Read Xitsonga Deuteronomy 30 Bible Online

Deuteronomy 30 - Xitsonga bible

Deuteronomy 30

¹“Kutakuloko swilo leswi ndzi swi vekeke emahlweni ka wena, yi nga mikateko ni mirhukano, loko swi fikile henhla ka wena, ni loko u swi anakanya embilwini ya wena, ematikweni hinkwawo lawa Yehovha, Xikwembu xa wena ingi xi ku hlongorisile ka wona,

²loko u tlhelela eka Yehovha, Xikwembu xa wena, ni loko u yingisa rito ra yena hi mbilu hinkwayo ya wena, ni moya hinkwawo wa wena, u ri wena ni vana va wena, hi laha ndzi ku lerisaka swilo hinkwaswo hakona namuntlha;

³Yehovha, Xikwembu xa wena, xi ta tlherisa vakhomiwa va wena, xi ku tsetselela, xi engeta xi ku hlengeleta ematikweni hinkwawo lawa Yehovha, Xikwembu xa wena, ingi xi ku hangalasele kona.

⁴“Ni loko vahlongoriwa va wena va ri emakun'weni ya matilo, Yehovha, Xikwembu xa wena, xi ta va hlengeleta kona, xi ta ya ku teka kona.

⁵Yehovha, Xikwembu xa wena, xi ta ku vuyisa etikweni leri vatata wa wena va ri fumeke, kutani u ta ri fuma, xi ku katekisa, xi ku andzisa ku tlurisa vatata wa wena.

⁶Yehovha, Xikwembu xa wena, u ta yimbisa mbilu ya wena, ni timbilu ta vatukulu va wena leswaku u rhandza Yehovha, Xikwembu xa wena, hi mbilu hinkwayo ya wena, ni moya hinkwawo wa wena, leswaku u hanya.

⁷Yehovha, Xikwembu xa wena, u ta veka makhombo lawa hinkwawo ehenhla ka valala va wena, ni le henhla ka vavengi va wena lava ku hlongoriseke.

⁸Loko u ri wena, u ta tlhela u yingisa rito ra Yehovha, u hlayisa milawu hinkwayo leyi ndzi ku lerisaka namuntlha;

⁹kutani Yehovha, Xikwembu xa wena, u ta andzisa ku kateka ka wena emitirhweni hinkwayo ya mavoko ya wena, u ta andzisa mihandzu ya khwiri ra wena, ni mihandzu ya swifuwo swa wena, ni mihandzu ya misava ya wena; hikuva Yehovha u ta tlhela a titsakela ha wena a ku katekisa, hilaha u titsakeleke hakona hi vatata wa wena;

¹⁰loko u ta yingisa rito ra Yehovha, Xikwembu xa wena, u hlayisa milawu ya yena, ni ku lerisa ka yena leswi tsariweke ebukwini ya nawu lowu, ni loko u tlhelerile eka Yehovha, Xikwembu xa wena, hi mbilu hinkwayo ya wena, ni moya hinkwawo wa wena.

¹¹“Hikuva nawu lowu ndzi ku lerisaka wona namuntlha a wu tlakukanga henhla ka wena ku tlurisa, kambe a wu nga ri kule na wena.

¹²A wu nga ri etilweni, leswaku va nga ku: ‘I mani la nga ta hi khandziyela etilweni, a ya hi tekela wona, a hi dyondzisa wona leswaku hi wu endla?’

¹³A wu nga ri hase ka lwandle, leswaku va nga ku: ‘I mani la nga ta hi pelela ehase ka lwandle, a ya hi tekela wona, a ta hi dyondzisa wona leswaku hi endla ha wona?’

¹⁴Hikuva rito ri kusuhi ngopfu na wena, ri le non'wini wa wena ni le mbilwini ya wena, leswaku u ri hlayisa.

¹⁵“Languta, ndzi vekile namuntlha emahlweni ka wena vutomi ni leswinene, rifu ni ku biha;

¹⁶hikuva ndzi ku lerisa namuntlha ku rhandza Yehovha, Xikwembu xa wena, ni ku famba etindleleni ta yena, ni ku hlayisa milawu ya yena, ni timhaka ta yena, ni ku lerisa ka yena, hi kona u nga ta hanya, ni ku andza, kutani Yehovha, Xikwembu xa wena, xi ta ku katekisa etikweni leri u nga ta nghena eka rona ku ri fuma.

¹⁷Kambe loko mbilu ya wena yi hunguka, ni loko u nga yingisi, kambe u pfumela ku kokiwa ni ku khinsama emahlweni; ka swikwembu swin'wana, ni ku swi tirhela,

¹⁸ndza mi byela namuntlha leswaku mi ta lova kunene; mi nga ka mi nga lehiseriwi masiku ya n'wina emisaveni leyi u nga ta nghena eka yona ku yi fuma loko u perile Yordani.

¹⁹“Namuntlha ndzi vitana tilo ni misava, ti va timbhoni ta mina emahlweni ka n'wina, leswaku ndzi vekile emahlweni ka wena vutomi ni rifu, ku kateka ni ku rhukana; hlawula vutomi leswaku u hanya, wena ni vatukulu va wena,

²⁰u ri karhi u rhandza Yehovha, Xikwembu xa wena, u yingisa rito ra yena ni ku namarhela yena; hikuva hi yena la nga ku hanya ka wena, ni ku leha ka masiku ya wena, leswaku u ta aka emisaveni leyi Yehovha a hlambanyeleke vatata wa wena, Abrahama, na Isaka, na Yakobo, ku va nyika yona.”