Read Xitsonga Mark 4 Bible Online

Mark 4 - Xitsonga bible

Mark 4

¹Yesu a engeta a dyondzisa ekusuhi ni lwandle, kutani vunyingi lebyikulu byi hlengeletana eka yena; kutani a nghena ebyatsweni, a tshamisa eka byona elwandle; loko va ri vanhu hinkwavo, va tshama eribuwini ra lwandle.

²Kutani a va dyondzisa timhaka leto tala hi swifaniso, eku dyondziseni ka yena a va byela, a ku:

³“Yingisani! Muhaxi u humile ku ya haxa.

⁴Loko a ri karhi a haxa, timbewu tin'wana ti wela endleleni, kutani tinyanyana ti ta, ti dya, ti heta.

⁵Timbewu tin'wana ti wela emaribyeni, laha ku nga riki na misava leyo tala, kutani ti hatlisa ti mila, hikuva misava a yi nga entanga.

⁶Kambe dyambu loko ri tlhava, swimila swi vuna, kutani swi oma hi ku pfumala timitsu.

⁷Tin'wana timbewu ti wela emitweni, yona mitwa loko yi kula yi ti dlaya kutani ti tsandzeka ku veka mavele.

⁸Tin'wana ti wela emisaveni leyo saseka, ti mila, ti kula, ti veka mihandzu; yin'wana yi chela makume manharhu, yin'wana ntlhanu wa makume na khume rin'we, yin'wana dzana.”

⁹Kutani a ku: “La nga ni tindleve ku yingisa, a a yingise.”

¹⁰Kuteloko a ri enhlambulo, lava ngi va ri na yena, ni lava khume na vambirhi, va n'wi vutisa xifaniso lexi.

¹¹Kutani a ku eka vona: “N'wina mi nyikiwile ku tiva swihundla swa ku fuma ka Xikwembu, kasi eka lava nga ehandle, hinkwaswo swi humelela hi swifaniso;

¹²swi ri leswaku hambi ku ri ku vona, va vona, kambe va nga vonisisi; hambi ku ri ku yingisa, va yingisa, kambe va nga twisisi; leswaku va nga tshuki va hundzuka, kutani va rivaleriwa swidyoho.”

¹³A engeta a ku eka vona: “Xana a mi twisisi xifaniso lexi xana? Loko swi ri tano, mi ta twisisa ku yini swifaniso hinkwaswo.

¹⁴“Muhaxi a haxa rito.

¹⁵Lava nga ekusuhi ni ndlela, laha rito ri byariwaka kona, hi lava loko va ri twile, Satana a hatlisaka a ta eka vona, a va tekela rito leri byariweke etimbilwini ta vona.

¹⁶Swi tano ni lava byariweke emaribyeni, hi lava ku nge loko va twile rito, va hatlisaka va ri amukela hi ku tsaka;

¹⁷kambe va nga ri na timitsu eka vona, a va ri va nkarhi wu nga ri wungani ntsena, kutakuloko khombo ni ku xaniseka swi va humelela hikwalaho ka rito, va hatlisa va khunguvanyeka.

¹⁸Lava byariweke emitweni, hi lava twaka rito;

¹⁹kambe ku vilela hi swa misava leyi, ni ku xisiwa hi rifuwo, ni ku navela ka swilo swin'wana, ku nghena eka vona ku tsondzela rito, kutani ri nyumba.

²⁰Lava byariweke emisaveni leyo saseka, hi lava twaka rito, va ri amukela, kutani va veka mihandzu; mbewu yin'wana yi chela makume manharhu, yin'wana ntlhanu wa makume na khume rin'we, yin'wana dzana.”

²¹A engeta a ku eka vona: “Xana rivoningo ri tisiwa leswaku ri vekiwa ehansi ka xirhundzu, kumbe hansi ka xilawu xana? A hileswaku ri tlhomiwa ekandelarini xana?

²²Hikuva a ku na xilo lexi nga exihundleni, lexi nga tiki vonakarisiwa; kambe a ku na xilo lexi fihliweke lexi nga tiki taka eku vonakaleni.

²³Loko munhu a ri ni tindleve ku yingisa, a a yingise.”

²⁴A engeta a ku eka vona: “Xiyani leswi mi swi yingisaka: Mpimo lowu mi pimaka ha wona, na n'wina mi ta pimeriwa ha wona, kutani ku ta engeteriwa n'wina mi yingisaka.

²⁵Hikuva la nga ni xilo u ta engeta a nyikiwa, kasi la nga riki na nchumu xilo lexi a nga na xona, u ta tekeriwa xona.”

²⁶A engeta a ku: “Ku fuma ka Xikwembu ku fana ni munhu la byaleke mbewu ensin'wini;

²⁷kutani hambi a etlele, hambi a pfukile nhlekanhi ni vusiku, mbewu yi tlhava yi kula hilaha a nga tiviki hakona.

²⁸Hikuva misava yi rhanga yi mirisa yi ri yona xikhava, kutani yi humesa n'oko, kutani ku huma tinhlampfu leti vupfeke n'okweni;

²⁹kutani mavele, loko ma vupfile, va hatlisa va nghenisa rihwevo, hikuva ku tshovela ku fikile.”

³⁰A engeta kambe, a ku: “Ku fuma ka Xikwembu hi ta ku fanisa ha yini? Hi ta ku fanisa hi xifaniso xihi?

³¹Ku fana ni nhlampfu ya sinapi; kakuloko yi byariwile emisaveni, yi nga yona leyitsongo eka timbewu hinkwato ta misava;

³²kuteloko yi byariwile, yi kula, kutani yi tlula mirhi hinkwayo hi ku kula, yi va ni marhavi lamakulu leswaku tinyanyana ta le tilweni ti nga aka endzhutini wa yona.”

³³Hi swifaniso leswo tala leswo tano, a va dyondzisa rito hilaha va nga swi kotaka ku ri twisisa hakona.

³⁴A nga vulanga mhaka loko ku nga ri hi xifaniso; kutani loko va ri enhlambulo, a hlamusela vadyondzisiwa va yena timhaka hinkwato.

³⁵Hi siku rero, loko ma ri madyambu, a ku eka vona: “A hi peleleni ehase.”

³⁶Kuteloko va tlherisile ntshungu, va n'wi teka hi byatso lebyi va nga eka byona: kambe mabyatso man'wana a ma ri kona.

³⁷Kutani ku pfuka xidzedze lexikulu; magandlati ma nghena ebyatsweni, byi ko byi lava ku tala;

³⁸yena a a ri exihondzweni, a etlele exiseketelweni. Kutani va n'wi pfuxa, va ku eka yena: “Mufundhisi, xana a hi nchumu eka wena loko hi lova xana?”

³⁹Kutani a pfuka, a tshinya mheho, a ku eka lwandle: “Miyela, u ku ntsee!” Kutani mheho yi miyela, ni ku rhula lokukulu ku va kona.

⁴⁰Kutani a ku eka vona: “Mi ni vutoya ha yini swonghasi-ke? Mi pfumala ha yini ku pfumela?”

⁴¹Kutani va chava hi ku chava lokukulu, va byelana, va ku: “Xana loyi i munhu lowo yini, leswi mheho na rona lwandle swi n'wi yingisaka-ke?”