Read Xitsonga Deuteronomy 13 Bible Online

Deuteronomy 13 - Xitsonga bible

Deuteronomy 13

¹“Kungakuloko muprofeta kumbe mulorhi a tikurisa exikarhi ka n'wina kutani a ku bvumbhela xikombiso kumbe masingita,

²ni loko ku humelela xikombiso ni masingita leswi a ku byeleke loko a te: ‘A hi landzeni swikwembu swin'wana leswi,’ u nga swi tivangiki, ‘hi ta swi tirhela,’

³u nga tshuki u yingisa marito ya muprofeta loyi, ni ya mulorhi loyi, hikuva Yehovha, Xikwembu xa n'wina, a mi ringa ku tiva xana mi rhandza Yehovha, Xikwembu xa n'wina, hi timbilu hinkwato ta n'wina, ni mimoya hinkwayo ya n'wina.

⁴Mi ta landza Yehovha, Xikwembu xa n'wina; mi n'wi chava, mi hlayisa milawu ya yena, mi yingisa rito ra yena; mi n'wi tirhela, kambe mi n'wi namarhela.

⁵Muprofeta loyi, hambi mulorhi loyi, u ta dlawa hikuva u susumetile vanhu ku landzula Yehovha, Xikwembu xa n'wina (la mi humeseke etikweni ra Egipta, a va a mi kutsula endlwini ya vukhumbi), a lava ku ku hambukisa endleleni leyi Yehovha, Xikwembu xa wena, a ku leriseke ku famba ha yona, U ta susa lowo biha exikarhi ka n'wina.

⁶“Kungakuloko makwenu, a nga n'wana wa mana wa wena, kumbe n'wana wa wena wa wanuna, hambi wanhwana wa wena, hambi nsati wa mbilu ya wena, hambi nakuloni loyi u n'wi rhandzaka kukotisa mbilu ya wena, a ku kokela exihundleni, a ku: ‘A hi yeni hi ya tirhela swikwembu swin'wana,’ leswi wena ni vatata wa wena mi nga swi tivangiki,

⁷exikarhi ka swikwembu swa matiko lama mi rhendzelaka exikarhi, hambi ma ri ekusuhi na wena, hambi ma ri ekule na wena, ku suka emakun'wini man'wana ya misava ku fika emakun'wini man'wana,

⁸u nga tshuki u n'wi pfumelela, u nga tshuki u n'wi yingisa, tihlo ra wena ri nga tshuki ri n'wi tsetselela; u nga ka u nga n'wi tweli vusiwana, u nga ka u nga n'wi funengeti.

⁹Kambe u ta n'wi dlaya u nga kanakani; voko ra wena ri ta sungula ku n'wi dlaya, kutani mavoko ya tiko hinkwaro ma ta landza;

¹⁰u ta n'wi khandla hi maribye leswaku a fa; hikuva u lavile ku ku susumetela ekule na Yehovha, Xikwembu xa wena la ku humeseke etikweni ra Egipta, endlwini ya vukhumbi.

¹¹Vaisraele hinkwavo va ta swi twa, va ta chava, kutani va nga ka va nga sunguli kambe ku endla leswo biha leswo tano exikarhi ka n'wina.

¹²“Kungakuloko u yingisa timhaka ta wun'wana wa miti leyi Yehovha Xikwembu xa wena, a ku nyikaka ku aka kona; va te:

¹³‘Vanhu va hava va hume eka wena, va khunguvanyisile vaaki va muti wa vona va ku: “A hi yeni, hi ya tirhela swikwembu swin'wana,” ’ leswi mi nga swi tivangiki;

¹⁴u ta lavisa timhaka, u vutisisa swinene. Kutani waswivo! Loko mhaka hi yoleyo, yi tiyisiwile, leswo biha leswi, swi endliwile exikarhi ka wena;

¹⁵hi kona u nga ta dlaya kunene hi tlhari vaaki va muti lowo, u wu yirisa ni hinkwaswo leswi nga eka wona, u dlaya ni swifuwo swa wona hi tlhari.

¹⁶U ta hlengeleta rifuwo hinkwaro ra wona exivandleni xa muti, kutani u ta hisela Yehovha Xikwembu xa wena, muti ni rifuwo hinkwaro ra wona, ri ta va rhumbi hi masiku; wu nga ka wu nga akiwi kambe.

¹⁷Ku nga tshuki ku namarhela ni xilo xin'we xa leswo yila evokweni ra wena; leswaku Yehovha a vuyela evukarini bya yena, a ku twela vusiwana, a ku endlela hi musa kutani a ku andzisela hilaha a hlambanyeke hakona eka vatata wa wena,

¹⁸leswaku loko u yingisa rito ra Yehovha, Xikwembu xa wena, u ri karhi u hlayisa milawu ya yena hinkwayo leyi ndzi ku lerisaka namuntlha, ni loko u endla leswi lulameke emahlweni ka Yehovha, Xikwembu xa wena.