Read Xitsonga Deuteronomy 22 Bible Online

Deuteronomy 22 - Xitsonga bible

Deuteronomy 22

¹“Kungakuloko u vona homu ya makwenu, hambi yi ri nyimpfu ya yena leyi lahlekeke, u nga tshuki u yi fularhela; u ta yi tlherisela eka makwenu.

²Loko makwenu a nga akanga kusuhi na wena; kumbe loko u nga n'wi tivi, u ta hlayisa xifuwo emutini wa wena; xi ta tshama eka wena, makwenu a ko a ta xi lava, hi kona u nga ta n'wi tlherisela xona.

³U ta endlisa sweswo hi mbhongolo ya yena, ni nguvu ya yena, ni xilo xin'wana ni xin'wana lexi makwenu a xi lahleke lexi u xi kumeke; u nga tshuki u xi fularhela.

⁴“Loko u vona mbhongolo ya makwenu, hambi homu ya yena loko yi wile endleleni, u nga tshuki u yi fularhela; u ta n'wi pfuna ku yi pfuxa.

⁵“Wansati a nga tshuki a ambala nguvu ya wanuna, ni wanuna a nga tshuki a ambala nguvu ya wansati; hikuva la endlaka xilo lexi, wa yila eka Yehovha, Xikwembu xa wena.

⁶“Kungakuloko u vona endleleni ya wena xisaka xa tinyanyana lexi nga emurhini, kumbe ehansi, xi ri ni mavondlo kumbe mandza, mana wa wona a ri karhi a alamela mavondlo, hambi mandza, u nga tshuki u teka mavondlo ni mana wa wona;

⁷u ta tshika mana wa wona a tihahela, kambe u nga titekela mavondlo, swi ri leswaku u kuma ku tsaka, ni leswaku masiku ya wena ma lehisiwa.

⁸“Kutakuloko u aka yindlu leyintshwa, u ta biyela lwangu ra wena leswaku u nga vekeli ngati endlwini ya wena, loko kumbe munhu a wa a ri ehenhla ka yona.

⁹“U nga tshuki u byala evhinyeni ya wena timbewu ta tinxakaxaka, leswaku timbewu hinkwato leti u ti byaleke ni mihandzu ya vhinya, u nga tshuki u tekeriwa swona.

¹⁰“U nga tshuki u rima hi homu leyi paniweke ni mbhongolo.

¹¹“U nga tshuki u ambala nguvu leyi lukiweke hi voya bya tinyimpfu swin'we ni ntsembyana.

¹²“U ta rhungela madziva ematlhelweni ya mune ya nguvu leyi u yi funengelaka.

¹³“Kutakuloko munhu a tekile nsati kutani a yile eka yena, kambe a sungula ku n'wi venga,

¹⁴a n'wi vekela nandzu wa xivi lexikulu, a n'wi lumbeta hi swilo leswo biha, a ku: ‘Nsati loyi, ndzi n'wi tekile, ndzi yile eka yena kambe a ndzi n'wi kumanga a ri wanhwana!’

¹⁵Tata wa nsati loyi ni mana wa yena, va ta teka xikombiso xa vunhwana bya yena, va xi yisa eka vakulukumba va muti ehubyeni.

¹⁶Tata wa wansati u ta ku eka vakulukumba: ‘Ndzi nyikile n'wana wa mina eka munhu loyi leswaku a va nsati wa yena, kambe u n'wi vengile,

¹⁷kutani u n'wi vekile nandzu wa swilo leswo biha, u te: “A ndzi kumangi n'wana wa wena a ha ri wanhwana.” Kambe xikombiso xa vunhwana bya n'wana wa mina hi lexi.’ Kavaloko va ta tshandzavuta nceka emahlweni ka vakulukumba va muti.

¹⁸Vakulukumba va muti lowo va ta teka munhu loyi, va n'wi avanyisa.

¹⁹Kambe leswi a lumbeteke wanhwana wa Israele hi xilo lexo biha, va ta n'wi rihisa hi tixikele ta dzana ta silivhere, va ti nyika tata wa wansati loyi; kutani u ta va nsati wa yena hi masiku hinkwawo ya yena, a nga ka a nga n'wi hlongoli.

²⁰Kambe kungakuloko mhaka leyi, yi tiyile, swi ri leswaku ku nga kumiwanga swa vunhwana eka nsati loyi,

²¹va ta humesa wansati enyangweni ya yindlu ya tata wa yena, kutani vanhu va muti wa yena va ta n'wi khandla hi maribye, a ko a fa, hikuva u endlile xivi lexikulu ngopfu eIsraeleni hi ku oswa endlwini ya tata wa yena. Hi sweswo u nga ta susa lowo biha exikarhi ka wena.

²²“Kungakuloko va kuma wanuna a etlele ni wansati la tekiweke va ta fa havambirhi, wanuna la etleleke ni wansati, na yena wansati. U ta susisa sweswo lowo biha eIsraeleni.

²³“Kungakuloko wanhwana a vutiwile, kutani a hlangana ni wanuna emutini, a etlela na yena,

²⁴mi ta va humesa havambirhi enyangweni ya muti lowo, mi va khandla hi maribye va fa: wanhwana u ta fa hikuva a nga huwelelanga emutini, ni wanuna u ta fa hikuva u khomisile nsati wa warikwavo tingana. Sweswo u ta susa lowo biha exikarhi ka wena.

²⁵“Kambe wanuna loko a hlangana emasin'wini ni wanhwana la vutiweke, kutani a n'wi sindzisa a etlela na yena, wanuna la etleleke na yena u ta fa, a ri yena ntsena.

²⁶U nga ka u nga endli nchumu eka wanhwana, hikuva a nga na nandzu lowu faneleke rifu, swi kotisa ni loko munhu a pfukela makwavo hi matimba, a n'wi dlaya; i mhaka yin'we.

²⁷Hikuva u n'wi kumile emasin'wini: wanhwana la vutiweke a huwelerile, kambe a ku tangi munhu ku n'wi ponisa.

²⁸“Kungakuloko wanuna a hlangana ni wanhwana la nga vutiwangiki, kutani a n'wi khoma a etlela na yena, kambe va voniwile;

²⁹wanuna la etleleke na yena u ta nyika tata wa wanhwana tixikele ta 50 ta silivhere, kutani u ta va nsati wa yena hikuva u n'wi sindzisile, a nga ka a nga n'wi tshiki eku hanyeni ka yena hinkwako.

³⁰“Wanuna ni un'we a nga tshuki a teka nsati wa tata wa yena, ni ku funungula nguvu ya tata wa yena.