Read Xitsonga Deuteronomy 34 Bible Online

Deuteronomy 34 - Xitsonga bible

Deuteronomy 34

¹Kutani Muxe a suka etimbaleni ta Mowabu, a va khandziya entshaveni ya Nebo, enhlohlorhini ya Pisga, leyi langutaneke na Yeriko. Kutani Yehovha a n'wi kombisa tiko hinkwaro: ra Giliyadi ni ku ya fika eDani,

²na Neftali hinkwawo, ni tiko ra Efrayimi, ni ra Manase, ni tiko hinkwaro ra Yuda ku ya fika eLwandle ra Vupeladyambu;

³ni le dzongeni, ni tlhelo ra Yordani, nkova wa Yeriko, muti wa mimpfun'wana, ku fika eSowara.

⁴Yehovha a ku eka yena: “Hi rona tiko leri ndzi ri hlambanyeleke Abrahama, na Isaka, na Yakobo, loko ndzi te: ‘Ndzi ta ri nyika vatukulu va wena; ndzi ku kombisile rona emahlweni ya wena, kambe u nga ka u nga peleli ka rona.’ ”

⁵Kavaloko Muxe, nandza wa Xikwembu, a fa kona, etikweni ra Mowabu, hi ku lerisa ka Yehovha.

⁶Kutani Yehovha a n'wi lahla enkoveni, etikweni ra Mowabu, ku langutene na Beta-Peyori; kambe a ku na munhu la tivaka sirha ra yena ku fika namuntlha.

⁷Muxe a a ri ni malembe ya 120 loko a fa; mahlo ya yena ma nga tsananga, ni matimba ya yena ma nga helanga.

⁸Vana va Israele va rila Muxe erivaleni ra Mowabu hi masiku ya makume manharhu, kutani masiku ya ku rila Muxe ma hela.

⁹Kambe Yoxuwa, n'wana Nuni, a tala moya wa vutlhari, hikuva Muxe a a n'wi tlhandlekile mavoko ya yena ehenhla. Vana va Israele va n'wi yingisa, va endla hilaha Yehovha a leriseke Muxe hakona.

¹⁰A ku pfukanga eIsraeleni muprofeta kukotisa Muxe loyi Yehovha a nga n'wi tiva hi xivumbeko,

¹¹hambi ku ri hi masingita ni mahlori lawa Yehovha a n'wi leriseke ku ma endla etikweni ra Egipta, emahlweni ka Faro, ni le mahlweni ka malandza ya yena hinkwawo, ni le mahlweni ka tiko hinkwaro;

¹²hambi ku ri hi voko ra matimba ni mitirho hinkwayo leyi chavisaka leyi Muxe a yi endleke emahlweni ka Vaisraele hinkwavo.