhini wolowo, hikuva a hi n'wina mi nga ta vulavula, kambe i Moya lowo Kwetsima.

¹²“Makwavo wa munhu u ta nyiketa makwavo eku dlaweni, tata wa munhu a endlisa n'wana wa yena hi sweswo; ni vana va ta pfukela vaveleki va vona matimba, va va dlaya.

¹³Mi ta vengiwa hi hinkwavo hikwalaho ka vito ra mina, kambe la tiyiselaka ku fikela emakumu, hi yena la nga ta ponisiwa.

¹⁴“Kutakuloko mi vona manyala ya ku hlaseriwa lama vuriweke hi muprofeta Daniele, ma yimile laha ma nga faneriki (la hlayaka a a tsundzuke); enkarhini wolowo, lava nga eYudiya a va tsutsumele etintshaveni;

¹⁵la nga ehenhla ka yindlu, a nga ha xikeri endlwini, a nghena ku ya teka nchumu endlwini ya yena;

¹⁶ni la nga emasin'wini, a nga ha tlheleri ekaya ku ya teka nguvu ya yena.

¹⁷Ku ta va ni khombo eka vavasati lava tikeke, ni lava an'wisaka emikarhini yoleyo.

¹⁸Kambe khongelani leswaku ku baleka ka n'wina ku nga humeleri nivuxika.

¹⁹Hikuva emikarhini yoleyo, ku ta va ni nhlomulo lowonghasi, ka hari mpfhuka wa ku sungula ka leswi vumbiweke, leswi Xikwembu xi nga swi tumbuluxa, ku fikela sweswi, lowotano wu nga si va kona, kutani wu nga ka wu nga vi kona ni siku ni rin'we.

²⁰Na swona loko ngi Hosi yi nga hungutanga masiku walawo, a ku nga ti hanya munhu, kambe hikwalaho ka vahlawuriwa lava a va hlawuleke, u hungutile masiku walawo.

²¹“Enkarhini wolowo, loko munhu a ku ha n'wina: ‘Vonani, Kriste u la,’ kumbe, ‘U lahaya,’ mi nga tshuki mi pfumela;

²²hikuva ku ta humelela vakriste vo hemba lavo tala, ni vaprofeta va mavunwa; va ta endla masingita ni swikombiso leswi nga ta hambukisa na vona vahlawuriwa, loko swa endleka.

²³Loko mi ri n'wina tilanguteleni; vonani, ndzi mi byerile hinkwaswo eku sunguleni.

²⁴“Kambe emikarhini leyo, endzhaku ka nhlomulo wolowo, dyambu ri ta endla ntima, n'weti wu ta pfumala ku vonakala,

²⁵ni tinyeleti ti ta wa hi le tilweni, ni leswa matimba swa le tilweni swi ta tsekatseka.

²⁶Hilaha va nga ta vona N'wana wa Munhu a ta hi mapapa, hi matimba lamakulu ni ku kwetsima.

²⁷U ta rhuma tintsumi ta yena, u ta hlengeleta vahlawuriwa va yena emimoyeni ya mune, ku sungula eku heteleleni ka misava, ku yisa emakun'wini ya tilo.

²⁸“Dyondzani xifaniso lexi hi murhi wa nkuwa: marhavi ya wona, loko ma olova, ni loko ma humesa matluka, mi tiva leswaku rihunga ri kusuhi.

²⁹Hi mukhuva wolowo, na n'wina loko mi vona sweswo swi humelela, tivani leswaku N'wana wa Munhu u kusuhi, u le nyangweni.

³⁰Kunene ndzi ri eka n'wina: Rixaka leri ri nga ka ri nga hundzi hinkwaswo leswo swi nga si humelela.

³¹Tiko ni misava swi ta hundza, kambe marito ya mina ma nga ka ma nga hundzi.

³²“Loko ri ri siku lero ni nkarhi lowu, a ku na loyi a wu tivaka, hambi ti ri tintsumi ta le tilweni, hambi a ri N'wana; wu tiviwa hi Tatana ntsena.

³³“Tivoneleni, mi hiteka, mi va mi khongela, hikuva a mi tivi leswaku nkarhi wu ta va rini.

³⁴Swi kotisa munhu loko a ya endza, a sukela yindlu ya yena a lerisile malandza ya yena un'wana ni un'wana ntirho wa yena, a lerisile ni mulanguteri wa nyangwa ku langutela.

³⁵Hitekani-ke, hikuva a mi tivi nkarhi n'wini wa yindlu a nga ta ta ha wona, kumbe nimadyambu, kumbe nivusiku lebyikulu, kumbe loko nkuku wu ringa, kumbe nimixo;

³⁶hikuva loko a fika hi ku mi tshuketa, a nga tshuki a mi kuma mi etlele.

³⁷Kambe leswi ndzi mi byelaka swona ndzi byela hinkwavo, ndzi ri: Hitekani!”