Read Xitsonga Luke 18 Bible Online

Luke 18 - Xitsonga bible

Luke 18

¹Naswona, Yesu a va byela xifaniso ku kombisa leswaku vanhu va fanele ku khongela hi mikarhi hinkwayo, va nga tshuki va karhala.

²A ku: “Emutini wun'wana a ku ri ni muavanyisi loyi ngi a nga chavi Xikwembu, ni vanhu a a nga vuri nchumu ha vona.

³Kambe a ku ri ni wansati wa noni emutini wolowo la nga ta eka yena, a ku: ‘Ndzi avanyisela eka la ndzi tengisaka.’

⁴Kambe a ala hi masiku. Kambe ndzhaku a tianakanya, a ku: ‘Hambi ndzi nga chavi Xikwembu, ndzi nga vuri nchumu ha munhu;

⁵hambiswiritano, leswi noni leyi yi ndzi karhataka, ndzi ta n'wi avanyisela, a nga ha tshuki a tshama a ndzi pandzisa nhloko.’ ”

⁶Kutani hosi yi ku: “Yingisani lexi vuriwaka hi muavanyisi la nga lulamangiki.

⁷Loko xi ri Xikwembu, xana xi nga ka xi nga avanyiseri vahlawuriwa va xona, lava vitanaka eka xona nhlekanhi ni vusiku, hambi xi hlwela ku va rihisela xana?

⁸Ndzi ri eka n'wina, xi ta hatlisa xi va rihisela. Kambe, kutakuloko N'wana wa Munhu a ta, xana mi ehleketa leswaku u ta kuma ku pfumela ku ri kona emisaveni xana?”

⁹A engeta a byela xifaniso lexi eka van'wana lava titshembaka leswaku va lulamile, kambe va sandza van'wana, a ku:

¹⁰“Vanhu vambirhi va tlhandlukele etempeleni ku ya khongela. Un'wana a a ri Mufarisi, un'wana muluvisi.

¹¹Mufarisi a a yimile hitlhelo rin'wana a khongerisa sweswo, a ku: ‘Xikwembu, ndza ku khensa hikuva a ndzi fani na vanhu van'wana, va nga makhamba ni swidyohi ni vaoswi, ku kota munhu loyi wa muluvisi.

¹²Ndzi titsona swakudya kambirhi hi vhiki rin'wana ni rin'wana, ndzi humesa ku avanyisa ka khume ka swilo hinkwaswo leswi ndzi swi fuweke.’

¹³Kambe muluvisi a a yime ekule, a chava ni ku tlakusela mahlo ya yena etilweni; kambe a tiba xifuva, a ku: ‘Xikwembu, ndzi twele vusiwana, mina ndzi nga mudyohi.’

¹⁴Ndzi ri eka n'wina: Yeloyi, u ngirimele endlwini ya yena, a hlayiwile la lulameke ku tlula mufarisi; hikuva un'wana ni un'wana la titlakusaka u ta tsongahatiwa, kambe la titsongahataka, u ta tlakusiwa.”

¹⁵Kutani va n'wi tisela vana lavatsongo leswaku a va khumba; kambe vadyondzisiwa va yena, loko va swi vona, va va tshinya.

¹⁶Kambe Yesu a va vita, a ku: “Tshikani vana va ta eka mina, mi nga tshuki mi va sivela, hikuva ku fuma ka Xikwembu ku va eka lava fanaka na vona.

¹⁷Kunene ndzi ri eka n'wina, la nga amukeriki ku fuma ka Xikwembu kukotisa n'wana, a nga ka a nga ngheni kona.”

¹⁸Kutani hosana yin'wana yi n'wi vutisa, yi ku: “Mufundhisi lonene, ndzi ta endla yini ku va ni ndzhaka ya vutomi lebyi nga heriki?”

¹⁹Yesu a ku eka yena: “U ndzi vulela yini lonene? A ku na lonene loko a nga ri un'we ntsena, xi nga Xikwembu.

²⁰U tiva milawu leyi nge: ‘U nga tshuki u oswa; u nga dlayi, u nga yivi; u nga hembeli munhu, chava tata wa wena ni mana wa wena.’ ”

²¹Yena a ku: “Ndzi hlayisile leswo hinkwaswo, ndza ha ri ntsongo.”

²²Kuteloko Yesu a twa sweswo, a ku eka yena: “Wa ha pfumala xilo xin'we: Xavisa hinkwaswo leswi u nga na swona, u avela swisiwana, hi kona u nga ta va ni xuma etilweni; kutani u ta, u ndzi landzela.”

²³Kambe yena, loko a twa timhaka teto, a khomiwa hi tingana ngopfu, hikuva a a ri munhu wa rifuwo lerikulu.

²⁴Kuteloko Yesu a vonile leswaku a ni tingana, a ku: “Swa nonon'hwa eka lava nga ni rifuwo ku nghena eku fumeni ka Xikwembu.

²⁵Swi nga olova leswaku kamela yi nghena hi xuva ra neleta, ku tlula loko mufuwi a nghena eku fumeni ka Xikwembu.”

²⁶Lava swi twaka va ku: “Ku nga hlayiseka mani xana?”

²⁷Kutani a ku: “Leswi hlulaka vanhu, a swi hluri Xikwembu.”

²⁸Kavaloko Petro a ku: “Waswivo, hi tshikile hinkwaswo, hi ku landzela.”

²⁹Kutani a ku eka vona: “Kunene, ndzi ri eka n'wina: A ku na munhu la tshikeke yindlu, ni loko a ri nsati, hambi vamakwavo, kumbe vaveleki va yena, kumbe vana, hikwalaho ka ku fuma ka Xikwembu,

³⁰la nga taka a nga kumi ku tlurisa leswi emikarhini leyi, kutani emikarhini leyi taka u ta nyikiwa vutomi lebyi nga heriki.”

³¹Kutani a famba hitlhelo ni lava khume na vambirhi a va byela a ku: “Vonani, hi tlhandlukela eYerusalema, kutani hinkwaswo leswi tsariweke hi vaprofeta ehenhla ka N'wana wa Munhu swi ta hetiseka.

³²Hikuva u ta nyiketiwa vamatiko, va ta n'wi tseketsela, va n'wi sandza, va n'wi tshwutela hi marhi;

³³kutani, kutakuloko va n'wi bile hi mikhavi, va ta n'wi dlaya; kambe u ta pfuka hi siku ra vunharhu.”

³⁴Kambe, loko va ri vona, a va twisisanga nchumu etimhakeni teto; rito leri, a ri fihliwile eka vona, kutani a va ringanisanga leswi a swi vulaka.

³⁵Kakuloko a tshinelele eYeriko, munhu lowo fa mahlo a a tshamile endleleni a kombela.

³⁶Kuteloko a twa vunyingi byi hundza, a vutisa, a ku: “I yini?”

³⁷Va n'wi byela, va ku: “Yesu wa Nazareta la hundzaka.”

³⁸Kutani a huwelela, a ku: “Yesu, n'wana Davhida, ndzi twele vusiwana!”

³⁹Kutani lava rhangeke emahlweni va n'wi tshinya, va ku a miyela; kambe a engeta a huwelela hi matimba, a ku: “N'wana Davhida, ndzi twele vusiwana!”

⁴⁰Kutani Yesu a yima, a ku va n'wi tisa eka yena; kuteloko a ri ekusuhi, a n'wi vutisa, a ku:

⁴¹“U rhandza leswaku ndzi ku endlela yini xana?” A hlamula, a ku: “Hosi, ndzi ri, ndzi hanyanya.”

⁴²Yesu a ku eka yena: “Hanyanya; ku pfumela ka wena ku ku hanyisile.”

⁴³Kutani a vona kan'wekan'we; a n'wi landza, a ri karhi a dzunisa Xikwembu. Na vona vanhu hinkwavo lava nga swi vona, va dzunisa Xikwembu.