Read Xitsonga Mark 14 Bible Online

Mark 14 - Xitsonga bible

Mark 14

¹Masiku a ma ha ta va mambirhi ku ta va nkhuvo wa Paseka ni wa swinkwa leswi nga riki na comela; kambe vaprista lavakulu ni vatsari a va lava hilaha va nga ta n'wi khoma hakona hi vutlhari, va ta n'wi dlaya.

²Kambe a va ku: “Ku nga vi esikwini ra nkhuvo, kumbe dzolonga ri nga tshuka ri humelela exikarhi ka tiko.”

³Kuteloko a ri eBetaniya, endlwini ya Simoni wa nhlokonho, a a tshamile eswakudyeni, ku ta wansati la nga ni ximbitana xa alabastera lexi teleke mafurha yo nun'hwela, ya narda leyinene, leyi nga ni nxavo wa risima; kuteloko a fayile ximbitana a chela murhi enhlokweni ya Yesu.

⁴Van'wana va hlunama, va ku: “Mafurha lawa ma lahliwela yini?”

⁵kasi a ma ta xava tidenari leti tlulaka madzana manharhu, ti nyikiwa swisiwana! Va holoverisa sweswo nsati yeloyi.

⁶Kambe Yesu a ku: “N'wi tshikeni, mi n'wi twisela yini ku vaviseka? U ndzi endlele mhaka leyinene.

⁷Hikuva, loko swi ri swisiwana, mi ta va na swona hi masiku, kutani mi ta tiva ku swi endlela swinene siku mi swi rhandzaka, kambe mina ndzi nga ka ndzi nga vi na n'wina hi masiku.

⁸U endlile leswi a swi koteke ku swi endla; u totile miri wa mina ndzi nga si lahliwa esirheni.

⁹Kunene ndzi ri eka n'wina: Hinkwako emisaveni laha Evhangeli leyi yi nga ta vuriwa kona, lexi nga endliwa hi yena, na xona, xi ta vuriwa, a ta anakanyiwa ha xona.”

¹⁰Kutani Yudasi Iskariyota, un'wana wa lava khume na vambirhi a ya eka vaprista lavakulu ku va nyiketa Yesu.

¹¹Kuteloko va n'wi yingisile va tsaka; va n'wi tshembisa mali kutani a lava nkarhi lowunene ku va nyiketa yena.

¹²Hi siku leri sungulaka nkhuvo wa swinkwa leswo kala comela, ri nga leri ku tlhaviwaka Paseka ha rona, vadyondzisiwa va ku eka yena: “U rhandza leswaku hi ya ku lunghisela kwihi Paseka, laha u nga yi dyelaka kona?”

¹³Kavaloko a rhuma vadyondzisiwa va yena vambirhi, a ku eka vona: “Yanani emutini, mi ta hlangana ni munhu la rhwaleke khuwana ra mati, n'wi landzeni;

¹⁴laha a nghenaka kona, mi byela n'wini wa yindlu, mi ku: ‘Mufundhisi u ri: yi kwihi yindlu leyi a nga ta dyela eka yona Paseka ni vadyondzisiwa va yena?’

¹⁵Yena u ta mi komba yindlu leyikulu, leyi nga ehenhla, leyi sasekisiweke, leyi andlariweke; mi hi lunghisela kona.”

¹⁶Kutani vadyondzisiwa va yena va suka, va nghena emutini, va kuma swi ri tano hilaha a nga va byela hakona; kutani va lunghisa Paseka.

¹⁷Kakuloko ma ri madyambu, a ya kona ni lava khume na vambirhi.

¹⁸Kuteloko va tshamile va ri karhi va dya, Yesu a ku: “Ndzi tiyisile ndzi ri eka n'wina: Un'wana wa n'wina a nga loyi a dyaka na mina, u ta ndzi xenga.”

¹⁹Kutani va sungula ku va ni tingana, un'wana ni un'wana a ku eka yena: “Xana hi mina-ke?”

²⁰A hlamula, a ku eka vona: “Hi un'wana wa lava khume na vambirhi la covelaka na mina enkambeni.

²¹Loko a ri N'wana wa Munhu, u tifambela hilaha ku tsariweke hakona ehenhla ka yena; kambe u ni khombo munhu loyi N'wana wa munhu a xengiwaka hi yena! A swi ta va swinene eka munhu yeloyi loko a nga velekiwanga.”

²²Kakuloko va ha dya, Yesu a teka xinkwa, kuteloko a khensile a xi phema a va nyika, a ku: “Tekani mi dya; lowu i miri wanga.”

²³Kutani a teka xinwelo, a khensa a va nyika xona; va nwela eka xona hinkwavo.

²⁴A ku eka vona: “Leyi i ngati yanga ya ntwanano lowuntshwa, leyi halateriwaka lavo tala.

²⁵Ndzi tiyisile, ndzi ri eka n'wina: A ndzi nga ha tshami ndzi nwa leswi velekiwaka hi vhinya, ku ko ku fika siku leri ndzi nga ta swi nwa swi ri swintshwa eku fumeni ka Xikwembu.”

²⁶Kuteloko va yimbelele tinsimu, va ya eNtshaveni ya Mitlhwari.

²⁷Yesu a ku eka vona: “Hinkwenu mi ta khunguvanyeka, hikuva ku tsariwile leswaku: ‘Ndzi ta ba murisi, kutani tinyimpfu ti ta hangalaka.’

²⁸Kambe kutakuloko ndzi pfukile, ndzi ta mi rhangela emahlweni ku ya eGaleliya.”

²⁹Kambe Petro a ku eka yena: “Hambi va nga khunguvanyeka hinkwavo, loko ndzi ri mina, e-e!”

³⁰Yesu a ku eka yena: “Kunene ndzi ri eka wena: Namuntlha, hi byona vusiku byebyi, nkuku wu nga si ringa kambirhi, u ta va u ndzi landzule kanharhu.”

³¹Kambe Petro a engeta a tiyisa, a ku: “Hambi swi fanekele leswaku ndzi fa na wena, ndzi nga ka ndzi nga ku landzuri.” Kutani hinkwavo va vurisa sweswo.

³²Kutani va ya exivandleni lexi vuriwaka Getsemane; kutani a ku eka vadyondzisiwa va yena: “Tshamani kwala, ndza ha ya khongela.”

³³A teka Petro na Yakobo na Yohane, kutani a sungula ku tshuka ngopfu, a ri ni gome lerikulu;

³⁴a ku eka vona: “Moya wa mina wu khomiwile hi gome ra ku fa, salani kwala, mi hiteka.”

³⁵Kutani a ya emahlweni a wa ehansi a khongela leswaku loko swi nga endleka, nkarhi wolowo wu hundza ekule na yena.

³⁶A ku: “Abba, Tatana! Hinkwaswo u nga swi endla; tshineta xinwelo lexi ekule na mina ntsena ku nga endliwi leswi ndzi swi rhandzaka, kambe a ku endliwe leswi rhandziwaka hi wena.”

³⁷Kutani a ta, a va kuma va etlele; a ku eka Petro: “Xana u etlele, Simoni? U tsandzekile ku hiteka na mina hi nkarhi wu ri wun'we xana?

³⁸Hitekani, mi khongela, leswaku mi nga ngheni emiringweni; hikuva moya wu ni mapfundzu, kambe nyama yi tsanile.”

³⁹Kutani a tlhela a ya khongela, a vula kukota eku sunguleni.

⁴⁰Kuteloko a vuya a va kuma va engete va etlela, hikuva mahlo ya vona a ma tika, kutani a va tivanga leswi va nga n'wi hlamulaka swona.

⁴¹Kutani a ta ra vunharhu, a ku eka vona: “Etlelani sweswi, mi wisa! Swi ringene! Nkarhi wu fikile. Vonani, N'wana wa Munhu u ta nyiketiwa emavokweni ya swidyohi.

⁴²Yimani, a hi yeni; vonani, la ndzi xengaka u kona ekusuhi.”

⁴³Hi nomu lowu, loko a ha vulavula, ku humelela Yudasi, un'wana wa lava khume na vambirhi, a ri ni ntlawa lowukulu wa lava hlomeke timpanga ni tinhonga, lowu rhumiweke hi vaprista lavakulu ni vatsari ni vakulukumba.

⁴⁴Kutani la n'wi xengaka a a va nyikile xikombiso, a ku: “Loyi ndzi nga ta n'wi ntswontswa, hi yena, n'wi khomeni mi famba na yena, swinene.”

⁴⁵Kuteloko a fika, a hatlisa a tshinelela Yesu, a ku: “Rabi! Rabi!” A n'wi ntswontswa.

⁴⁶Kutani va yisa mavoko ehenhla ka yena va n'wi khoma.

⁴⁷Kavaloko un'wana wa lava ngi va ri kona, a hlomula ripanga, a tsema nandza wa muprista lonkulu, a n'wi tsema ndleve.

⁴⁸Kambe Yesu a vulavula, a ku eka vona: “Mi humele ku ta ndzi khoma hi timpanga ni tinhonga, tanihi loko ngi ndzi ri khamba.

⁴⁹A ndzi ri karhi ndzi tshama na n'wina hi masiku hinkwawo, ndzi dyondzisa etempeleni, kambe a mi ndzi khomanga, kambe hi leswaku Matsalwa ma hetiseka.”

⁵⁰Kwalaho vadyondzisiwa hinkwavo va n'wi tshika va tsutsuma.

⁵¹Kambe jaha rin'wana a ri n'wi landza, ri funengele nkumba ntsena; kutani malandza ma n'wi khoma;

⁵²kavaloko yena a va tshiketela nkumba, a tsutsuma a nga ambalanga nchumu.

⁵³Kutani va yisa Yesu eka muprista lonkulu, vaprista lavakulu hinkwavo ni vakulukumba ni vatsari va hlengeletana kona.

⁵⁴Kutani Petro a n'wi landza a ri ekule, a nghena exivaveni xa muprista lonkulu, a tshamisa ni malandza, a orha ndzilo.

⁵⁵Vaprista lavakulu ni huvo hinkwayo va lava vumbhoni lebyi nga hehlaka Yesu, va ta n'wi dlaya; kambe a va byi kumanga.

⁵⁶Hikuva lavo tala a va n'wi hehla hi vunwa, kambe timhaka ta vumbhoni bya vona a ti nga pfumelelani.

⁵⁷Kutani van'wana va yima, va n'wi hehla hi ku hemba, va ku:

⁵⁸“Hi n'wi twile, a ku: ‘Ndzi ta hlanhla tempele leyi, leyi akiweke hi mavoko, ndzi ta aka yin'wana hi masiku manharhu, leyi nga endliwangiki hi mavoko.’ ”

⁵⁹Kambe, hambiswiritano, timhaka ta timbhoni leti, a ti nga pfumelelani.

⁶⁰Kutani muprista lonkulu a yima exikarhi ka vona, a vutisa Yesu, a ku: “Xana a ku hlamuri nchumu-ke? Hi yihi mhaka leyi va ku hehlaka ha yona, xana?”

⁶¹Kambe a miyela, a nga hlamuli nchumu. Muprista lonkulu a engeta a n'wi vutisa, a ku eka yena: “Xana hi wena Kriste, N'wana wa Xikwembu lexi vongiwaka xana?”

⁶²Yesu a ku: “Hi mina; kambe mi ta vona N'wana wa Munhu a tshamile evokweni ra xinene ra matimba ra Xikwembu, a ta hi mapapa ya le tilweni.”

⁶³Kwalaho muprista lonkulu a handzula tinguvu ta yena, a ku: “Ha ha lavela yini timbhoni?

⁶⁴Mi yingisile xisandzu; n'wina mi ri yini-ke?” Kutani hinkwavo va n'wi avanyisa, va ku: “U fanekele hi ku fa.”

⁶⁵Kutani van'wana va sungula ku n'wi tshwutela hi marhi, va n'wi funengeta emahlweni, va n'wi phakata marhama, va ku eka yena: “Bvumbha!” Kutani malandza ma n'wi amukela hi tinhonga.

⁶⁶Kakuloko Petro a ha ri ehansi exivaveni, ku ta nandza un'wana wa wansati wa muprista lonkulu;

⁶⁷kuteloko a vonile Petro a nyawuka a n'wi languta, a ku: “Na wena a wu ri na Yesu wa Nazareta.”

⁶⁸Kambe a landzula, a ku: “A ndzi swi twi, ni ku swi twisisa leswi u swi vulaka.” Kutani a humela ehandle, enyangweni; kwalaho nkuku wu ringa.

⁶⁹Kutani nandza loyi, loko a tlhela a n'wi vona, a sungula ku vulavula ni lava nga yima kwalaho, a ku: “Loyi, i wa vona.” Yena a engeta a landzula.

⁷⁰Kambe, ku nga ri kungani, lava yimeke kwalaho va ku eka Petro: “U wa vona kunene, hikuva na wena u Mugaleliya.”

⁷¹Kavaloko a sungula ku hlambanya hi ku tiyisa, a ku: “Munhu loyi mi n'wi vulaka, a ndzi n'wi tivi.”

⁷²Kutani nkuku wu ringa ra vumbirhi. Petro a tsundzuka rito leri Yesu a n'wi byeleke rona, hilaha a nga te: “Nkuku loko wu nga si ringa kambirhi, u ta va u ndzi landzurile kanharhu.” Kutani a huma ehandle a rila.