Read Xitsonga Deuteronomy 2 Bible Online

Deuteronomy 2 - Xitsonga bible

Deuteronomy 2

¹“Kuteloko hi hundzukile, hi suka ku ya emananga hi ndlela ya Lwandle ro Tshwuka, hilaha Yehovha a ndzi byeleke hakona, kutani hi rhendzelekela ntshava ya Seyira hi masiku layo tala.

²“Kutani Yehovha a vulavula na mina, a ku:

³‘Mi rhendzelekerile ku ringana ntshava leyi; fambani sweswi en'walungwini.

⁴Kambe u ta lerisa tiko, u ku: “Mi ta hundza endzilakaneni wa vamakwenu, vana va Esawu lava akeke eSeyira, va ta mi chava. Tilanguteleni swinene,

⁵mi nga vi na mhaka na vona, hikuva ndzi nga ka ndzi nga mi nyiki nchumu etikweni ra vona, hambi ku ri laha mi nga ta kandziya kona hi nenge, hikuva ndzi nyikile Esawu ntshava ya Seyira, yi va ndzhaka ya yena.

⁶Mi ta xava eka vona hi mali hinkwaswo leswi mi nga ta swi dya, mi ta xava ni mati lawa mi nga ta ma nwa.

⁷Hikuva Yehovha Xikwembu xa wena, xi ku katekisile emitirhweni hinkwayo ya mavoko ya wena; xi tivile ku famba ka wena emananga lamakulu lawa. Hi malembe ya mune wa makume lawa Yehovha Xikwembu xa wena, a xi ri na wena; a u pfumalanga nchumu.” ’

⁸“Kutani hi hundza, hi siya hitlhelo vamakwerhu, vana va Esawu, lava akeke eSeyira, ni ndlela ya nkova, wu ri Elata na Esiyoni-Gebere, kutani hi hundzuka, hi ya hundza endleleni ya mananga ya Mowabu.

⁹“Kavaloko Yehovha a ku eka mina: ‘U nga tshuki u pfuka Mowabu, u nga lwi na yena, hikuva ndzi nga ka ndzi nga ku nyiki nchumu etikweni ra vona hikuva ndzi nyikile Ara eka vana va Lota, leswaku wu va wa vona.’

¹⁰(Va Emimi a va akile kona khale, a ri ri tiko lerikulu, leri ngi ri ri ni vanhu lavo tala, a va lehile kukotisa Vaanaka.

¹¹Va vuriwa, na vona Varefayimi, swin'we ni Vaanaka, kambe Vamowabu va va vula va Emimi.

¹²Khale Seyira u akiwile hi Vahori, kambe vana va Esawu va va tekele tiko, va va heta emahlweni ka vona, kutani va aka ematshan'weni ya vona, kukotisa leswi endliweke hi Israele etikweni leri Yehovha a n'wi nyikeke leswaku ri va ra yena.)

¹³‘Sweswi pfukani, mi ya pela xinambyana xa Zarede.’ Kutani hi ya pela xinambyana xa Zarede.

¹⁴“Masiku lawa hi nga famba ha wona ku suka eKadexe-Bariniya ku fika siku leri hi peleke xinambyana xa Zarede, a ma ri malembe ya 38; ku ko ku hela emixaxeni rixaka hinkwaro ra vavanuna lava hlomaka hilaha Yehovha a va hlambanyeleke hakona.

¹⁵Na rona voko ra Yehovha a ri ri ehenhla ka vona ku va heta emixaxeni, va ko va hela.

¹⁶“Kuteloko vavanuna hinkwavo lava hlomaka va herisiwile hi ku fa exikarhi ka tiko,

¹⁷Yehovha a ndzi byela, a ku:

¹⁸‘Namuntlha u ta nghena endzilakaneni wa Mowabu, lowu nga Ara,

¹⁹u ta tshinelela vana va Amoni. U nga tshuki u va pfuka, u nga lwi na vona, hikuva ndzi nga ka ndzi nga ku nyiki nchumu etikweni ra vana va Amoni leswaku ri va ra wena hikuva ndzi ri nyikile vana va Lota leswaku ri va ra vona.’

²⁰(Na rona tiko leri a ri ri tiko ra Varefayimi: Varefayimi a va akile khale eka rona; va thyiwe Zamuzumi hi Vaamoni.

²¹A ri ri tiko lerikulu, ra vanhu lavo tala lava leheke kukotisa Vaanaka; kambe Yehovha u va herisile emahlweni ka Vaamoni, kutani vona va teka tiko ra vona, va aka ematshan'weni ya vona.

²²U endlele sweswo vana va Esawu lava akeke eSeyira, loko a heta Vahori emahlweni ka vona, ni loko va teka tiko ra vona kutani va aka ematshan'weni ya vona ku fika namuntlha.

²³Na vona Vaavhimi, lava akeke eswimitaneni ku ya fika eGaza, va herisiwile hi Vakafitoro lava humeke eKafitoro, kutani va aka ematshan'weni ya vona.)

²⁴“ ‘Pfukani; mi suka, mi ya pela xinambyana xa Arinoni. Languta, ndzi nehile emavokweni ya wena Sihoni, hosi ya Hexiboni, Muamori ni tiko ra yena: Suka u ya teka tiko, u ya lwa na rona.

²⁵Namuntlha ndzi ta sungula ku chavisa ni ku rhurhumerisa ha wena matiko hinkwawo lama nga ehansi ka matilo, ma ko ma rhurhumela, ma hela timbilu emahlweni ka wena, loko ma yingisa ku twala ka wena.’

²⁶“Kuteloko hi ri emananga ya Kedemoto, ndzi rhumela Sihoni, hosi ya Hexiboni tintsumi leti ngi ti ri ni marito ya ku rhula, ndzi ku eka yena:

²⁷‘Ndzi pfumelele ku hundza etikweni ra wena. Ndzi ta famba hi gondzo ndzi nga ka ndzi nga hambukeli exineneni kumbe eximatsini.

²⁸U ta ndzi xavisela hi mali swakudya swa mina, u ndzi xavisela ni mati lawa ndzi nga ta ma nwa; ndzi ta hundza hi milenge ya mina ntsena;

²⁹vana va Esawu Lava akeke eSeyira, ni Vamowabu lava akeke eAra, va ndzi pfumelele sweswo ndzi ko ndzi ya pela eYordani ku ya nghena etikweni leri Yehovha Xikwembu xa hina, xi hi nyikaka rona.’

³⁰Kambe Sihoni, hosi ya Hexiboni, u hi arisile ku tsemakanya eka rikwavo, hikuva Yehovha, Xikwembu xa wena, xi nonon'hwisile moya wa yena, xi sihalarisile mbilu ya yena, leswaku xi ta n'wi neha emavokweni ya wena hilaha swi humeleleke hakona.

³¹“Kutani Yehovha u te eka mina: ‘Vona, ndzi sungurile ku neha emahlweni ka wena Sihoni ni tiko ra yena. Sungula u ya hlasela, u va u teka tiko ra yena.’

³²Kambe Sihoni a ta hlangana na hina eYahasi, a ri ni tiko ra yena hinkwaro, a lava ku lwa.

³³Kutani Yehovha, Xikwembu xa hina, xi n'wi nehile emahlweni ka hina, hi n'wi hlula hi ku lwa, a ri yena ni vana va yena, ni tiko ra yena hinkwaro.

³⁴Enkarhini wolowo hi tekile miti hinkwayo ya yena, hi yi yirisa, va ri vavanuna ni vavasati, ni vananyana, ku nga balekanga na un'we.

³⁵Ntsena hi titekele swifuwo, ni leswi phangiweke emitini leyi hi yi tekeke.

³⁶Ku suka eArowere, la nga kusuhi ni nkova wa Arinoni, ni muti lowu nga exikarhi ka nkova, ku ya fika eGiliyadi, a ku vanga na muti lowu hi hluleke hi ku tiya; Yehovha, Xikwembu xa hina xi nehile hinkwaswo emahlweni ka hina.

³⁷Kambe a ku tshinelanga tiko ra vana va Amoni, ni loko ri ri ribuwu hinkwaro ra nambu wa Yaboko, ni loko yi ri miti ya ntshava, ni loko swi ri hinkwaswo leswi Yehovha, Xikwembu xa hina, xi hi siveleke swona.