Read Xitsonga Mark 7 Bible Online

Mark 7 - Xitsonga bible

Mark 7

¹Vafarisi ni vatsari van'wana lava humaka eYerusalema, va hlengeletana eka Yesu,

²kutani va vona vadyondzisiwa va yena van'wana va dya xinkwa hi mavoko ya thyaka, hi leswaku lama nga hlantswiwangiki, va va sola.

³Hikuva Vafarisi ni Vayuda hinkwavo a va nga dyi va nga si hlamba mavoko kanyingi, ku hlayisa mikhuva ya vakulukumba va khale.

⁴Kambe loko va huma ehubyeni a va dyi va nga si hlamba; kambe ka ha ri ni mikhuva leyo tala yin'wana leyi va nga yi amukela ku yi hlayisa, tanihi ya ku hlantswa tindyelo, ni timbita, ni mikambana ya koporo.

⁵Vafarisi ni vatsari va n'wi vutisa hakona, va ku: “Xana vadyondzisiwa va wena a va yi ha yini hi mikhuva ya vakulukumba, va dya swinkwa hi mavoko lama nga basangiki?”

⁶A va hlamula, a ku: “Esaya u mi profetele swinene n'wina vamanyunyu, hilaha ku tsariweke leswaku: ‘Tiko leri, ri ndzi chava hi milomu, kambe timbilu ta vona ti le kule na mina.

⁷Kambe va ndzi khinsamela swahava loko va dyondzisa tidyondzo leti, yi nga milawu ya vanhu.’

⁸Hikuva hi ku tshika nawu wa Xikwembu, mi hlayisa mikhuva ya vanhu leyi va yi nyikanaka ku nga ku hlantswa timbita ni mindzheko ni ku endla swilo leswo tala leswo tano.”

⁹Kutani a ku eka vona: “Mi herisa nawu wa Xikwembu, kambe mi hlayisa mikhuva leyi mi yi nyikanaka.

¹⁰Hikuva Muxe u te: ‘U va ni xichavo eka tata wa wena ni mana wa wena’ kutani ‘la rhuketelaka tata wa yena hambi mana wa yena, u ta dlawa.’

¹¹Kasi n'wina mi ri: ‘A ku na nandzu, ni loko munhu a ku eka tata wa yena, kumbe eka mana wa yena: Hinkwaswo leswi ndzi nga ku pfunaka ha swona, i korbani,’ [hileswaku, nyiko leyi humeseriwaka Xikwembu],

¹²kutani a ma ha n'wi pfumeleri ku endlela tata wa yena kumbe mana wa yena nchumu;

¹³mi herisa sweswo rito ra Xikwembu hi mikhuva ya n'wina leyi mi yi nyikanaka; kutani mi endla ni swin'wana leswo tala leswo tano.”

¹⁴Kuteloko a vitanile vunyingi hinkwabyo eka yena, a ku eka vona: “Ndzi yingiseni hinkwenu, mi twisisa:

¹⁵A ku na nchumu ehandle ka munhu lowu kotaka ku n'wi nyamisa loko wu nghene eka yena, kambe leswi humaka eka munhu, hi swona leswi n'wi nyamisaka.

¹⁶Loko munhu a ri ni tindleve ku yingisa, a a yingise.”

¹⁷Kuteloko a nghenile endlwini a sukele vunyingi, vadyondzisiwa va yena va n'wi vutisa xifaniso lexi.

¹⁸Kutani a ku eka vona: “Hi leswaku na n'wina ma ha pfumala ku twisisa-ke? A mi swi tivi leswaku hinkwaswo leswi nga ehandle, loko swi nghena eka munhu, swi nga ka swi nga n'wi nyamisi,

¹⁹hikuva a swi ngheni embilwini ya yena, kambe swi ya ekhwirini, kutani swi humela enhoveni?” laha swakudya hinkwaswo swi basisiwaka kona.

²⁰Kutani a ku: “Leswi humaka eka munhu hi swona leswi nyamisaka munhu.

²¹Hikuva endzeni, etimbilwini ta vanhu, hilaha ku humaka miehleketo leyo biha, ni vuoswi, ni vugangu, ni ku dlaya,

²²ni ku yiva, ni ku navela rifuwo, ni lunya, ni ku xisa, ni ku titshika, ni mahlo layo biha, ni xisandzu, ni ku tikurisa, ni vuhunguki.

²³Ku biha kuloku hinkwako ku huma endzeni, kutani hi kona loku nyamisaka munhu.”

²⁴Loko a suka kwalaho, a ya etikweni ra Tiri na Sidoni, kutani a nghena endlwini yin'wana, a nga rhandzi ku tiviwa hi munhu, kambe a tsandzeka ku tifihla;

²⁵hikuva wansati loyi n'wana wa yena a ngheniweke hi moya wa thyaka, u n'wi twile leswaku u kona, kutani a ta a khinsama emilengeni ya yena.

²⁶Wansati loyi, a a ri Mugriki, wa rixaka ra Vasiro-Fenikiya; a n'wi khongela leswaku a hlongola demona ri huma eka n'wana wa yena.

²⁷Kambe Yesu a ku eka yena: “Tshika vana va rhanga va dya va xurha, hikuva a swi sasekanga ku tekela vana vuswa ku byi hoxela swimbyanyana.”

²⁸Yeloyi a hlamula, a ku eka Yesu: “Ina, Hosi! Hambiswiritano, timbyana ti dya mahlanhla ya vana ehansi ka tafula.”

²⁹Kavaloko a ku eka yena: “Hikwalaho ka rito leri, famba, demona ri humile eka n'wana wa wena.”

³⁰Kuteloko a fikile endlwini ya yena, a kuma demona ri humile, n'wana wa yena a etlele esangwini.

³¹A engeta a suka etikweni ra Tiri na Sidoni, a kongoma elwandle ra Galeliya, a tsemakanya tiko ra Dekapolisi.

³²Kutani va tisa eka yena munhu la feke tindleve, wa mbheveve va n'wi khongela leswaku a n'wi tlhandleka mavoko ehenhla.

³³Kuteloko a n'wi humesile entshungwini, a n'wi tekela etlhelo, a nghenisa tintiho etindleveni ta yena, a tshwutela marhi a khumba ririmi ra yena ha wona,

³⁴kutani a languta ehenhla, a hefemuteka, a ku: “Efata!” hileswaku, “Pfuleka!”

³⁵Kavaloko tindleve ta yena ti pfuleka kan'we, nsiha wa ririmi ra yena wu tshunxeka, kutani a vulavula swinene.

³⁶A va lerisa leswaku va nga byeli munhu; kambe, hambi a va lerisa ngopfu, ku va kona va swi hangalasaka hi ku tlurisa.

³⁷Kutani va hlamala ngopfu, va ku: “U endlile hinkwaswo swinene, u twisa lava nga twiki, u vulavurisa lava nga vulavuriki.”