Read Xitsonga Luke 5 Bible Online

Luke 5 - Xitsonga bible

Luke 5

¹Kakuloko a yimile eribuwini ra tiva ra Genesareta, ntshungu wu n'wi susumeta ku yingisa rito ra Xikwembu;

²kutani a vona mabarika mambirhi ma yimile eribuwini ra tiva; vaphasi a va humile eka wona, va hlantswa tinkoka ta vona. A nghena eka rin'wana leri nga ra Simoni,

³kutani a n'wi kombela leswaku a ri tshineta kutsongo eribuwini; kutani loko a tshamile ebarikeni, a dyondzisa mitshungu.

⁴Kuteloko a hetile ku vulavula, a ku eka Simoni: “Tlutelani exidziveni, mi hoxa tinkoka ta n'wina, mi phasa.”

⁵Kambe Simoni a hlamula, a ku eka yena: “N'wini, hi tirhile vusiku hinkwabyo, byi ko byi xa, a hi phasanga nchumu; kambe hi ku vula ka wena, ndzi ta hoxa rikoka.”

⁶Va endlisa sweswo kutani va phasa tinhlampfi leto tala, rikoka ri ko ri handzuka.

⁷Kutani va koweta vanakulobye lava nga ebarikeni rin'wana leswaku va ta, va ta va pfuna. Vona va ta, kutani va tata mabarika mambirhi walawo ma ko ma lava ku mbombomela.

⁸Simoni Petro, kuteloko a swi vona, a khinsama emilengeni ya Yesu a ku eka yena: “Hosi, suka eka mina hikuva ndzi mudyohi.”

⁹A a vula sweswo, hikuva a a chava, swin'we ni hinkwavo lava ngi va ri na yena, hikwalaho ka ku phasa ka tinhlampfi leti; a swi ri tano na Yakobo na Yohane, vana va Zebediya, lava ngi va ri vanakulobye va Simoni.

¹⁰Kutani Yesu a ku eka Simoni: “U nga chavi, ku sungula sweswi, u ta va muphasi wa vanhu lava hanyaka.”

¹¹Kuteloko va tlherisile mabarika eribuwini, va siya hinkwaswo, va n'wi landza.

¹²Kakuloko a ri emutini wun'wana wanuna la teleke nhlokonho, loko a vona Yesu, a tiwisa ehansi emombyeni, a n'wi khongela, a ku: “Hosi, loko u swi rhandza, u nga ndzi basisa.”

¹³Yena a tshambuluta voko, a n'wi khumba, a ku: “Ndza swi rhandza, basisiwa!” Hi nomu lowu, nhlokonho yi suka eka yena.

¹⁴Kutani a n'wi lerisa, a ku: “U nga tshuki u byela munhu, kambe famba u ya tikombisa eka muprista, u khensa ku basisiwa ka wena hilaha Muxe a leriseke hakona, byi ta va vumbhoni eka vona.”

¹⁵Kutani ku twakala ka yena ku engeteleka ku hangalaka; vunyingi lebyikulu byi ta ku n'wi yingisela ni ku horisiwa hi yena mavabyi ya vona.

¹⁶Kambe yena a tiyela emananga, a ya khongela.

¹⁷Siku rin'wana, Yesu a a dyondzisa; Vafarisi ni vadyondzisi va nawu lava humeke emitini hinkwayo ya Galeliya na Yudiya na Yerusalema, a va ri kona; kutani matimba ya Hosi ma tikombisa ku va horisa.

¹⁸Kutani ku ta vavanuna lava rhwalaka hi masangu munhu la khwanyaleke swirho; va ringeta ku n'wi nghenisa endlwini ku n'wi veka emahlweni ka Yesu.

¹⁹Kakuloko va nga kumi hilaha va nga n'wi nghenisaka hakona hikwalaho ka vunyingi, va khandziya ehenhla ka yindlu, va n'wi nembeleta exikarhi emahlweni ka Yesu, a ri emasangwini ya yena.

²⁰Yesu, kuteloko a vona ku pfumela ka vona, a ku eka yena: “Munhu, u rivaleriwile swidyoho swa wena.”

²¹Kutani vatsari ni Vafarisi va sungula ku kanela etimbilwini ta vona, va ku: “Loyi, i mani, la vulaka swisandzu? I mani la nga rivalelaka munhu ku dyoha, loko xi nga ri Xikwembu ntsena?”

²²Kambe Yesu, hi ku tiva miehleketo ya vona, a va hlamula, a ku: “Mi kanetela yini sweswo etimbilwini ta n'wina xana?

²³Xana loko ku ri ku vula: ‘U rivaleriwile swidyoho swa wena,’ kumbe: ‘Yima u famba,’ ku olova xihi xana?

²⁴Sweswi, mi ta tiva leswaku N'wana wa Munhu u ni matimba emisaveni ku rivalela vanhu swidyoho.” Kutani a ku eka la khwanyaleke swirho: “Ndzi ri eka wena: Yima, u teka masangu ya wena, u famba endlwini ya wena.”

²⁵Kutani a hatlisa a yima emahlweni ka vona, a teka masangu lawa a a etleleke eka wona, a tifambela endlwini ya yena, a ri karhi a dzunisa Xikwembu.

²⁶Kwalaho va hloleriwa hinkwavo, va dzunisa Xikwembu, va tala hi ku chava, va ku: “Namuntlha hi vonile swihlamariso.”

²⁷Endzhaku ka swona, a huma, kutani a vona muluvisi lo va nge i Levhi, a tshamile endlwini ya ndzuvo, a ku eka yena: “Ndzi landze.”

²⁸Kutani yena a tshika hinkwaswo, a suka, a n'wi landza.

²⁹Kutani Levhi a n'wi endlela nkhuvo lowukulu endlwini ya yena, kambe a ku ri ni ntshungu lowukulu wa valuvisi ni wa van'wana lava tshameke na vona eswakudyeni.

³⁰Kutani vatsari ni Vafarisi va hleva, va ku eka vadyondzisiwa va yena: “Xana mi dyela yini ni valuvisi ni vadyohi, mi nwela yini na vona?”

³¹Yesu a va hlamula, a ku: “Lava hanyaka a va lavi n'anga, kambe yi laviwa hi lava vabyaka.

³²A ndzi telanga ku vitana lava lulameke eku hundzukeni, kambe vadyohi.”

³³Kutani va ku eka yena: “Xana vadyondzisiwa va Yohane va titsonela yini hakanyingi swakudya, va endlela yini ni swikhongelo; Vafarisi, na vona, va endlisela yini sweswo? Kasi vadyondzisiwa va wena va dya, va nwa?”

³⁴A ku eka vona: “Xana mi nga ku: ‘Vanakulobye va muteki va fanela ku titsona swakudya loko muteki a ha ri na vona’ xana?

³⁵Kambe nkarhi wa ta lowu muteki a nga ta susiwa eka vona, hi kona va nga ta titsona swakudya emikarhini yoleyo.”

³⁶A engeta a va byela xifaniso, a ku: “A ku na munhu la nga handzulaka xitiva eka nguvu leyintshwa, a xi rhungela eka leyi hlakaleke; loko va endlisa sweswo, lexintshwa xi ta handzula lexa khale, hikuva na xona xitiva lexintshwa a xi pfumelelani ni lexi hlakaleke.

³⁷A ku na munhu la chelaka vhinyo leyintshwa eminkwameni ya khale; hikuva vhinyo leyintshwa, yi nga handzula mikwama, yi halaka; mikwama na yona yi handzuka.

³⁸Kumbe vhinyo leyintshwa yi cheriwa eminkwameni leyintshwa kutani yi hlayisana swin'we na yona.

³⁹Kambe a ku na munhu, kungakuloko a nwile vhinyo ya khale, a nga hatlisaka a lava leyintshwa, hikuva u ta ku: ‘Ya khale yi tlula leyintshwa hi ku nandziha.’ ”