Read Xitsonga Deuteronomy 25 Bible Online

Deuteronomy 25 - Xitsonga bible

Deuteronomy 25

¹“Kutakuloko vanhu va tengisana kutani va humelela emahlweni ka vaavanyisi leswaku va ta avanyisiwa, la nga riki na nandzu u ta vuriwa la lulameke, kambe la nga na nandzu u ta vuriwa lowo biha.

²Lowo biha, loko a fanele ku biwa, muavanyisi u ta n'wi etlerisa ehansi, kutani u ta biwa emahlweni ka yena hi ku ringana vukulu bya nandzu wa yena.

³A nga ka a nga n'wi bi hi mikhavi leyi tlulaka 40, leswaku kumbe loko a tlula mpimo lowu, makwenu a nga sandziwa emahlweni ka wena.

⁴“U nga tshuki u siva nomu wa homu loko yi hula.

⁵“Kungakuloko vamakwavo va akile swin'we, kutani ku fa un'wana a nga siyanga n'wana, nsati wa loyi a feke a nga ka a nga tekiwi ehandle hi nuna wa rixaka rin'wana, namu wa yena u ta ya eka yena, a n'wi teka, a va nsati wa yena, u ta n'wi endlela hi mfanelo ya yena ya namu.

⁶Kutani mativula ya yena loyi a nga ta n'wi veleka, u ta pfuxa vito ra makwavo la feke; hi sweswo, vito leri ri nga ka ri nga hlanguriwi eIsraeleni.

⁷Kambe loko munhu loyi a nga swi rhandzi ku teka namu wa yena, yeloyi u ta ya ehubyeni eka vakulukumba, u ta ku: ‘Namu wanga u ala ku pfuxa vito ra makwavo eIsraeleni; a nga rhandzi ku ndzi teka hi mfanelo ya namu.’

⁸Kavaloko vakulukumba va muti wa yena va ta vita wanuna, va vulavula na yena.

⁹Kutani loko a phikelela, a ku: ‘A ndzi swi rhandzi ku n'wi teka,’ namu wa yena u ta n'wi tshinelela emahlweni ka vakulukumba, a n'wi tshunxela ntanghu enengeni, kutani a n'wi tshwutela marhi emahlweni; hi kona a nga ta vulavula, a ku: ‘Ku ta endlisiwa sweswo eka munhu loyi a nga akiki yindlu ya makwavo.’

¹⁰Kutani vito ra yindlu leyi, eIsraeleni, yi ta vuriwa yindlu ya la susiweke ntanghu.

¹¹“Kutakuloko vavanuna va lwa, a ri wanuna ni makwavo, kutani nsati wa un'wana loko a tshinela ku ta ponisa nuna wa yena emavokweni ya loyi a n'wi baka, kutani a tshambuluta voko ra yena, a khoma lowun'wana hi swa tingana ta yena,

¹²u ta n'wi tsema voko; tihlo ra wena ri nga ka ri nga n'wi tsetseleri.

¹³“U nga tshuki u va ni maribye mambirhi ya mpimo enkwameni wa wena, ri ri lerikulu ni leritsongo.

¹⁴U nga tshuki u va ni tiefa timbirhi endlwini ya wena, leyikulu ni leyitsongo.

¹⁵U ta va ni ribye ra mpimo lowo lulama, ni efa ya mpimo lowo lulama, leswaku masiku ya wena ma ta lehisiwa emisaveni leyi Yehovha, Xikwembu xa wena, a ku nyikaka yona.

¹⁶Hikuva mani na mani la endlaka swilo leswi, na mani na mani la hombolokaka, wa yila eka Yehovha, Xikwembu xa wena.

¹⁷“Tsundzuka leswi Amaleke a ku endleke endleleni loko mi huma eEgipta,

¹⁸hilaha a ku pfukeke endleleni, a wela ehenhla ka lava saleke endzhaku; loko u ri wena a u karhele, u herile matimba, kambe a nga chavangi Xikwembu.

¹⁹Kutakuloko Yehovha, Xikwembu xa wena, a ku nyikile ku wisa, a ku ponisa eka valala hinkwavo lava ku rhendzelaka exikarhi, etikweni leri Yehovha, Xikwembu xa wena, a ku nyikaka leswaku yi va ndzhaka ya wena u ri fuma, u ta hlangula ku tsundzukiwa ka Amaleke ehansi ka matilo, mi nga va rivali.