Read Xitsonga Mark 5 Bible Online

Mark 5 - Xitsonga bible

Mark 5

¹Kutani va fika entsungeni wa lwandle, etikweni ra Vagadara.

²Kuteloko a ha ku huma ebyatsweni, munhu loyi ingi a ri ni moya wa thyaka, la humaka emasirheni, a hatlisa a hlangana na yena.

³A a tshama emasirheni; kambe a ku nga ri na munhu la kotaka ku n'wi boha, hambi ku ri hi timpecana,

⁴hikuva a bohiwile hakanyingi hi khotso ni timpecana, kambe a tshovile khotso, a tsemile timpecana, kutani a ku nga ri na munhu la swi kotaka ku n'wi hlula.

⁵Hi masiku hinkwawo, vusiku ni nhlekanhi, a a tshama etintshaveni ni le masirheni, a ri karhi a huwelela, a tikhandla hi maribye.

⁶Kuteloko a vonile Yesu, a ha ri ekule, a tsutsuma a ya n'wi khinsamela.

⁷Kutani a huwelela hi rito lerikulu, a ku: “Mhaka ya wena na mina hi yihi Yesu, N'wana wa Xikwembu xa le henhla? Ndza ku hlambanyela hi Xikwembu leswaku u nga tshuki u ndzi xanisa.”

⁸Hikuva Yesu a a te eka yena: “Huma eka munhu loyi, we moya wa thyaka.”

⁹Kutani a vutisa, a ku: “Vito ra wena u mani?” Wu hlamula wu ku: “Vito ra mina ndzi Vandla, hikuva hi tele.”

¹⁰Kutani a n'wi khongela ngopfu leswaku a nga tshuki a n'wi hlongolela ehandle ka tiko rero.

¹¹Kambe ntlhambi lowukulu wa tinguluve a wu ri kona kwalaho etintshaveni wu dya;

¹²kutani mademona hinkwawo ma n'wi khongela, ma ku: “Wa nga hi rhumela etingulubyeni hi nghena eka tona.”

¹³Yesu a hatlisa a ma pfumelela. Kavaloko mimoya yoleyo ya thyaka yi nghena etingulubyeni, kutani ntlhambi wu tsutsumela hi matimba eriweni, wu tihoxa elwandle; (ti lave ku va makume mambirhi ya madzana), kutani ti nwela elwandle.

¹⁴Lava ngi va risa tinguluve va tsutsuma va ya byela va muti ni va le masin'wini, kutani volavo va huma, va ya vona leswi humeleleke.

¹⁵Kuteloko va fikile eka Yesu, va vona loyi ingi a ri ni vandla ra mademona a tshamile, a ambele, a ri munhu, kutani va chava ngopfu.

¹⁶Lava swi voneke va va byela leswi humeleleke eka munhu loyi ingi a ri ni mademona ni swa tinguluve.

¹⁷Kutani va sungula ku khongela Yesu leswaku a suka etikweni ra vona.

¹⁸Yesu loko a nghenile ebyatsweni munhu loyi ingi a ri ni mademona a n'wi khongela leswaku a n'wi pfumelela ku tshama na yena.

¹⁹Kambe Yesu a nga n'wi pfumelelanga, ntsena a ku eka yena: “Famba eka rikwenu ni ka vamakwenu, u ya va tivisa hinkwaswo leswi Hosi yi ku endleleke swona, ni hilaha yi ku tweleke vusiwana hakona.”

²⁰Kavaloko a suka, a sungula ku twarisa etikweni ra Dekapolisi hinkwaswo leswi a swi endleriweke hi Yesu; kutani hinkwavo va hlamala.

²¹Kuteloko Yesu a pelerile entsungeni hi byatso, ntshungu lowukulu wu hlengeletana eka yena; kambe a a ri ekusuhi ni lwandle.

²²Kutani ku fika munhu loyi a vuriwaka Yayiro, un'wana wa tihosi ta sinagoga; kakuloko a vona Yesu, a tiwisa emilengeni ya yena,

²³a n'wi khongela ngopfu, a ku: “N'wananga wa fa, wanga ta u n'wi tlhandleka mavoko ehenhla, a ta pfuniwa, a hanya.”

²⁴Yesu a ya na yena; kutani ntshungu lowukulu wu n'wi landzela, wu ko wu n'wi kamanyeta.

²⁵Kambe wansati loyi ingi a ri ni vuvabyi bya switlhandla hi malembe ya khume na mambirhi,

²⁶loyi ingi a xanisiwile emavokweni ya tin'anga leto tala, a hetile xuma xa yena hinkwaxo, kambe a nga pfuniwanga ha nchumu, vuvabyi byi engeteleka;

²⁷kakuloko a twa timhaka ta Yesu, a ya entshungwini, a nghena hi le ndzhaku, kutani a khumba nguvu ya yena, hikuva a ku:

²⁸“Hambi ndzi nga khumba nguvu ya yena ntsena, ndzi ta hanya.”

²⁹Kutani hi nomu lowu, ngati ya yena yi siveka, a titwa emirini wa yena leswaku vuvabyi bya yena byi herile.

³⁰Kambe Yesu u swi tivile leswaku matimba man'wana a ma humile eka yena, kutani a hundzulukela eka ntshungu, a ku: “I mani la khumbeke nguvu ya mina?”

³¹Vadyondzisiwa va yena va ku eka yena: “A ku voni leswaku ntshungu wa ku kamanyeta, u vutisela yini leswaku ndzi khumbe hi mani xana?”

³²Yena a rhalarhala hinkwako ku vona loyi a swi endleke.

³³Kutani wansati a khomiwa hi ku chava, a ri karhi a rhurhumela hi ku tiva leswi endliweke emirini wa yena, kutani a ta, a n'wi khinsamela, a n'wi byela swinene hinkwaswo.

³⁴Yesu a ku eka yena: “N'wananga, ku pfumela ka wena ku ku hanyisile, famba hi ku tsaka, u hanyisiwile evuvabyini bya wena.”

³⁵A ku a ha vulavula, vanhu lava humaka eka hosana ya sinagoga va fika, va ku: “N'wanaku u file, wa ha karhatela yini mufundhisi?”

³⁶Kambe Yesu, kakuloko a twa leswi vuriwaka, a ku eka hosana ya sinagoga: “U nga chavi, pfumela ntsena.”

³⁷Kutani a nga pfumelelanga munhu ku n'wi landza, loko a nga ri Petro, na Yakobo, na Yohane, makwa Yakobo.

³⁸Kuteloko a fike endlwini ya hosana ya sinagoga, a vona pongo, ni lava rilaka, va bongosaka ngopfu.

³⁹Kuteloko a nghenile, a ku eka vona: “Mi endlela yini pongo leri, mi rilela yini? Nhwanyana loyi, a nga fanga, kambe u etlele.”

⁴⁰Kutani va n'wi hleka; kambe Yesu a va humesela ehandle hinkwavo, a teka tata wa nhwanyana ni mana wa yena, ni lava teke na yena, kutani a nghena laha nhwanyana a latiweke kona.

⁴¹Kutani a khoma voko ra nhwanyana, a ku eka yena: “Talita, kumi!” hileswaku: “Nhwanyana, ndzi ri eka wena: Pfuka!”

⁴²Kutani nhwanyana a hatla a pfuka, a tifambela, hikuva malembe ya yena a ma ri khume na mambirhi kutani va hlamala ngopfu.

⁴³Kambe Yesu a va laya swinene leswaku swi nga tshuki swi tiviwa hi munhu; kutani a ku: “N'wi nyikeni swakudya.”