Read Xitsonga Deuteronomy 24 Bible Online

Deuteronomy 24 - Xitsonga bible

Deuteronomy 24

¹“Kungakuloko wanuna a tekile nsati, a va a n'wi hlomisile, kambe loko a nga n'wi tsakisi, hikuva u kumile eka yena xilo lexi sandzekaka; kuteloko a n'wi tsalele papila ra ku n'wi tshika, a n'wi vekela rona evokweni, a va a n'wi humesa endlwini ya yena;

²kutakuloko a hume eka yena, kutani a ya tekiwa hi nuna un'wana,

³ni nuna lowa vumbirhi loko a n'wi venga, a n'wi tsalela na yena papila raku n'wi tshika, a n'wi vekela rona evokweni, kutani a n'wi humesa endlwini ya yena; kutani nuna lowa vumbirhi la n'wi tekeke loko a fa,

⁴nuna lowo rhanga, la n'wi tshikeke a nga ka a nga n'wi teki kambe, leswi a n'wi susumeteleke eswivini hikuva swa yila emahlweni ka Yehovha kutani u nga dyohisi tiko leri Yehovha, Xikwembu xa wena, a ku nyikaka leswaku yi va ndzhaka ya wena.

⁵“Kutakuloko wanuna a ha ku teka nsati, a nga ka a nga humi nyimpi kambe ku nga ka ku nga vekiwi ntirho wun'wana ehenhla ka yena, u ta tshunxiwa hi lembe rin'we, hikwalaho ka yindlu ya yena, a ta tsakisa nsati loyi a n'wi tekeke.

⁶“Maribye lamambirhi ya ku sila u nga ka u nga teki ku endla xitshembiso ha wona, hambi ri ri ribye ra le henhla, hikuva i ku teka vutomi ematshan'weni ya xitshembiso.

⁷“Kungakuloko munhu a yiva munhu wa varikwavo, exikarhi ka vana va Israele, a n'wi endla khumbi ra yena kutani a n'wi xavisa, muyivi loyi u ta fa; hi kona u nga ta humesa lowo biha exikarhi ka wena.

⁸“Tilangutele emhakeni ya nhlokonho, ku yingisa swinene ni ku endla hinkwaswo hilaha mi nga ta lerisiwa hakona hi vaprista va Valevhi; mi ta endla hilaha ndzi va leriseke hakona.

⁹Tsundzuka leswi Yehovha, Xikwembu xa wena, a endleleke Meriyamu, endleleni, loko mi humile eEgipta.

¹⁰“Kungakuloko u lomba xilo eka warikwenu, u nga tshuki u nghena endlwini ya yena ku landza xitshembiso xa yena,

¹¹u ta yima ehandle, kutani loyi u n'wi lombeke u ta ku tisela xitshembiso ehandle.

¹²Loko xi ri xisiwana, u nga ka u nga yi eku etleleni u ri ni xitshembiso xa yena;

¹³u ta n'wi tlherisela xitshembiso kunene loko dyambu ri pela; u ta etlela engubyeni ya yena, a ku katekisa, kutani u ta va u lulamile emahlweni ka Yehovha, Xikwembu xa wena.

¹⁴“U nga tshuki u dyelela mutirhi wa xisiwana la nga mupfumari exikarhi ka vamakwenu, kumbe exikarhi ka valuveri lava nga ta luvela etikweni ra wena ni le mitini ya wena;

¹⁵u ta n'wi nyika hakelo ya yena hi siku rolero kambe dyambu ri nga tshuki ri pelela nandzu lowo, hikuva i xisiwana, kutani mbilu ya yena yi navela yona; loko swi nga ri tano, u ta huwelela ha wena eka Yehovha, kutani u ta va ni nandzu.

¹⁶“Vatatana va nga ka va nga dlayeriwi vana, ni vana va nga ka va nga dlayeriwi vatatana; un'wana ni un'wana u ta dlayeriwa xidyoho xa yena.

¹⁷“U nga tshuki u voyamisa ku lulama ka muluveri ni ka xisiwana, kambe u nga ka u nga teki nguvu ya noni xi va xitshembiso.

¹⁸U ta anakanya leswaku a wu ri khumbi eEgipta, ni leswaku Yehovha, Xikwembu xa wena, a ku kutsurile kona; hikwalaho ndzi ku lerisaka ku endlisa sweswo.

¹⁹“Kutakuloko u tshovela ensin'wini ya wena, u nga ka u nga tlheli u ya teka nyandza leyi u yi rivaleke; yi ta va ya muluveri ni ya xisiwana ni ya noni, leswaku Yehovha, Xikwembu xa wena, a ku katekisa emitirhweni hinkwayo ya mavoko ya wena.

²⁰Kutakuloko u hlakahla mitlhwari ya wena, u nga tshuki u lavisisa emarhavini endzhaku ka wena; swi ta va swa muluveri, ni swa xisiwana, ni swa noni.

²¹Kutakuloko u kha mihandzu ya vhinya ya wena, u nga tshuki u lavisisa leswi seleke endzhaku ka wena; swi ta va swa muluveri, ni swa xisiwana, ni swa noni.

²²U ta anakanya leswaku a wu ri khumbi etikweni ra Egipta; hikwalaho ndzi ku lerisaka ku endlisa sweswo.