Read Xitsonga Deuteronomy 20 Bible Online

Deuteronomy 20 - Xitsonga bible

Deuteronomy 20

¹“Kutakuloko u huma nyimpi ku ya lwa ni valala va wena, ni loko u vona tihanci ni tigolonyi, ni nyimpi leyi ku tlulaka hi ku tala, u nga tshuki u va chava, hikuva Yehovha, Xikwembu xa wena, u na wena, yena la ku humeseke etikweni ra Egipta.

²Loko mi fikile ekusuhi ni nyimpi ku lwa, muprista u ta tshinela emahlweni, u ta vulavula ni tiko a ku:

³‘Yingisa Israele! Mi ta tilunghisa namuntlha ku ya lwa ni valala va n'wina. Timbilu ta n'wina ti nga tshuki ti tsana; mi nga tshuki mi chava, mi nga tshuki mi rhurhumela, ni ku va ni vutoya emahlweni ka vona;

⁴hikuva Yehovha, Xikwembu xa n'wina, u famba na n'wina ku mi lwela eka valala va n'wina ni ku mi ponisa.’

⁵“Kavaloko tindhuna ti ta vulavula ni tiko, ti ku: ‘I mani la akeke yindlu leyintshwa xana, kambe a nga siki yi khangula? A a tifambele, a tlhelela ekaya ka yena, a nga ya fa eku lweni, kutani un'wana a nga titekela yona.

⁶I mani la byaleke vhinya xana, kambe a nga siki dya mihandzu ya yona? A a tifambele, a tlhelela eka rikwavo, hikuva a nga ya fa eku lweni, kutani un'wana a ta dya mihandzu ya yona.

⁷I mani kambe la vuteke nsati, a nga siki n'wi hlomisa xana? A a fambe, a timukela eka rikwavo, hikuva a nga ya fa eku lweni, kutani un'wana a ta n'wi hlomisa.’

⁸Tindhuna ti ta engeta ti vulavula ni tiko, ti ku: ‘I mani la chavaka la pfumalaka mbilu xana? A a fambe, a timukela eka rikwavo, leswaku timbilu ta vamakwavo ti nga tshuki ti nyuka kukotisa ya yena.’

⁹Kutakuloko tindhuna ti hetile ku vulavula ni tiko, va ta veka tindhuna ta mavandla emahlweni ka tiko.

¹⁰“Kutakuloko u tshinele ekusuhi ni muti ku wu hlasela, u ta wu kombela hi ku rhula.

¹¹Loko va ku hlamula hi ku rhula, va ku pfulela tinyangwa ta wona, tiko hinkwaro leri nga eka wona, ri ta va ehansi ka wena, ri ku tirhela.

¹²Kambe loko wu nga yingisani na wena, wu rhandza ku lwa na wena, u ta wu hlasela;

¹³Yehovha, Xikwembu xa wena, u ta wu neha emavokweni ya wena, kutani u ta dlaya hi tlhari vavanuna hinkwavo.

¹⁴Loko va ri vavasati ni vana ni swifuwo, ni hinkwaswo leswi nga ta va emutini, nhundzu ya wona hinkwayo u ta yi teka yi va ya wena, u ta dya xuma xa valala va wena, lexi Yehovha, Xikwembu xa wena, a ku nyikeke xona.

¹⁵U ta endlisa sweswo eka miti hinkwayo leyi nga ekule na wena leyi nga hlayiwiki exikarhi ka miti ya matiko lawa.

¹⁶Loko yi ri miti ya matiko lawa Yehovha, Xikwembu xa wena, a ku nyikaka wona leswaku yi va ndzhaka ya wena, u nga tshuki u tshika munhu ni un'we a hanya.

¹⁷U ta yirisa Vahiti, ni Vaamori ni Vakanana, ni Vaperesi, ni Vahivhi, ni Vayebusi, hilaha Yehovha, Xikwembu xa wena, a ku leriseke hakona,

¹⁸swi va leswaku va nga tshuki va mi dyondzisa ku endla leswo biha hinkwaswo leswi va endlelaka swikwembu swa vona, ni leswaku mi nga tshuki mi dyohela Yehovha, Xikwembu xa n'wina.

¹⁹“Kutakuloko u sivelela hi nkarhi lowo leha muti lowu u lwaka na wona ku wu teka, u nga tshuki u onha mirhi hi xihloka; u ta dya mihandzu ya yona; kambe u nga yi tsemi ku yi vekela emahlweni ka wena eku lweni, hikuva murhi wa le masin'wini i ku hanya ka vanhu.

²⁰Kambe u nga tsema mirhi leyi nga vekiki swakudya u ta endla ha yona mitirho ya ku sivelela muti lowu lwaka na wena, wu ko wu wa.