Read Xitsonga Deuteronomy 10 Bible Online

Deuteronomy 10 - Xitsonga bible

Deuteronomy 10

¹“Enkarhini wolowo Yehovha u te eka mina: ‘Tivatlele swimphampha swimbirhi swa maribye kukotisa leswo sungula, u ta khandziya ka mina entshaveni u tivatlela ni areka ya murhi.

²Ndzi ta tsala emaribyeni lawa, marito lama ngi ma ri emaribyeni layo sungula lawa u ma fayeke, kutani u ta ma veka earekeni.’

³Kavaloko ndzi endla areka hi murhi wa munga, kutani ndzi vatla maribye mambirhi kukotisa layo sungula, kutani ndzi khandziya entshaveni, ndzi tamele maribye lamambirhi evokweni ra mina.

⁴Yehovha a tsala emaribyeni leswi a swi tsaleke eka layo sungula, ma ri marito ya khume lawa Yehovha a ma vuleke entshaveni, a ri endzilweni, siku ra nhlengeletano; kutani Yehovha a ndzi nyika wona.

⁵Ndzi tlhela ndzi rhelela entshaveni kutani ndzi ya veka maribye earekeni leyi ndzi yi endleke, kambe ma tshamile kona hilaha Yehovha a ndzi leriseke hakona.”

⁶Kutani vana va Israele va suka exihlobyeni xa vana va Yakani ku ya eMosera. Aroni a fa kona, a lahliwa kona; kutani Eliyazara, n'wana wa yena, a tirha vuprista ematshan'weni ya yena.

⁷Va suka kona va ya eGudigoda, kutani va suka eGudigoda ku ya eYotibata, ri nga tiko ra milambu.

⁸Enkarhini wolowo, Yehovha a hlawula rixaka ra Levhi ku rhwala areka ya vumbhoni bya Yehovha, ni ku yima emahlweni ka Yehovha, ni ku n'wi tirhela, ni ku katekisa tiko hi vito ra yena, ku fika siku ra namuntlha.

⁹Hikwalaho, Levhi a nga na ku averiwa, ni ndzhaka kun'we ni vamakwavo; ndzhaka ya yena i Yehovha, hilaha Yehovha, Xikwembu xa wena, a n'wi byeleke hakona.

¹⁰“Loko ndzi ri mina, ndzi xwe entshaveni masiku ya 40, ni vusiku bya 40, kukotisa eku sunguleni. Yehovha u ndzi yingisile kambe enkarhini lowo, Yehovha a nga rhandzangi ku ku heta.

¹¹Yehovha a ku eka mina: ‘Pfuka, u famba ku ya rhangela tiko leri, va ta nghena va teka tiko leri ndzi hlambanyeleke vatata wa vona ku va nyika rona.’

¹²“Kutani sweswi, Israele, Yehovha Xikwembu xa wena, a lava yini eka wena-ke? A hileswaku u chava Yehovha, Xikwembu xa wena, u famba etindleleni hinkwato ta yena, u n'wi rhandza, u tirhela Yehovha, Xikwembu xa wena, hi mbilu hinkwayo ya wena, ni moya hinkwawo wa wena;

¹³u ri karhi u hlayisa milawu ya Yehovha ni ku lerisa ka yena, leswi ndzi ku leriseke namuntlha leswaku u tsaka?

¹⁴“Waswivo! Matilo, ni matilo ya matilo i ya Yehovha, swin'we ni misava, ni hinkwaswo leswi nga eka yona.

¹⁵Kambe Yehovha u namarhele vatata wa wena ntsena ku va rhandza; kutani u hlawurile vana va vona endzhaku ka vona, u hlawurile n'wina exikarhi ka matiko hinkwawo hilaha mi swi vonaka namuntlha.

¹⁶Yimbisani timbilu ta n'wina, mi nga ha nonon'hwisi mikolo ya n'wina;

¹⁷hikuva Yehovha, Xikwembu xa n'wina, Xikwembu xa swikwembu ni Hosi ya tihosi, i Xikwembu lexikulu, lexa matimba, ni lexi chavisaka, lexi nga yiki hi nghohe ya vanhu, lexi nga amukeriki tinyiko;

¹⁸lexi yingisaka timhaka ta xisiwana, ni ta noni; la rhandzaka muluveri, a n'wi nyika vuswa ni nguvu.

¹⁹Hikwalaho mi ta rhandza muluveri, hikuva a mi ri valuveri etikweni ra Egipta.

²⁰“U ta chava Yehovha, Xikwembu xa wena, u xi tirhela, u namarhela xona, u va u hlambanya hi vito ra xona.

²¹Ku dzuna ka wena, hi xona Xikwembu xa wena; hi xona lexi nga ku endlela timhaka letikulu ni leti chavisaka leti u ti voneke hi mahlo ya wena.

²²Vatata wa wena va rhelele Egipta va ri 70, kutani sweswi, Yehovha, Xikwembu xa wena, u ku andzisile kukotisa tinyeleti ta matilo.