Read Xitsonga Luke 10 Bible Online

Luke 10 - Xitsonga bible

Luke 10

¹Endzhaku ka sweswo, Hosi yi tlhela yi veka van'wana va ntlhanu wa makume na makume mambirhi, kutani yi va rhuma havambirhi leswaku va n'wi rhangela emahlweni, emitini hinkwayo ni matlhelo hinkwawo laha a nga ta famba kona.

²Hilaha a nga te eka vona: “Ku tshovela kukulu, kambe vatirhi, a hi vangani; khongelani-ke, Hosi ya ku tshovela, leswaku yi rhuma vatirhi eku tshoveleni ka yona.

³Fambani; ndza mi rhuma mi fana ni swinyimpfana exikarhi ka timhisi.

⁴Mi nga teki xinkwamana xa mali, ni loko wu ri nkwama, kumbe tintanghu; kutani mi nga xewetani na munhu endleleni.

⁵Loko yi ri yindlu yihi ni yihi leyi mi nghenaka eka yona, rhangani mi ku: ‘Ku rhula a ku ve ni yindlu leyi!’

⁶Kutani loko n'wana wa ku rhula a ri kona, ku rhula ka n'wina ku ta tshama eka yena; kambe loko a nga ri kona, ku ta tlhelela eka n'wina.

⁷Mi tshamisa endlwini yoleyo, mi ri karhi mi dya, mi nwa leswi mi nga ta nyikiwa swona hikuva la tirhaka u lulameriwe hi hakelo ya yena. Mi nga suki endlwini yin'wana ku ya endlwini yin'wana.

⁸“Kutani loko wu ri muti wihi ni wihi lowu mi nghenaka eka wona, loko va mi amukela, dyanani leswi vekiwaka emahlweni ka n'wina.

⁹Mi horisa lava vabyaka va kona mi va byela, mi ku: ‘Ku fuma ka Xikwembu ku mi tshinelele.’

¹⁰Kambe loko wu ri muti wihi ni wihi lowu mi nghenaka eka wona, kutani va nga mi amukeri, humelani emitsendzeleni, mi ku:

¹¹‘Ntshuri wa muti wa n'wina lowu hi namarheleke, hi wu phumunhela eka n'wina, hambiswiritano, tivani leswaku ku fuma ka Xikwembu ku mi tshinelele.’

¹²Ndza mi byela, leswaku hi siku lero, muti wolowo wu ta fikeriwa hi ku nonon'hwa loku tlurisaka ka Sodoma.

¹³“U ni khombo wena, Korazini! U ni khombo, wena, Betsayida! Hikuva masingita lama endliweke exikarhi ka n'wina, loko ngi ma endliwile eTiri na Sidoni, miti leyi, ingi yi tisorile khale hi tinguvu leti khwaxaka ni nkuma.

¹⁴Hikwalaho eku avanyisiweni, ku ta vevuka eka Tiri na Sidoni ku tlula eka n'wina.

¹⁵Na wena Kapernawume, la tlakusiweke ku fika etilweni, u ta tsongahatiwa ku fika etiheleni.

¹⁶La mi yingisaka, wa ndzi yingisa; la mi tshikaka, wa ndzi tshika: kutani la ndzi tshikaka, u tshika la ndzi rhumeke.”

¹⁷Lava ntlhanu wa makume na makume mambirhi va tlhela hi ku tsaka, va ku: “Hosi, na wona mademona ma hi yingisa hi vito ra wena.”

¹⁸Yena a ku eka vona: “A ndzi vona Satana a wa hi le tilweni tanihi rihati.

¹⁹Vonani, ndzi mi nyika matimba ya ku kandziya tinyoka ni swipame, ni le henhla ka matimba hinkwawo ya nala; kutani a ku na nchumu lowu nga ta mi endla swo biha.

²⁰Hambiswiritano, mi nga tsaki hi leswi mademona ma mi yingisaka; kambe tsakani hikuva mavito ya n'wina ma tsariwile etilweni.”

²¹Enkarhini wolowo, Yesu a tshukatshuka hi ku tsaka emoyeni wa yena a ku: “Ndza ku dzunisa Tatana, Hosi ya le tilweni ni ya misava, hikuva timhaka leti, u ti fihlele lavo tlhariha ni va mano, kambe u ti pfuletele lavatsongo. Ina, Tatana, swi tano, hikuva u swi rhandzise sweswo.

²²Kutani a hundzukela eka vadyondzisiwa va yena, a ku: Swilo hinkwaswo ndzi swi nyikiwile hi Tatana; kutani a ku na la tivaka leswaku Tatana i mani, loko a nga ri N'wana, ni loyi N'wana a nga swi rhandzaka ku n'wi pfuletela yena.”

²³Kutani a hundzukela eka vadyondzisiwa va yena, a ku eka vona va ri swavo: “Ma katekile mahlo lama vonaka leswi mi swi vonaka!

²⁴Hikuva ndzi ri eka n'wina: Vaprofeta lavo tala ni tihosi va rhandzile ku vona leswi mi swi vonaka, kambe a va swi vonanga; ni ku twa leswi mi swi twaka, kambe a va swi twanga.”

²⁵Kutani mufundhisi un'wana wa nawu a yima, a ku eka Yesu ku n'wi ringa: “Mufundhisi, ndzi ta endla yini ku va ni vutomi lebyi nga heriki?”

²⁶Yesu a ku eka yena: “Ku tsariwile yini enawini; u hlaya yini kona?”

²⁷A hlamula, a ku: “Rhandza Hosi, Xikwembu xa wena, hi mbilu hinkwayo ya wena, ni moya hinkwawo wa wena, ni matimba hinkwawo ya wena, ni ku anakanya hinkwako ka wena; ni warikwenu, u n'wi rhandza tanihi loko u tirhandza.”

²⁸Yesu a ku eka yena: “U hlamule swinene, endla swona, u ta hanya.”

²⁹Kambe yena, hikuva a rhandza ku tiendla la lulameke, a ku eka Yesu: “Warikwerhu i mani xana?”

³⁰Kutani Yesu a hlamula; a ku: “Munhu u sukile eYerusalema, a xikela eYeriko, kutani a wela emavokweni va swigevenga; swi n'wi tshunxisa swi n'wi boxa timbanga; kutani swi tifambela, swi n'wi siya a le kusuhi ni ku fa.

³¹Muprista a humelela, a rhelela hi ndlela yoleyo; kuteloko a n'wi vonile, a papalata.

³²Swi tano ni Mulevhi; na yena, kuteloko a fike kwalaho, a n'wi vona, a papalata.

³³Kambe Musamariya un'wana la endzaka, a ta kwalaho a nga kona, kuteloko a n'wi vonile, a n'wi twela vusiwana.

³⁴Kavaloko a tshinela, a n'wi bohelela timbanga, a chela mafurha ni vhinyo; a n'wi khandziyisa exifuweni xa yena lexi a xi khandziyeke, a n'wi yisa endlwini ya vaendzi, kutani a n'wi ongola kona.

³⁵Ni mixo, loko a suka, a humesa macheleni mambirhi, a nyika n'wini wa yindlu, a ku eka yena: ‘N'wi hlayise; hinkwaswo leswi u nga ta swi humesa ku tlurisa mali leyi, ndzi ta ku tlherisela swona siku ndzi vuyaka.’

³⁶I mani eka lavanharhu, la nga warikwavo wa munhu loyi a weleke exikarhi ka swigevenga xana?”

³⁷Yena a ku: “Hi loyi a n'wi endleke hi tintswalo.” Yesu a ku eka yena: “Famba, u endlisa sweswo na wena.”

³⁸Kakuloko va famba, a nghena emutini, kutani wansati la vuriwaka Marta a n'wi amukela endlwini ya yena.

³⁹A a ri ni makwavo loyi va nge i Mariya, la nga va a tshama emilengeni ya Yesu, a yingisa rito ra yena.

⁴⁰Kambe Marta a khomiwile ngopfu hi mitirho leyo tala. Kutani a ta eka Yesu, a ku: “Hosi, xana a hi nchumu eka wena loko makwerhu a ndzi tshika ndzi tirha ndzi ri swanga; a ku n'wi byeri leswaku a ndzi pfuna xana?”

⁴¹Kambe Yesu a n'wi hlamula, a ku eka yena: “Marta, Marta, u vilela ni ku tikarhata hi leswo tala;

⁴²kasi xilo lexi pfumariwaka i xin'we ntsena, kutani Mariya u tihlawulele ku averiwa loko saseka, loku a nga tiki tekeriwaka kona.”