Read Xitsonga John 12 Bible Online

John 12 - Xitsonga bible

John 12

¹Kakuloko masiku ya ntlhanu na rin'we ma ha sele, kutani Paseka yi ta va kona, Yesu a fika eBetaniya laha Lazaro ingi a akile kona, loyi ingi a file, kutani a pfuxiwe hi yena eku feni.

²A endleriwa xilalelo kona, kutani Marta a a va tirhela. Lazaro a a ri un'wana wa lava tshameke eswakudyeni na yena.

³Kutani Mariya a teka mafurha yo nun'hwela ya narda leyi tengeke, ya nxavo wa nkoka, a tota milenge ya Yesu, kutani a n'wi sula milenge hi misisi ya yena; yindlu yi tala hi ku nun'hwela ka mafurha.

⁴Kavaloko un'wana wa vadyondzisiwa va yena, Yudasi Iskariyota, n'wana Simoni, loyi ingi a ta n'wi xenga, a ku:

⁵“Mafurha lawa, a ma xavanga ha yini-ke tidenari ta madzana manharhu, ti nyikiwa swisiwana?”

⁶A vurisa sweswo, ku nga ri ku hlayisa swisiwana, kambe hikuva a a ri khamba; kutani hi yena la tameleke xikwamana xa mali a teka leswi nghenisiwaka kona.

⁷Kambe Yesu a ku: “N'wi tshikeni, u ma hlayisele siku ra ku lahliwa ka mina.

⁸Hikuva loko swi ri swisiwana, mi ta va na swona hi masiku; kambe mina, mi nga ka mi nga vi na mina hi masiku.”

⁹Vayuda lavo tala ngopfu va twa leswaku a a ri kona kwalaho, kutani va ta, ku nga ri hikwalaho ka Yesu ntsena, va ta ni ku ta vona Lazaro, loyi a nga n'wi pfuxa eku feni.

¹⁰Kutani vaprista lavakulu va kanela makungu swin'we ku dlaya na yena Lazaro.

¹¹Hikuva Vayuda lavo tala a va va tshikile hikwalaho ka yena, va pfumela eka Yesu.

¹²Ni mixo, vunyingi lebyikulu bya vanhu lava teke enkhubyeni, kuteloko va twa leswaku Yesu wa ta eYerusalema,

¹³va teka marhavi ya mirhi ya micindzu, kutani va huma va ya hlangana na yena, va huwelela, va ku: “Hosanna! A ku khensiwe Hosi ya Israele la taka hi vito ra Hosi!”

¹⁴Kuteloko Yesu a kumile ximbhongolwana, a xi khandziya, hilaha ku nga tsariwa, va ku:

¹⁵“U nga chavi, n'wana Siyoni; vona, Hosi ya wena hi yoleyo, ya ta, yi khandziyile n'wana wa mbhongolo.”

¹⁶Enkarhini wolowo, vadyondzisiwa va yena a va twisisangi mhaka yoleyo; kambe, kuteloko Yesu a dzunisiwile va anakanya leswaku timhaka teto a ti tsariwile ehenhla ka yena, ni leswaku va n'wi endlisile sweswo.

¹⁷Kambe ntshungu lowu ngi wu ri na yena a wu vula vumbhoni, va ku: “U vitanile Lazaro esirheni, a n'wi pfuxa eku feni.”

¹⁸Hikwalaho lavo tala a va yile va ya hlangana na yena hikuva a va twile mahlori lama endliweke hi yena.

¹⁹Vafarisi va byelana hakona, va ku: “Langutani, a ma ha pfuni nchumu; ma swi vona leswaku tiko hinkwaro ra n'wi landzelela.”

²⁰A ku ri ni Vagriki exikarhi ka lava teke enkhubyeni ku ta khongela.

²¹Kutani va ta eka Filipi wa Betsayida wa Galeliya, va n'wi khongela, va ku: “Hosi, hi rhandza ku vona Yesu.”

²²Filipi a ta ya byela Andriya, kutani Andriya na Filipi va ya byela Yesu.

²³Yesu a va hlamula, a ku: “Nkarhi wu tile lowu N'wana wa Munhu a nga ta dzunisiwa ha wona.

²⁴Ndzi vurisile ndzi ri eka n'wina: Kungakuloko ndzhoho ya mavele leyi weleke emisaveni yi nga fi, yi ta tshama yi ri yoxe; kambe loko yi fa, yi ta veka ngopfu.

²⁵La rhandzaka vutomi bya yena u ta lahlekeriwa ha byona; kambe; la vengaka vutomi bya yena emisaveni leyi, u ta byi hlayisela evutomini lebyi nga heriki.

²⁶Kungakuloko munhu a ndzi tirhela, a a ndzi landze; kutani laha ndzi nga kona la, ndzi tirhelaka, na yena u ta va kona; loko munhu a ndzi tirhela, Tatana u ta n'wi dzunisa.

²⁷“Sweswi, moya wa mina wa vaviseka; kutani ndzi to yini? ‘Tatana, ndzi ponise enkarhini lowu’? Kambe hi wona nkarhi lowu ndzi teleke wona.

²⁸Tatana, dzunisa vito ra wena!” Kwalaho rito ri fika, ri huma etilweni, ri ku: “Ndzi ri dzunisile, ndzi ta engeta ndzi ri dzunisa.”

²⁹Ntshungu lowu yimeke kwalaho, loko wu swi twa, va ku: “Ri pfumile.” Van'wana va ku: “Ntsumi yi vulavurile na yena.”

³⁰Yesu a hlamula a ku: “Rito rero, a ri twalelanga mina, kambe ri twalele n'wina.

³¹Sweswi, ku avanyisa ka misava leyi, ku kona; kutani hosi ya misava leyi, yi ta hlongoleriwa ehandle.

³²Kutani mina, kutakuloko ndzi ta va ndzi tlakusiwile emisaveni, ndzi ta kokela vanhu hinkwavo eka mina.”

³³A vurisa sweswo ku ringanisa rifu leri a nga ta fa ha rona.

³⁴Vunyingi byi n'wi hlamula, byi ku: “Hi twile enawini leswaku Kriste u ta va kona hilaha ku nga heriki; kutani wena u vurisa ku yini, loko u ku: Ku fanele leswaku N'wana wa Munhu a tlakusiwa? N'wana wa Munhu loyi, i mani xana?”

³⁵Kutani Yesu a ku eka vona: “Ma ha ri ni ku vonakala hi nkarhi wu nga ri wungani; Fambani loko ma ha ri ni ku vonakala, leswaku munyama wu nga ti mi kuma; hikuva la fambaka emunyameni, a nga tivi laha a yaka kona.

³⁶Loko ma ha ri ni ku vonakala, pfumelani ku vonakala, mi ta hundzuka vana va ku vonakala.” Yesu a vula timhaka teto, kutani a suka eka vona a ya tumbela.

³⁷Kutani, hambi a endlile masingita layonghasi emahlweni ka vona, a va pfumelanga eka yena;

³⁸leswaku ku ta endlakala ku vulavula ka muprofeta Esaya loko a te: “Hosi, i mani la pfumeleke eku dyondziseni ka hina? Voko ra Hosi ri vonakele eka mani xana?”

³⁹Hikwalaho va tsandzeka ku pfumela, hikuva Esaya u engetile, a ku:

⁴⁰“U phumerisile mahlo ya vona, u nonon'hwisile timbilu ta vona, leswaku va nga tshuki va vona hi mahlo, va nga tshuki va twisisa hi timbilu va nga tshuki va hundzuka, kutani ndzi nga tshuki ndzi va hanyisa.”

⁴¹Esaya u vurile timhaka teto loko a vona ku kwetsima ka yena, ni loko a vula ta yena.

⁴²Hambiswiritano, lavo tala, ni le xikarhi ka vakulukumba, va pfumela eka yena; kambe a va nga tivuli hikwalaho ka Vafarisi, leswaku va nga hlongoriwi emasinagogeni.

⁴³Hikuva va rhandzile ku dzunisiwa loku humaka eka vanhu ku tlurisa ku dzunisiwa loku humaka eka Xikwembu.

⁴⁴Kutani Yesu a huwelela, a ku: “La pfumelaka eka mina, a nga pfumeri eka mina, kambe u pfumela eka la ndzi rhumeke;

⁴⁵kutani la ndzi hlalelaka, u hlalela la ndzi rhumeke.

⁴⁶Mina, ndzi nga ku vonakala, ndzi tile emisaveni leswaku un'wana ni un'wana la pfumelaka eka mina, a nga tshuki a tshama emunyameni.

⁴⁷Kungakuloko un'wana a yingisile marito ya mina, kutani a nga ma hlayisi, a ndzi n'wi avanyisi, hikuva a ndzi telanga ku avanyisa misava, kambe ku hanyisa misava.

⁴⁸La ndzi alaka, a nga amukeri marito ya mina, u ni la n'wi avanyisaka; rito leri ndzi nga ri vula, hi rona leri nga ta n'wi avanyisa hi siku ra makumu.

⁴⁹Hikuva a ndzi vulavulanga ndzi tisungulela swa mina; kambe Tatana la ndzi rhumeke, hi yena la ndzi leriseke leswi ndzi swi vulaka, ni mukhuva lowu ndzi swi vulaka ha wona;

⁵⁰kambe ndza swi tiva leswaku nawu wa yena i vutomi lebyi nga heriki; kutani sweswi, leswi ndzi swi vulaka, ndzi swi vula hilaha Tatana a ndzi byeleke hakona.”