Read Xitsonga Deuteronomy 7 Bible Online

Deuteronomy 7 - Xitsonga bible

Deuteronomy 7

¹“Kutakuloko Yehovha, Xikwembu xa wena, a ku nghenisile etikweni leri u yaka eka rona ku ri fuma, ni loko xi hlongorile emahlweni ka wena matiko layo tala, va nga Vahiti, ni Vagirigaxi, ni Vaamori, ni Vakanana, ni Vaperesi, ni Vahivhi, ni Vayebusi, ma nga matiko lama ku tlulaka hi ku tala ni matimba,

²ni loko Yehovha, Xikwembu xa wena, a va nyiketile emahlweni ka wena, kutani u va hlurile, u ta va heta, u va yirisa; u nga tshuki u endla xinakulobye na vona, ni ku va tsetselela.

³U nga tshuki u va ni ku tekana na vona; u nga tshuki u nyika vanhwanyana va wena eka vana va vona; kambe u nga tshuki u tekela vana va wena vanhwanyana va vona,

⁴hikuva va ta hambukisa vana va wena ekule na mina, va ya tirhela swikwembu swin'wana, kutani vukari bya Yehovha ingi byi ta mi pfurhela, a mi heta kan'we.

⁵Kambe mi ta va endlisa sweswo: mi ta hlanhla magandzelo ya vona, mi faya swifaniso swa vona, mi wisa swifaniso swa vona swa Axera, mi hisa ni swifaniso swa vona leswi vatliweke.

⁶Hikuva u tiko leri hlawuleriweke Yehovha, Xikwembu xa wena; Yehovha, Xikwembu xa wena, u ku hlawurile leswaku u va tiko ra yena hi xiviri exikarhi ka matiko hinkwawo lama nga emisaveni.

⁷Yehovha a nga namarhelangi eka n'wina, na swona a nga mi hlawulanga leswi mi tlulaka hi ku tala matiko hinkwawo, hikuva tiko ra n'wina hi leritsongo eka matiko hinkwawo;

⁸kambe hi leswi Yehovha a mi rhandzaka, naswona a hlayisa ku hlambanya loku a ku hlambanyeleke vatata wa n'wina; hikwalaho ka swona Yehovha a mi humeseke hi voko ra matimba, kambe u ku kutsurile endlwini ya vukhumbi, evokweni ra Faro, hosi ya Egipta.

⁹U ta tiva leswaku i Yehovha, Xikwembu xa wena, la nga Xikwembu, Xikwembu lexi tshembekaka, lexi hlayisaka ntwanano wa xona ni tintswalo, ku fika etinxakeni ta khume ra madzana, eka lava n'wi rhandzaka, ni ka lava hlayisaka milawu ya yena;

¹⁰kambe u rihisa lava n'wi vengaka, hi ku va heta; a nga hlweri ku rihisa la n'wi vengaka.

¹¹U ta hlayisa milawu ni timhaka ni ku lerisa: leswi ndzi ku lerisaka namuntlha, u ta swi endla.

¹²“Kungakuloko mi yingisa ku lerisa loku, ni loko mi ku hlayisa, ni loko mi endla hakona, Yehovha, Xikwembu xa wena, u ta ku hlayisela ntwanano ni tintswalo, leswi a swi hlambanyeleke vatata wa wena;

¹³u ta ku rhandza, a ku katekisa, a ku andzisa, u ta katekisa vana va khwiri ra wena, ni mihandzu ya masimu ya wena, ni mavele ya wena, ni swakunwa swa wena, ni mafurha ya wena, ni ku tswala ka tihomu ni tinyimpfu ta wena, emisaveni leyi a hlambanyeleke vatata wa wena ku ku nyika yona.

¹⁴U ta tlula hi ku kateka matiko hinkwawo; ku nga ka ku nga vi na mhika eka rikwenu, hambi a ri wanuna, hambi wansati, hambi swi ri swifuwo emitlhambini ya wena.

¹⁵Yehovha u ta hlongola vuvabyi hinkwabyo ekule na wena; a nga ka a nga ku vavisi hi xin'we xa swivabyi leswo biha swa Egipta, leswi u swi tivaka, kambe u ta vavisa ha swona hinkwavo lava ku vengaka.

¹⁶“U ta heta matiko hinkwawo lawa Yehovha, Xikwembu xa wena, a ku nyikaka wona, u nga ka u nga ma languti hi tintswalo, kambe u nga tshuki u tirhela swikwembu swa wona, hikuva wu ta va ntlhamu eka wena.

¹⁷Kambe loko u vula embilwini ya wena u ku: ‘Matiko lawa, ma ndzi tlula hi ku tala; ndzi ta va tekerisa ku yini tiko xana?’

¹⁸U nga tshuki u va chava! Tsundzuka swinene leswi Yehovha, Xikwembu xa wena, a swi endleke Faro na Egipta hinkwaro,

¹⁹miringo leyikulu leyi voniweke hi mahlo ya wena, ni swikombiso ni masingita, ni xandla xa matimba, ni voko leri tshambulukeke, swi ri leswi Yehovha, Xikwembu xa wena a ku humeseke ha swona: Yehovha, Xikwembu xa wena, u ta endlisa sweswo eka matiko hinkwawo lawa u ma chavaka.

²⁰Na swona Yehovha, Xikwembu xa wena, a ta va rhumela mimpfi ku ko ku herisiwa lava nga ta sala, lava tifihleke emahlweni ka wena.

²¹U nga tshuki u chava emahlweni ka vona, hikuva Yehovha, Xikwembu xa wena, u kona exikarhi ka wena, xi ri Xikwembu lexikulu, lexi chavisaka.

²²Yehovha, Xikwembu xa wena, u ta hlongola matiko lawa ha rin'we emahlweni ka wena, u nga ka u nga va heti kan'we, hikuva swivandzana swa nhova swi nga ku andzela.

²³Yehovha, Xikwembu xa wena, u ta va nyiketa emavokweni ya wena, u va pfilunganyisa, va ko va herisiwa;

²⁴a ta neha tihosi ta vona emavokweni ya wena, kutani u ta hlangula mavito ya tona ehansi ka tilo. A ku na munhu la nga ta tiya emahlweni ka wena u ko u va heta.

²⁵“Mi ta hisa endzilweni swifaniso leswi vatliweke swa swikwembu swa vona; u nga tshuki u navela silivhere ni nsuku lowu nga ehenhla ka swona, kambe u nga tshuki u titekela swona leswaku wu nga tshuki wu va ntlhamu eka wena, hikuva swa yila emahlweni ka Yehovha, Xikwembu xa wena.

²⁶U nga tshuki u nghenisa leswi yilaka endlwini ya wena, leswaku u nga tshuki u yila kukotisa swilo leswo; u ta swi chava ngopfungopfu, ma ta va manyala eka wena, hikuva swa yila.