Read Xitsonga Deuteronomy 28 Bible Online

Deuteronomy 28 - Xitsonga bible

Deuteronomy 28

¹“Kutakuloko u yingisa swinene rito ra Yehovha, Xikwembu xa wena ku endla hi milawu hinkwayo leyi ndzi ku lerisaka yona namuntlha Yehovha, Xikwembu xa wena, u ta ku tlakusa ehenhla ka matiko hinkwawo ya misava;

²kutani mikateko hinkwayo leyi, yi ta ku tela ehenhla, u averiwa yona loko u yingisa rito ra Yehovha, Xikwembu xa wena.

³“U ta katekisiwa emutini, kambe u ta katekisiwa emasin'wini.

⁴Ku ta katekisiwa mihandzu ya khwiri ra wena, ni mihandzu ya misava ya wena, ni mihandzu ya mitlhambi ya wena, ya tihomu ta wena ni ya tinyimpfu ta wena.

⁵Ku ta katekisiwa xirhundzu xa wena ni mbita ya wena.

⁶U ta katekisiwa loko u nghena, u katekisiwa ni loko u huma.

⁷“Yehovha u ta ku nyika ku hlula valala va wena lava nga ta ku pfuka va ta huma hi ndlela yin'we ku lwa na wena, kambe va ta baleka emahlweni ka wena hi tindlela ta ntlhanu na timbirhi.

⁸Yehovha u ta lerisa ku kateka leswaku ku va na wena etinguleni ta wena ni le mitirhweni hinkwayo ya mavoko va wena, kutani u ta ku katekisa emisaveni leyi Yehovha, Xikwembu xa wena, a ku nyikaka yona.

⁹“Yehovha u ta ku veka leswaku u va tiko leri hlawuleriweke yena, hi laha a ku hlambanyeleke hakona, loko u hlayisa milawu ya Yehovha, Xikwembu xa wena, ni loko u famba etindleleni ta yena.

¹⁰Kutani matiko hinkwawo ya misava ma ta vona leswaku vito ra Yehovha ri vuriwa ehenhla ka wena, hi kona va nga ta ku chava.

¹¹Yehovha u ta ku andzisela rifuwo hi mihandzu ya khwiri ra wena, ni mihandzu ya swifuwo swa wena, ni mihandzu ya misava ya wena emisaveni leyi Yehovha a hlambanyeleke vatata wa wena ku ku nyika yona.

¹²Yehovha u ta ku pfulela tilo, byi nga vukosi bya yena lebyinene, ku nyika misava ya wena mpfula hi nkarhi wa yona, ni ku katekisa mitirho hinkwayo ya mavoko ya wena. Matiko layo tala ma ta lomba eka wena, kambe wena u nga ka u nga lombi eka vona.

¹³Yehovha u ta ku veka enhlokweni, ku nga ri encileni; u ta tshama u ri henhla, ku nga ri ehansi, loko u yingisa milawu ya Yehovha, Xikwembu xa wena, leyi ndzi ku lerisaka namuntlha ku yi hlayisa ni ku yi endla,

¹⁴ni loko u nga hambukeli exineneni kumbe eximatsini eka marito hinkwawo lawa ndzi ku lerisaka wona namuntlha ku landza swikwembu swin'wana ni ku swi tirhela.

¹⁵“Kutakuloko u nga yingisi rito ra Yehovha, Xikwembu xa wena, ku hlayisa milawu hinkwayo va yena ni ku lerisa hinkwako ka yena, leswi ndzi ku lerisaka namuntlha, makhombo hinkwawo lawa ma ta ku tela henhla, ma ta ku fikela:

¹⁶“U ta rhukaniwa emutini, kambe u ta rhukaniwa emasin'wini.

¹⁷Xirhundzu xa wena ni mbita ya wena swi ta rhukaniwa;

¹⁸ku ta rhukaniwa mihandzu ya khwiri ra wena, ni mihandzu ya misava ya wena, ni ku tswala ka tihomu ta wena, ni ka tinyimpfu ta wena.

¹⁹U ta rhukaniwa eku ngheneni ka wena, u rhukaniwa ni le ku humeni ka wena.

²⁰“Yehovha u ta ku rhumela ku rhukana ni ku kanakana, ni ku chavisiwa emitirhweni hinkwayo leyi u nga ta yi sungula, ni leyi u nga ta yi tirha, u ko u herisiwa, u hatlisa u lova hikwalaho ka mitirho leyo biha ya wena, leyi u ndzi fularheleke ha yona.

²¹Yehovha u ta ku namarheta rifu, u ko u herisiwa emisaveni leyi u nga ta nghena eka yona ku yi fuma.

²²“Yehovha u ta ku ba hi vuvabyi bya xifuva, ni ku hisa ka miri, ni ku pfimba, ni mumu lowukulu, ni fumu, ni dyandza, ni ku bola ka mavele; makhombo lawa, ma ta ku hlongorisa u ko u lova.

²³“Tilo ri ta va ra koporo ehenhla ka nhloko ya wena, ni misava yi ta va ya nhumbu ehansi ka wena.

²⁴Yehovha u ta nyika tiko ra wena sava ni ntshuri ematshan'weni ya mpfula; swi ta ku wela ehenhla u ko u herisiwa.

²⁵“Yehovha u ta endla leswaku u hlaseriwa emahlweni ka valala va wena: u ta huma ku lwa na vona hi ndlela yin'we, kambe u ta hlongorisiwa emahlweni ka vona hi tindlela ta ntlhanu na timbirhi, kutani u ta va xihlamariso ematikweni hinkwawo ya misava.

²⁶Mitsumbu ya n'wina swi ta va swakudya swa tinyanyana hinkwato ta tilo, ni swa swivandzana swa misava, kambe ku nga ka ku nga vi na munhu la swi hlongolaka.

²⁷“Yehovha u ta ku ba hi swilondza swa Egipta, ni marhumba, ni tinhlalu, ni muna, swilo leswi, u nga ka u nga holi eka swona.

²⁸Yehovha u ta ku ba hi rihuhu, ni riphume;

²⁹u ta ambamba ninhlekanhi kukotisa lowo fa mahlo a ambambaka emunyameni, kutani u nga ka u nga tsaki etindleleni ta wena. U ta xanisiwa ni ku yiveriwa ntsena hi masiku hinkwawo, kutani ku nga ka ku nga vi na muponisi!

³⁰“U ta vuta wansati, kambe un'wana u ta etlela na yena; u ta aka yindlu, kambe u nga ka u nga tshami eka yona; u ta byala vhinya, kambe u nga ka u nga dyi swa yona.

³¹Homu ya wena yi ta tlhaviwa emahlweni ka wena kutani u nga ka u nga dyi nyama ya yona; mbhongolo ya wena yi ta tekiwa emahlweni ka wena, kambe yi nga ka yi nga tlheleli eka wena; swifuwo leswitsongo swa wena swi ta nyikiwa valala va wena, kambe u nga ka u nga vi na muponisi!

³²“Vana va wena va vavanuna ni va vavasati va ta nyiketiwa tiko rin'wana; mahlo ya wena ma ta swi vona, kutani ma ta tshwa hi masiku hinkwawo hikwalaho ka vona; kambe voko ra wena ri ta pfumala matimba.

³³Tiko leri u nga ri tiviki ri ta dya mihandzu ya misava ya wena ni ya mitirho ya wena hinkwayo; kambe u ta xanisiwa ni ku khandliwa ntsena hi masiku hinkwawo;

³⁴kutani u ta hlanya hikwalaho ka leswi u nga ta swi vona hi mahlo ya wena.

³⁵“Yehovha u ta ku ba ematsolweni ni le tinyongeni hi swilondza leswo leva leswi nga ta ka swi nga holi eka wena, leswi nga ta ku funengeta ku suka eminkondzweni ku fikela erhavarhaveni.

³⁶“Yehovha u ta ku fambisa, wena ni hosi ya wena leyi u nga ta yi veka ehenhla ka wena, eka tiko leri u nga ri tivangiki, hambi va ri vatata wa wena, mi ta tirhela kona swikwembu swin'wana swa mitsandze ni swa maribye.

³⁷U ta va xihlamariso ni ntsheketo, ni xihlekiso exikarhi ka matiko hinkwawo lawa Yehovha a nga ta ku fambisa eka wona.

³⁸“U ta hlwanya mbewu ya ku tala ensin'wini ya wena, kambe u ta tshovela switsongo, hikuva tinjiya ti ta yi heta.

³⁹U ta byala ni ku hlakula tivhinya, kambe u nga ka u nga nwi vhinyo ya tona, ni ku tshovela mihandzu ya tona, hikuva swivungu swi ta yi heta.

⁴⁰U ta va ni mitlhwari etikweni ra wena hinkwaro, kambe u nga ka u nga toli mafurha, hikuva mihandzu ya mirhi ya wena yi ta dzudzeka.

⁴¹U ta veleka vana va xinuna ni va xisati, kambe va nga ka va nga vi va wena, hikuva va ta ya evukhumbini.

⁴²Swivungu swi ta funengeta mirhi hinkwayo ya wena, ni mihandzu ya misava ya wena.

⁴³“Muluveri la nga ta luvela eka wena u ta tikurisa ehenhla ka wena ngopfungopfu; loko u ri wena u ta tsongahala hansihansi;

⁴⁴yena u ta ku lomba, kambe wena u ta pfumala swo n'wi lomba; yena u ta va enhlokweni; kambe wena u ta va endzhaku.

⁴⁵“Makhombo lawa ma ta ta ehenhla ka wena, ma ku landza, ma ku kuma u ko u herisiwa, hikuva a ku yingisangi rito ra Yehovha, Xikwembu xa wena, ku hlayisa milawu ya yena ni ku lerisa ka yena leswi a ku leriseke swona:

⁴⁶swi ta va swikombiso ni masingita ehenhla ka wena ni vatukulu va wena hi masiku ni masiku.

⁴⁷“Hikuva a ku tirhelanga Yehovha, Xikwembu xa wena, hi ku tsaka, ni mbilu hinkwayo ya wena, hikwalaho ka ndzalo ya swilo hinkwaswo,

⁴⁸u ta tirhela valala va wena lava Yehovha a nga ta va rhumela eka wena, u ri ni ndlala ni torha, ni vusweti, ni ku pfumala hinkwaswo; u ta ku vekela joko ra nsimbhi enhan'wini, u ko u herisiwa hi yena.

⁴⁹“Yehovha u ta ku pfuxela tiko leri nga ekule, ri nga emakun'wini ya misava, tiko leri fanaka ni gama loko ri haha, tiko leri u nga ka u nga twisisi ririmi ra rona;

⁵⁰va nga vanhu va mimombo yo tiya, lava va nga ka va nga tweli wa khale vusiwana, va nga vi na tintswalo eka n'wana;

⁵¹va ta dya marhole ya swifuwo swa wena, ni mihandzu ya misava ya wena, u ko u herisiwa; va nga ka va nga ku siyeli nchumu, hambi yi ri koro, ni vhinyo, ni mafurha, ni marhole ya tihomu ta wena, ni swinyimpfana swa tinyimpfu ta wena, va kondza va ku herisa.

⁵²Va ta ku rhendzela emitini hinkwayo ya wena, ku ko ku wa etikweni hinkwaro ra wena makhokholo lama tlakukeke ni lama tiyeke lawa u ma tshembeke; va ta ku hlasela emitini hinkwayo ya wena, ni le tikweni hinkwaro leri Yehovha, Xikwembu xa wena, a nga ta ku nyika rona.

⁵³Eku hlaseleni ni le ku xanisekeni loku valala va wena va nga ta ku xanisa hakona, u ta dya mihandzu ya khwiri ra wena, yi ri nyama ya vana va wena va varisanyana ni va vanhwanyana lava Yehovha, Xikwembu xa wena, a nga ta ku nyika vona.

⁵⁴Kutani wanuna la tirhandzaka hi ku tlurisa exikarhi ka n'wina, u ta languta hi tihlo lero biha makwavo, ni nsati wa xifuva xa yena, ni lava seleke va vana va yena, lava a va tshikeke va hanya,

⁵⁵kambe u ta ala ku nyika ni ka un'we wa vona, nyama ya vana va yena leyi a nga ta yi dya, hikuva a ku nga n'wi saleli nchumu eku hlaseleni, ni le ku xanisekeni loku valala va wena va nga ta ku xanisa hakona emitini hinkwayo ya wena.

⁵⁶Wansati la tirhandzaka hi ku tlurisa exikarhi ka n'wina, la chavaka hi ku tirhandza ka yena, ku kandziya ehansi hi nkondzo wa yena, u ta languta hi tihlo lero biha nuna wa xifuva xa yena, ni n'wana wa yena wa wanuna, hambi wa wansati,

⁵⁷kutani u ta ala ku va nyika gula leri humeke exikarhi ka milenge ya yena, hambi va ri vana lava a va velekeke; hikuva u ta va dya exihundleni hi ku pfumala hinkwaswo, eku hlaseleni ni le ku xanisekeni loko valala va wena va nga ta ku xanisa hakona emitini ya wena.

⁵⁸“Loko u nga tilanguteli ku landza marito hinkwawo ya nawu lowu, lama tsariweke ebukwini leyi, ni ku chava vito leri kwetsimaka ni leri chavisaka ra Yehovha, Xikwembu xa wena,

⁵⁹Yehovha u ta ku ba hi mimpfembeti leyi hlamarisaka wena ni vatukulu va wena, yi ri mimfembeti leyikulu! Leyi hlwelaka ku phya, ni mavabyi layo leva ni lama hlulaka vadyahi.

⁶⁰U ta vuyisa ehenhla ka wena mavabyi hinkwawo ya Egipta, lawa u nga rhurhumela emahlweni ka wona, kutani ma ta ku namarhela.

⁶¹Kambe Yehovha u ta tisa henhla ka wena mavabyi hinkwawo, ni makhombo, hinkwawo lama nga tsariwangiki ebukwini ya nawu lowu, u ko u herisiwa.

⁶²Mi ta sala mi ri ni vanhu va nga ri vangani, hambi mi kotisile tinyeleti ta tilo hi ku tala ka n'wina, hikuva a mi yingisangi rito ra Yehovha Xikwembu xa n'wina.

⁶³Kukotisa leswi Yehovha a titsakeleke ku mi katekisa, ni ku mi andzisa, hi sweswo, Yehovha u ta titsakela ku mi lovisa, ni ku mi herisa; kambe mi ta tsuvuriwa emisaveni leyi mi nga ta nghena eka yona ku yi fuma.

⁶⁴Yehovha u ta ku hangalasa ematikweni hinkwawo, ku suka emakun'wini ya misava, ku yisa emakun'weni man'wana ya misava, kutani u ta tirhela kona swikwembu swin'wanyana leswi wena ni vatata wa wena mi nga swi tivangiki, wu ri ntsandze ni ribye.

⁶⁵“Ematikweni lawa, u nga ka u nga kumi ku wisa, kambe ku nga ka ku nga vi na ku wisa ka mikondzo ya wena; Yehovha u ta ku nyika kona mbilu leyi rhurhumelaka, ni mahlo lama timekeke ni mbilu leyi kalaka matimba.

⁶⁶Vutomi bya wena byi ta va lebyi nga tiyiki emahlweni ka wena; u ta rhurhumela vusiku ni nhlekanhi, kambe u nga ka u nga tshembi vutomi bya wena.

⁶⁷Ni mixo u ta ku: ‘I ngi loko ma ri madyambu.’ Nimadyambu u ta ku: ‘I ngi loko ku ri nimixo!’ U ta vula sweswo hikwalaho ka nchavo wa mbilu ya wena ni ka swilo leswi u nga ta swi vona hi mahlo ya wena.

⁶⁸Yehovha u ta ku tlherisela eEgipta etingalaveni, a ku fambisa endleleni leyi ndzi nga te eka wena: ‘U nga ka u nga ha yi voni,’ kutani mi ta tixavisa kona eka valala va n'wina ku va makhumbi ya vavanuna ni ya vavasati kambe a ku nga vi na muxavi.”