Read Xitsonga Deuteronomy 31 Bible Online

Deuteronomy 31 - Xitsonga bible

Deuteronomy 31

¹Muxe a ya byela marito lawa eka Vaisraele hinkwavo, a ku eka vona:

²“Namuntlha ndzi ni malembe ya 120; ndzi ta hluleka ku huma ni ku nghena exikarhi ka n'wina, kambe Yehovha u te eka mina: ‘U nga ka u nga peli Yordani loyi.’

³Yehovha, Xikwembu xa wena, u ta va loyi a pelaka emahlweni ka wena, ni la nga ta heta matiko lawa emahlweni ka wena, leswaku u ma fuma. Yoxuwa u ta va loyi a pelaka emahlweni ka wena, hilaha Yehovha a vuleke hakona.

⁴Yehovha u ta va endlela kukotisa leswi a endleleke Sihoni na Ogo, tihosi ta Vaamori, ni matiko ya vona lawa a ma heteke.

⁵Yehovha u ta va nyiketa emavokweni ya n'wina, kutani mi ta va endla hi ku lerisa hinkwako loku ndzi mi leriseke hakona.

⁶Tiyisani mbilu, mi tiya! Mi nga chaveni, kambe mi nga chavisiwi hi vona, hikuva Yehovha, Xikwembu xa wena, a famba emahlweni ka wena, a nga ka a nga ku siyi, a nga ka a nga ku tshiki.”

⁷Kutani Muxe a vitana Yoxuwa, a ku eka yena emahlweni ka Vaisraele hinkwavo: “Tiyisa mbilu, u tiya, hikuva hi wena la nga ta nghena ni tiko leri etikweni leri Yehovha a hlambanyeleke vatata wa vona ku va nyika rona, hi wena, kambe loyi u nga ta va nyika rona leswaku va ri fuma.

⁸Yehovha u ta famba emahlweni ka wena, u ta va na wena; a nga ka a nga ku tshiki, a nga ka a nga ku siyi; u nga chavi, u nga heli mbilu.”

⁹Muxe a tsala nawu lowu, kutani a wu nyika vaprista, vana Valevhi, lava rhwalaka areka ya ntwanano wa Yehovha, ni hinkwavo vakulukumba va Israele.

¹⁰Muxe a va lerisa a ku: “Loko ku hundzile malembe ya 7, hi nkarhi wa lembe ra ku tshunxeka, enkhubyeni wa Mitsonga,

¹¹kutakuloko Vaisraele hinkwavo va ta ku humelela emahlweni ka Yehovha, Xikwembu xa wena, endhawini leyi a nga ta yi hlawula, u ta hlaya nawu lowu emahlweni ka Vaisraele hinkwavo, va wu yingisa.

¹²Hlengeleta tiko, vavanuna, ni vavasati, ni vana, ni muluveri wa wena la nga emitini ya wena, va ta swi yingisa va ta dyondza ku chava Yehovha, Xikwembu xa n'wina, va chivirika ku hlayisa marito hinkwawo ya nawu lowu.

¹³Kutani vana va vona lava nga wu tivangiki, va ta wu yingisa, va dyondza ku chava Yehovha, Xikwembu xa n'wina, hi masiku hinkwawo lawa mi nga ta hanya etikweni leri mi nga ta nghena eka rona ku ri fuma, loko mi perile Yordani.”

¹⁴Yehovha a ku eka Muxe: “Waswivo! Masiku ya rifu ra wena ma tshinela. Vitana Yoxuwa, mi ta yima etabernakeleni ya nhlengeletano, hi kona ndzi nga ta n'wi lerisa.” Kavaloko Muxe a suka na Yoxuwa, va ya yima etabernakeleni ya nhlengeletano.

¹⁵Kutani Yehovha a humelela etabernakeleni, epapeni leri yimeke enyangweni wa tabernakela.

¹⁶Yehovha a ku eka Muxe: “Waswivo, u ta ya etlela ni vatata wa wena; kambe tiko leri ri ta pfuka ri ya oswana ni swikwembu swin'wana swa misava leyi ri nga ta nghena eka yona; ri ta ndzi tshika, kutani ri ta tlula ntwanano wa mina lowu ndzi wu endleke na rona.

¹⁷Kambe vukari bya mina byi ta va pfurhela hi siku lero, kutani ndzi ta va tshika, ndzi va fihlela mombo wa mina, va ta dyiwa, kutani makhombo layo tala ni nhlomulo swi ta va wela ehenhla kutani va ta ku hi siku leri: ‘A hi leswi Xikwembu xa mina xi nga riki xikarhi ka hina leswi makhombo lawa ma ndzi weleke ehenhla xana?’

¹⁸Loko ndzi ri mina ndzi ta fihla kunene mombo wa mina hi siku lero, hikwalaho ka leswo biha hinkwaswo leswi a nga ta swi endla hikuva u ta hundzukela eka swikwembu swin'wana.

¹⁹“Kutani sweswi titsaleleni risimu leri mi ri dyondzisa vana va Israele, u ri nghenisa emilon'wini ya vona, leswaku risimu leri ri va mbhoni ya mina eka vana va Israele.

²⁰Kutakuloko ndzi va nghenisile etikweni leri ndzi ri hlambanyeleke vatata wa vona, tiko leri khulukaka ntswamba ni vulombe ni loko va dyile, kutani va xurhile va nonile, ni loko va hundzukele ka swikwembu swin'wana, va swi tirhela, ni loko va ndzi sandzile kambe va tlurile ntwanano wa mina,

²¹ni loko makhombo layo tala ni nhlomulo swi va wela ehenhla, hi kona risimu leri ri nga ta hlamula yi va mbhoni emahlweni ka vona; hikuva ri nga ka ri nga rivariwi emilon'wini ya vatukulu va vona. Hikuva ndza tiva miehleketo ya namuntlha ya timbilu ta vona, ndzi nga si va nghenisa etikweni leri ndzi va hlambanyeleke rona.”

²²Kavaloko Muxe a tsala risimu leri hi siku lero, kutani a ri dyondzisa vana va Israele.

²³Yehovha a lerisa Yoxuwa, n'wana Nuni, a ku eka yena: “Tiyisa mbilu, u tiya, hikuva hi wena la nga ta nghenisa vana va Israele etikweni leri ndzi va hlambanyeleke rona; kambe mina, ndzi ta va na wena.”

²⁴Kuteloko Muxe a hetile ku tsala marito ya nawu lowu ebukwini,

²⁵a lerisa Valevhi lava, rhwalaka areka ya ntwanano wa Yehovha, a ku:

²⁶“Tekani buku leyi ya nawu, mi yi veka ekusuhi ni areka ya ntwanano wa Yehovha, Xikwembu xa n'wina, yi va mbhoni kona emahlweni ka wena.

²⁷Hikuva ndza tiva ku kaneta ka wena ni ku nonon'hwa ka nhamu ya wena; ni namuntlha leswi ndza ha hanyaka exikarhi ka n'wina, ma ha kaneta Yehovha, kambe swi ta ku yini loko ndzi ta va ndzi file!

²⁸Hlengeletani ka mina vakulukumba hinkwavo va tinyimba ta n'wina, ni tindhuna ta n'wina; ndzi ta va byela marito lawa etindleveni ta vona, ndzi ta teka matilo ni misava, ti va timbhoni ta mina emahlweni ka vona.

²⁹Hikuva ndza swi tiva leswaku kutakuloko ndzi file, mi ta tionha kunene, kambe mi ta hambuka endleleni leyi ndzi mi leriseke yona; kutani khombo ri ta mi fikela emikarhini leyi nga ta ta; hikuva mi ta endla leswo biha emahlweni ka Yehovha; mi ta n'wi karihisa hi mitirho ya mavoko ya n'wina.”

³⁰Kutani Muxe a byela nhlengeletano hinkwayo ya Israele marito ya risimu leri, ri ko ri hela.