Read Xitsonga Mark 6 Bible Online

Mark 6 - Xitsonga bible

Mark 6

¹Yesu a suka kwalaho, a tlhelela etikweni ra rikwavo, kutani vadyondzisiwa va yena va n'wi landza.

²Siku ra Savata loko ri fikile, a sungula ku dyondzisa esinagogeni, kutani lavo tala lava n'wi yingisaka, va hlamala, va ku: “Timhaka leti, u ti kume kwihi? U nyikisiwe ku yini vutlhari lebyo tano ni masingita layonghasi lama endliwaka hi mavoko ya yena xana?

³Xana yeloyi a hi yena muvatli, n'wana Mariya, makwa Yakobo, na Yose, na Yuda, na Simoni xana? Xana vamakwavo va xisati a va kona kwala eka hina-ke?” Kutani va khunguvanyeka ha yena.

⁴Kambe Yesu a ku eka vona: “Muprofeta a nga soriwi loko ku nga ri etikweni ra rikwavo, ni le maxakeni ya yena.”

⁵Hikwalaho a tsandzeka ku endla masingita kona, loko ku nga ri ku hanyisa lava vabyaka va nga ri vangani, hi ku va tlhandleka mavoko henhla.

⁶Kambe a hlamala hi ku ka va nga pfumeri. Kutani a tifambela emitini leyi nga etlhelweni, a ri karhi a dyondzisa.

⁷A vitana lava khume na vambirhi a sungula ku va rhuma ha vambirhimbirhi, a va nyika matimba yo hlula mimoya ya thyaka.

⁸A va lerisa leswaku va nga tshuki va tamela nchumu endleleni, loko yi nga ri nhonga ntsena; va nga teki timbuva ni nkwama, hambi yi ri mali eswifungheni swa vona;

⁹ntsena va vehela tintanghu, kambe va nga ambali tinguvu timbirhi.

¹⁰A engeta a ku eka vona: Hinkwako laha mi nga ta nghena endlwini tshamani kona, mi ko mi suka emutini lowo.

¹¹Kutani hinkwavo lava alaka ku mi amukela ni ku mi yingisa loko mi huma eka vona, mi phumunha ntshuri lowu nga emilengeni ya n'wina, byi va vumbhoni eka vona. Kunene, ndza mi byela, ndzi ri: Sodoma na Gomora va ta twa ku olova ku tlurisa muti wolowo hi siku ra ku avanyisa.

¹²Kuteloko va sukile va famba va ri karhi va dyondzisa vanhu leswaku va hundzuka.

¹³Va hlongola mademona layo tala, va tota hi mafurha lava vabyaka lavo tala, va va hanyisa.

¹⁴Kute hosi Heroda, loko a twile timhaka ta Yesu (hikuva vito ra yena a ri twakala ngopfu), a ku: “I Yohane Mukhuvuri u pfukile eku feni”; hikwalaho a nga ni matimba ya ku endla masingita.

¹⁵Van'wana va ku: “I Eliya”; van'wana va ku: “I muprofeta, kumbe un'wana wa vaprofeta.”

¹⁶Kambe Heroda, loko a swi yingisa, a ku: “I Yohane loyi ndzi n'wi tsemeke nhloko, u pfukile eku feni.”

¹⁷Hikuva Heroda yeloyi, a a rhumile vanhu ku khoma Yohane, a va a n'wi boha ekhotsweni, hikwalaho ka Herodiya, nsati wa Filipi makwavo, hikuva a a n'wi tekile;

¹⁸hikuva Yohane a a tshama a ku eka Heroda: “A swi ku faneri ku va ni nsati wa makwenu.”

¹⁹Herodiya a a venga Yohane hakona, a rhandza ku n'wi dlaya, kambe a a tsandzeka,

²⁰hikuva Heroda a a chava Yohane, hi ku n'wi tiva leswaku i munhu la lulameke, la kwetsimaka; kambe a a n'wi sirhelela, a endla leswo tala hi ku kombisiwa hi yena, a rhandza ni ku n'wi yingisa.

²¹Kambe siku rinene ri fika, loko Heroda a endlela tihosana ta yena ni tindhuna ta nyimpi ni vakulukumba va Galeliya nkhuvo wa siku ra ku velekiwa ka yena.

²²Kavaloko n'wana Herodiya yeloyi a nghena a cina, a tsakisa Heroda ni lava tshameke eswakudyeni na yena. Kutani hosi yi ku eka wanhwana: “Kombela hinkwaswo leswi u swi rhandzaka, ndzi ta ku nyika swona.”

²³A engeta a n'wi hlambanyela, a ku: “Leswi u nga swi kombelaka, ndzi ta ku nyika swona hambi ku ri ku ku avanyisela ku fuma ka mina hi le xikarhi.”

²⁴Kutani wanhwana a huma, a ku eka mana wa yena: “Ndzi ta kombela yini xana?” Yeloyi a ku: “Kombela nhloko ya Yohane Mukhuvuri.”

²⁵Kutani a hatla a nghena hi mapfundzu eka hosi, a kombela, a ku: “Ndzi rhandza ku nyikiwa hi wena sweswi enkambeni, nhloko ya Yohane Mukhuvuri.”

²⁶Hosi yi khomiwa hi tingana ngopfu, kambe yi chava ku n'wi alela hikwalaho ka ku hlambanya ka yena, ni hikwalaho ka lava tshameke eswakudyeni.

²⁷Kutani a hatla a rhuma nhenha, a lerisa leswaku ku nehiwa nhloko ya Yohane.

²⁸Kutani nhenha yi ya, yi n'wi tsema nhloko ekhotsweni, yi neha nhloko hi nkamba, yi yi nyika wanhwana; yena wanhwana a yi nyika mana wa Yena.

²⁹Kutani vadyondzisiwa va Yohane, loko va swi twa, va ya teka ntsumbu wa yena, va ya wu lahla esirheni.

³⁰Kutani vaapostola va hlengeletana eka Yesu, va n'wi byela hinkwaswo leswi va swi endleke, ni leti va ti dyondziseke.

³¹Yena a va byela, a ku: “Tanani n'wina swenu laha ku tengeleleke, mi wisa kutsongo,” hikuva lavo tala a va ha ta, van'wana va tlhela, kutani vaapostola a va nga ri na nkarhi wa ku dya.

³²Kavaloko va nghena ebyatsweni, va ya emananga va ri swavo.

³³Kambe vunyingi byi va vona loko va famba, ni ku n'wi tiva, kutani va tsutsumela eka yena, va huma hi milenge emitini hinkwayo, va rhangela Yesu ni vaapostola.

³⁴Kuteloko Yesu a huma ebyatsweni, a vona vunyingi lebyikulu, a va twela vusiwana, hikuva a va fana ni tinyimpfu leti nga riki na murisi; kutani a sungula ku va dyondzisa timhaka leto tala.

³⁵Dyambu loko ri rhengile, vadyondzisiwa va yena va n'wi tshinelela, va ku: “Lomu i mananga, kambe ri perile;

³⁶va tlherise va ya emasin'wini, ni le mitini leyi hi rhendzeleke, va ya tixavela swakudya, hikuva a va na swakudya.”

³⁷A hlamula a ku eka vona: “Va phameleni mi ri n'wina!” Va ku eka yena: “Xana u ri, a hi ye hi ya va xavela swinkwa swa tidenari ta madzana mambirhi, hi ta va phamela xana?”

³⁸Yena a ku eka vona: “Mi ni swinkwa swingani? Yanani mi ya languta.” Kuteloko va swi vonile, va ku: “I ntlhanu, ni tinhlampfi timbirhi.”

³⁹Kutani a va lerisa ku tshamisisa vanhu hinkwavo hi mitlawatlawa ebyanyini lebya rilambyana.

⁴⁰Kutani va tshama va avene hi mitlawatlawa ya dzana, ni ya ntlhanu wa makume.

⁴¹Yesu, kuteloko a tekile swinkwa swa ntlhanu ni tinhlampfi timbirhi, a languta ehenhla, a khensa, kutani a phema swinkwa a nyika vadyondzisiwa va yena leswaku va nyiketela vanhu, ni tinhlampfi timbirhi, a ti avela hinkwavo.

⁴²Va dya hinkwavo, va xurha.

⁴³Kutani va teka swirhundzu swa khume na swimbirhi leswi teleke hi mahlanhla ni swihlubyana swa tinhlampfi.

⁴⁴Lava dyeke swinkwa a va lava ku endla vavanuna va ntlhanu wa makume ya madzana (5 000).

⁴⁵Kutani Yesu a hatlisa a hluhlurheta vadyondzisiwa va yena leswaku va nghena ebyatsweni, va n'wi rhangela entsungeni, hitlhelo ra Betsayida loko yena a ha ta tlherisa vunyingi.

⁴⁶Kuteloko a va tlherisile, a ya khongela entshaveni.

⁴⁷Loko byi ri vusiku, byatso a byi ri exikarhi ka lwandle, yena a ha ri entsungeni wa hase a le swakwe.

⁴⁸Kutani a va vona va karhateka ngopfu hi ku tluta, hikuva moya a wu va alela; kuteloko ku lava ku va nkarhi wa ku langutela ka vumune wa vusiku, a ta eka vona a ri karhi a famba ehenhla ka lwandle, onge u va hundzela emahlweni.

⁴⁹Kambe loko va n'wi vona a famba ehenhla ka lwandle, va anakanya leswaku i xipuku, kutani va huwelela,

⁵⁰hikuva va n'wi vonile hinkwavo, va tshukile; kambe a hatlisa a vulavula na vona, a ku eka vona: “Tiyisani timbilu, hi mina mi nga chaveni!”

⁵¹Kutani a nghena eka vona ebyatsweni, kavaloko moya wu miyela, kutani va hlamala hi ku tlurisa;

⁵²hikuva a va nga xiyanga masingita ya swinkwa, hikuva timbilu ta vona a ti ri leto nonon'hwa.

⁵³Kuteloko va tlutile elwandle va kongoma tiko ra Genesareta, kutani va fika eribuwini.

⁵⁴Kuteloko va humile ebyatsweni, vanhu va kona va hatlisa va n'wi tiva,

⁵⁵va tsutsuma etikweni lero hinkwaro, va sungula ku tisa lava vabyaka hi masangu ya vona hinkwako laha va twaka leswaku u kona.

⁵⁶Kambe hinkwako laha a nghenaka kona, emitaneni ni le mitini, ni le masin'wini, a va veka lava vabyaka emitsendzeleni, kutani va n'wi khongela leswaku a va pfumelela ku khumba ni loko ma ri makumu ka nguvu ya yena; kutani hinkwavo lava yi khumbeke va hanyisiwa.