Read Xitsonga Deuteronomy 11 Bible Online

Deuteronomy 11 - Xitsonga bible

Deuteronomy 11

¹“U ta rhandza Yehovha, Xikwembu xa wena, u va u hlayisa leswi a ku vekeleke swona, ti ri timhaka ta yena ni ku lerisa ka yena, ni milawu ya yena.

²Tivisisani namuntlha (kambe a ndzi vuli vana va n'wina lava nga tivangiki ni lava nga vonangiki ku laya ka Yehovha, Xikwembu xa n'wina), tivisisani vukulu bya yena, ni voko ra matimba ya yena, ni voko ra yena leri tlakukeke;

³ni masingita ya yena, ni mitirho ya yena; ni leswi a swi endleke exikarhi ka Egipta, eka Faro, hosi ya Egipta, ni le ka tiko hinkwaro ra yena;

⁴ni leswi a swi endleleke nyimpi ya Egipta, ni tihanci ta yona, ni tigolonyi ta yona, hilaha a nga khulukisa ehenhla ka vona mati ya Lwandle ro Tshwuka, loko va mi hlongorisa, kutani Yehovha a va heta ku fika namuntlha;

⁵ni leswi a mi endleleke emananga mi ko mi fika exivandleni lexi,

⁶ni leswi a swi endleleke Datani na Abirama, vana va Eliyabu, n'wana Rhuveni hilaha misava yi pfuleke nomu wa yona, yi va mita ni tindlu ta vona, ni mitsonga ya vona, ni hinkwaswo leswi va landzeke exikarhi ka Vaisraele hinkwavo.

⁷Hikuva mahlo ya n'wina ma vonile mitirho hinkwayo leyikulu leyi Yehovha a yi tirheke.

⁸“Mi ta hlayisa milawu hinkwayo leyi ndzi mi lerisaka namuntlha, mi ta va ni matimba, kutani mi ta nghena, mi teka tiko leri mi nga ta pelela eka rona ku ri fuma,

⁹mi ta lehisa masiku ya n'wina emisaveni leyi Yehovha a hlambanyeleke vatata wa n'wina ku yi nyika vona ni vatukulu va vona, yi nga misava leyi khulukaka ntswamba ni vulombe.

¹⁰“Hikuva tiko leri u nga ta nghena eka rona ku ri fuma, a ri fani ni ra Egipta, laha mi humeke kona, laha ngi u tshama u byala mbewu ya wena, kutani u cheleta nsimu ya wena hi nenge, kukotisa ntanga wa matsavu.

¹¹Tiko leri mi nga ta pelela eka rona, i tiko ra tintshava ni mikova, leri nwaka mati ya mpfula ya le tilweni.

¹²I tiko leri hlayisiwaka i Yehovha, Xikwembu xa wena; mahlo ya Yehovha ma tshama ma ri languta eku sunguleni ka lembe, ku fika eku heleni ka rona.

¹³“Kungakuloko mi yingisa swinene milawu ya mina leyi ndzi mi lerisaka namuntlha, mi va mi rhandza Yehovha, Xikwembu xa n'wina, mi n'wi tirhela hi timbilu hinkwato ta n'wina, ni mimoya hinkwayo ya n'wina,

¹⁴ndzi ta nyika tiko ra n'wina mpfula hi nkarhi wa yona, ti ri timpfula leto sungula, ni leto hetelela; u ta tshovela koro ya wena, ni vhinyo ya wena ni mafurha ya wena.

¹⁵Ndzi ta mirisa byanyi bya swifuwo swa wena enhoveni ya wena, kutani u ta dya, u xurha.

¹⁶“Tilanguteleni leswaku timbilu ta n'wina ti nga tshuki ti ringiwa, kutani mi hambuka, mi ya tirhela swikwembu swin'wana, mi khinsama emahlweni ka swona;

¹⁷hikuva vukari bya Yehovha byi ta mi pfurhela, u ta pfala tilo leswaku mpfula yi nga ha ni, na yona misava yi nga ha veki swa yona, kutani mi ta hatlisa ku fa emisaveni leyinene leyi Yehovha, Xikwembu xa n'wina, xi mi nyikaka yona.

¹⁸“Nghenisani marito lawa ndzi mi byelaka wona etimbilwini ta n'wina ni le mimoyeni ya n'wina; mi ya bohelela emavokweni ya n'wina xi va xitsundzuxo xa n'wina, ni xikombiso exikarhi ka mahlo ya n'wina,

¹⁹u ta ma dyondzisa vana va wena, u vulavula ha wona hambiloko u ri endlwini, ni le ku fambeni ka wena, ni loko u ya eku etleleni, ni loko u pfuka;

²⁰u ta ya tsala etinyangweni ta wena ni le timhandzeni ta yindlu ya wena,

²¹leswaku masiku ya n'wina ni masiku ya vana va n'wina ma tarisiwa etikweni leri Yehovha a hlambanyeleke vatata wa n'wina ku va nyika rona, ma fana ni masiku ya matilo lama nga ehenhla ka misava.

²²“Hikuva loko mi hlayisa swinene milawu hinkwayo leyi ndzi mi lerisaka yona, ni loko mi endla ha yona, mi va mi rhandza Yehovha, Xikwembu xa n'wina, mi famba etindleleni hinkwato ta yena, mi ri karhi mi n'wi namarhela,

²³Yehovha u ta hlongola matiko lawa hinkwawo emahlweni ka n'wina, kambe mi ta hlula matiko lama mi tlulaka hi vukulu ni matimba.

²⁴Xivandla hinkwaxo lexi nkondzo wa n'wina wu nga ta xi kandziya, xi ta va xa n'wina; ndzilakana wa n'wina wu ta suka emananga ku ya fika eLebanoni, ni ku suka enambyeni, enambyeni wa Yufrata, ku ya fika eLwandle ra Vupeladyambu.

²⁵Ku nga ka ku nga tiyi munhu ni un'we emahlweni ka n'wina; Yehovha u ta nghenisa xichavo ni ku rhurhumela hinkwako laha mi nga ta famba kona, hilaha a mi byeleke hakona.

²⁶“Languta, ndzi veka namuntlha ku kateka ni ku rhukana emahlweni ka n'wina:

²⁷Ku kateka, loko mi yingisa milawu ya Yehovha, Xikwembu xa n'wina, leyi ndzi mi lerisaka namuntlha,

²⁸ni ku rhukana loko mi nga yingisi milawu ya Yehovha, Xikwembu xa n'wina, ni loko mi hambuka endleleni leyi ndzi mi lerisaka namuntlha, ku landza swikwembu swin'wana leswi mi nga swi tivangiki.

²⁹Kutakuloko Yehovha, Xikwembu xa wena, xi ku nghenisile etikweni leri u yaka eka rona ku ri teka, u ta vula ku kateka entshaveni ya Gerizimi, ni ku rhukana entshaveni ya Ebali.

³⁰Tintshava leti, ti le hase ka Yordani, endzhaku ka ndlela ya vupeladyambu, etikweni ra Vakanana lava akeke enkoveni, ku langutana na Giligala, ekusuhi ni mikuhlu ya More.

³¹Hikuva mi ya pela Yordani ku ya teka tiko leri Yehovha, Xikwembu xa n'wina, xi mi nyikaka rona ku ri fuma, ni ku aka eka rona.

³²Mi ta chivirika ku hlayisa milawu hinkwayo ni ku lerisa hinkwako loku ndzi ku vekaka namuntlha emahlweni ka n'wina.