Read Xitsonga John 1 Bible Online

John 1 - Xitsonga bible

John 1

¹Eku sunguleni Rito a ri ri kona, Rito a ri ri ni Xikwembu, kutani Rito a xi ri Xikwembu.

²Rito lero a ri ri eka Xikwembu eku sunguleni.

³Swilo hinkwaswo swi endliwile hi rona, kutani exikarhi ka swilo leswi endliweke, a ku na xilo lexi endliweke handle ka rona.

⁴Vutomi a byi ri eka rona, kutani vutomi a byi ri ku vonakala ka vanhu.

⁵Ku vonakala ku voninga munyama, kambe Munyama a wu ku amukelanga.

⁶Ku humelele munhu la rhumiweke hi Xikwembu, vito ra yena a a ri Yohane.

⁷A a tile ku va mbhoni, leswaku a vula timhaka ta ku vonakala leswaku hinkwavo va pfumela ha yena.

⁸A a nga ri yena ku vonakala, kambe a a rhumiwile leswaku a ta va mbhoni ya ku vonakala.

⁹A ku ri kona ku vonakala lokunene loku voningaka munhu un'wana ni un'wana la tumbulukaka la emisaveni.

¹⁰Rito a ri ri emisaveni, kutani misava yi endliwile hi rona, kambe misava a yi ri tivanga.

¹¹Ri tile ekaya ka rona, kambe varikwavo a va ri amukelanga.

¹²Kambe hinkwavo lava nga ri amukela, ri va nyikile matimba ya ku endliwa vana va Xikwembu, va nga lava pfumelaka hi vito ra rona;

¹³lava nga velekiwangiki hi ngati, ni loko ku ri hi ku rhandza ka nyama, kumbe hi ku rhandza ka munhu, kambe va velekiwile hi Xikwembu.

¹⁴Kutani Rito ri endliwile nyama, ri akile exikarhi ka hina, kambe hi hlalele ku vangama ka rona, ku nga ku vangama ka N'wana la nga swakwe, la humaka eka Tatana, a tele tintswalo ni vunene.

¹⁵Yohane a n'wi vula vumbhoni, a huwelela, a ku: “Hi yena loyi ndzi nga n'wi vula loko ndzi te: ‘La taka endzhaku ka mina, u ndzi rhangele, hikuva a a ri emahlweni ka mina.’ ”

¹⁶Kutani hi amukele hinkwerhu tintswalo ehenhla ka tintswalo, ti huma eku taleriweni ka yena.

¹⁷Hikuva nawu wu nyikiwile hi Muxe; kambe tintswalo ni vunene swi humelele hi Yesu Kriste.

¹⁸Xikwembu a xi voniwanga hi munhu ni siku ni rin'we; N'wana la nga swakwe, la nga exifuveni xa Tatana, hi yena loyi a nga hi tivisa xona.

¹⁹Hi byo lebyi vumbhoni bya Yohane, siku Vayuda va rhumeke vaprista ni Valevhi, va huma eYerusalema, va ya n'wi vutisa, va ku: “Wena, u mani xana?”

²⁰A vula erivaleni, a nga kanetanga, a tivula, a ku: “A hi mina Kriste.”

²¹Kutani va n'wi vutisa, va ku: “U mani-ke? U Eliya xana?” A ku: “A ndzi yena.” “Kumbe u muprofeta xana?” A hlamula, a ku: “E-e.”

²²Kutani va ku eka yena: “U mani xana, hi ta tiva ku hlamula lava hi rhumeke? U ri yini loko u tivula?”

²³A ku: “Mina ndzi rito ra la huwelelaka emananga, leri nge: Lunghisani ndlela ya Hosi hilaha muprofeta Esaya a nga vula hakona.”

²⁴Lava ngi va rhumiwile a va ri Vafarisi.

²⁵Va tlhela va n'wi vutisa, va ku: “Loko u nga ri Kriste, u nga ri Eliya, u nga ri muprofeta, u khuvulela yini-ke?” Yohane a va hlamula, a ku:

²⁶“Loko ndzi ri mina ndzi khuvula hi mati, kambe un'wana u kona exikarhi ka n'wina, loyi mi nga n'wi tiviki;

²⁷hi yena la taka endzhaku ka mina, loyi a ndzi rhangeleke, loyi ndzi nga faneriki ku tshunxa tinghole ta tintanghu ta yena.”

²⁸Timhaka teto ti humelele eBetaniya entsungeni wa Yordani laha Yohane a nga khuvula kona.

²⁹Siku leri tlhandlamaka, Yohane loko a vona Yesu a ta eka yena, a ku: “Vonani Xinyimpfana xa Xikwembu, lexi susaka xidyoho xa misava.

³⁰Hi yena loyi ndzi n'wi vuleke, ndzi ku: ‘Endzhaku ka mina ku ta wanuna la ndzi rhangeleke, hikuva a a ri kona emahlweni ka mina.’

³¹Na mina a ndzi nga n'wi tivi, kambe ndzi tile ku khuvula hi mati leswaku a ta kombisiwa Israele.”

³²Yohane a engeta a vula vumbhoni bya yena, a ku: “Ndzi vonile Moya wu xika hi le tilweni, wu fana ni tuva, wu ta tshamisa ehenhla ka yena.

³³Na mina a ndzi nga n'wi tivi, kambe la ndzi rhumeke ku khuvula hi mati u ndzi byerile, a ku: ‘Loyi u nga ta vona Moya wu xikela eka yena, wu tshamisa ehenhla ka yena, hi yena la khuvulaka hi Moya lowo Kwetsima.’

³⁴Kutani ndzi swi vonile, kambe ndzi vurile vumbhoni bya mina leswaku loyi i N'wana wa Xikwembu.”

³⁵Siku leri tlhandlamaka, Yohane a a yimile kambe ni vadyondzisiwa va yena vambirhi.

³⁶Kakuloko a vona Yesu a hundza, a ku: “Vonani Xinyimpfana xa Xikwembu.”

³⁷Vadyondzisiwa volavo vambirhi, loko va n'wi twa a vula sweswo, va landza Yesu.

³⁸Yesu, kuteloko a rhendzelekile, a va vona va n'wi landza, a ku eka vona: “Mi lava yini?” Va ku eka yena:

³⁹“Rabi” (hileswaku Mufundhisi) “u tshama kwihi?” A ku eka vona: “Tanani, mi ta vona.” Va ku ya, va ya vona laha a tshamaka kona; kutani va xwa siku rero na yena; a ku lava ku va nkarhi wa khume.

⁴⁰Andriya, makwa Simoni Petro, a a ri un'wana wa lavambirhi lava tweke Yohane loko a vurisa sweswo, kutani va landza Yesu.

⁴¹Yena a rhanga a kuma Simoni makwavo, a ku eka yena: “Hi kumile Mesiya” (hileswaku Kriste muhlawuriwa).

⁴²Kutani a n'wi yisa eka Yesu. Yesu, kuteloko a n'wi langutile, a ku: “U Simoni n'wana Yona; u ta thyiwa Kefasi” (hileswaku Petro).

⁴³Siku leri tlhandlamaka, a rhandza ku ya eGaleliya, kutani a kuma Filipi, a ku eka yena: “Ndzi landze.”

⁴⁴Filipi a a ri munhu wa le Betsayida, muti wa va Andriya na Petro.

⁴⁵Filipi a kuma Nataniele, a ku eka yena: “Hi vonile loyi Muxe a tsaleke timhaka ta yena enawini, ni vaprofeta va ti tsarile; i Yesu wa Nazareta, n'wana Yosefa.”

⁴⁶Nataniele a ku eka yena: “Xana xilo lexinene xi nga huma eNazareta xana?” Filipi a ku eka yena: “Tana u ta swi vona.”

⁴⁷Yesu a vona Nataniele loko a ta eka yena, kutani a n'wi vula, a ku: “Vonani Muisraele wa xiviri, loyi ku nga riki na ku kanganyisa eka yena.”

⁴⁸Nataniele a ku eka yena: “U ndzi tiva ha yini?” Yesu a n'wi hlamula, a ku: “Filipi a nga si ku vita, ndzi ku vonile u ri ehansi ka nkuwa.”

⁴⁹Nataniele a hlamula, a ku eka yena: “Rabi, u N'wana wa Xikwembu, u Hosi ya Israele.”

⁵⁰Yesu a hlamula, a ku eka yena: “U pfumela hi leswi ndzi nga te eka wena: Ndzi ku vonile ehansi ka nkuwa; u ta vona leswikulu ku tlula leswi.”

⁵¹A engeta a ku eka yena: “Kunenenene ndzi ri eka n'wina: Ku sungula sweswi, mi ta vona tilo ri pfuriwile, ni tintsumi ta Xikwembu ti ri karhi ti tlhandluka, ti va ti xikela ehenhla ka N'wana wa munhu.”