Read Xitsonga John 18 Bible Online

John 18 - Xitsonga bible

John 18

¹Kuteloko Yesu a vulavurile timhaka teto, a huma ni vadyondzisiwa va yena, a pelela entsungeni wa xinambyana xa Kedroni, laha nsimu ingi yi ri kona; a ya nghena kona ni vadyondzisiwa va yena.

²Yudasi la nga n'wi xenga, na yena a a tiva xivandla xexo; hikuva Yesu ni vadyondzisiwa va yena a va hamba va hlengeletana kona.

³Kutani Yudasi a teka ntlawa, ni malandza lama rhumiweke hi vaprista lavakulu ni Vafarisi, va ta ni mavoningo, ni swisa, ni matlhari.

⁴Yesu, hi ku tiva hinkwaswo leswi nga ta n'wi humelela, a humela eka vona, a ku eka vona: “Mi lava mani xana?”

⁵Va n'wi hlamula, va ku: “Yesu wa Nazareta.” Yesu a ku eka vona: “Hi mina loyi.” Na yena Yudasi la n'wi xengaka, a a yimile na vona.

⁶Kuteloko a va byerile, a ku: “Hi mina loyi,” va ku tlheke, hi le ndzhaku, va wela ehansi.

⁷A tlhela a va vutisa, a ku: “Mi lava mani?” Va ku: “Yesu wa Nazareta.”

⁸Yesu a hlamula, a ku: “Ndzi mi byerile ndzi ku: Hi mina loyi. Loko kunene mi lava mina, tshikani lava, va tifambela.”

⁹Hi leswaku ku hetiseka rito leri a nga ri vula, loko a te: “A ndzi lahlanga ni un'we wa lava u ndzi nyikeke vona.”

¹⁰Kambe Simoni Petro a a ri ni ripanga, kutani a ri hlomula, a tsema nandza wa muprista lonkulu, a n'wi phatlula ndleve ya xinene. Vito ra nandza yeloyi a a ri Malko.

¹¹Kambe Yesu a ku eka Petro: “Tlherisela ripanga ra wena enkotlotweni; xana u ri ndzi nga nwi ndzheko lowu ndzi wu nyikiweke hi Tatana?”

¹²Kutani vandla ni ndhuna ni malandza ya Vayuda, va khoma Yesu, va n'wi boha.

¹³Va n'wi yisa eka Anasi eku sunguleni hikuva a a ri mukon'wana wa Kayafasi, muprista lonkulu wa lembe rero.

¹⁴Hi yena Kayafasi, la nga tsundzuxa Vayuda leswaku swi nga saseka loko munhu a ri un'we a fela tiko hinkwaro.

¹⁵Kambe Simoni Petro a a landzelela Yesu, a ri ni mudyondzisiwa un'wana; mudyondzisiwa yeloyi a a tiviwa hi muprista lonkulu, kutani a nghena na Yesu exivaveni xa muprista lonkulu;

¹⁶kambe Petro a yima ehandle enyangweni. Kutani mudyondzisiwa yeloyi la tiviwaka hi muprista lonkulu, a humela ehandle, a vulavula ni mulanguteri wa nyangwa, a nghenisa Petro.

¹⁷Kutani nandza loyi wa wansati, a nga mulanguteri wa nyangwa, a ku eka Petro: “A ndzi ku na wena u un'wana wa vadyondzisiwa va munhu loyi xana?” A ku: “A ndzi yena.”

¹⁸Makhumbi ni malandza, lava ngi va ri kona, a va tshiverile ndzilo, va ri karhi va tinyawusa, hikuva a ku ri ni xirhami, na yena Petro a a yimile na vona, a nyawuka.

¹⁹Kutani, muprista lonkulu a vutisa Yesu ematshan'weni ya vadyondzisiwa va yena, ni ku dyondzisa ka yena.

²⁰Yesu a n'wi hlamula, a ku: “Ndzi vulavurile emahlweni ka vanhu erivaleni, ndzi dyondzisile emasinagogeni ni le tempeleni hi masiku hinkwawo, laha Vayuda va matlhelo hinkwawo va hlengeletanaka kona; a ndzi vulanga nchumu exihundleni;

²¹u ndzi vutisela yini? Vutisa lava nga ndzi twa leswi ndzi va byeleke swona; hi vona lava tivaka leswi ndzi swi vuleke.”

²²Kuteloko a vurisile sweswo, un'wana wa malandza lama nga yima kwalaho, a ba Yesu hi xihahati, a ku: “Xana u hlamurisa sweswo muprista lonkulu xana?”

²³Yesu a n'wi hlamula, a ku: “Loko ndzi vulavurile swo biha, komba xo biha xolexo, kambe loko ndzi vulavurile swinene, u ndzi bela yini xana?”

²⁴Kutani Anasi a n'wi rhumela eka Kayafasi, muprista lonkulu, a bohiwile.

²⁵Kambe Simoni Petro a a ri kwalaho, a tinyawusa. Kutani va ku eka yena: “Na wena a ku mudyondzisiwa un'wana wa yena xana?” A kaneta, a ku: “A ndzi wa vona.”

²⁶Un'wana wa malandza ya muprista lonkulu, a nga xaka ra loyi Petro a n'wi tsemeke ndleve, a ku eka yena: “Xana a ndzi ku vonanga u ri na yena entangeni xana?”

²⁷Kambe Petro a engeta a kaneta; kutani hi nomu lowu, nkuku wu ringa.

²⁸Kutani va suka eka Kayafasi wa ha ri mixo, va yisa Yesu ehubyeni; kambe vona a va nghenanga ehubyeni, swi ri leswaku va nga tinyamisi, va nga tivi ni ku dya Paseka.

²⁹Hikwalaho-ke Pilato a huma, a ya eka vona, a ku: “Xana mi hehla munhu loyi ha yini-ke?”

³⁰Va hlamula, va ku eka yena: “Loko ngi a nga dyohanga, ingi hi nga n'wi nehanga eka wena.”

³¹Pilato a ku eka vona: “N'wi tekeni mi ri n'wina, mi n'wi avanyisa hi nawu wa n'wina.” Kambe Vayuda va ku eka yena: “A hi pfumeleriwi ku dlaya munhu.”

³²Swi ri leswaku rito leri nga vuriwa hi Yesu ri hetiseka, leri a nga ri vula loko a fanisa rifu leri a nga ta fanela ku fa ha rona.

³³Pilato a tlhela a nghena ehubyeni a vitana Yesu, a ku eka yena: “U hosi ya Vayuda xana?”

³⁴Yesu a n'wi hlamula, a ku: “Xana wo tivulela mhaka leyi, kumbe ndzi vuriwile eka wena hi van'wana xana?”

³⁵Pilato a hlamula, a ku: “Xana u ri ndzi Muyuda-ke? Tiko ra rikwenu ni vaprista lavakulu va ku nehile eka mina; u endle yini xana?”

³⁶Yesu a hlamula, a ku: “Ku fuma ka mina a hi ka misava leyi; loko ku fuma ka mina a ku ri ka misava leyi, malandza ya mina a ma ta ndzi lwela; leswaku ndzi nga tshuki ndzi nyiketiwa Vayuda; kambe sweswi, ku fuma ka mina a hi ka la hansi.”

³⁷Kambe Pilato a ku eka yena: “Xana kunene u hosi-ke?” Yesu a n'wi hlamula, a ku: “Wa vurisa, ndzi Hosi; ndzi tswaleriwe byona vuhosi, kutani ndzi tele byona emisaveni, ndzi ta va mbhoni ya ntiyiso. Un'wana ni un'wana la nga wa ntiyiso, u yingisa rito ra mina.”

³⁸Pilato a ku eka yena: “Ntiyiso i yini xana?” Kuteloko a vurise sweswo, a tlhela a humela eka Vayuda, a ku eka vona: “A ndzi voni nandzu eka yena, ni wun'we.

³⁹Kambe mi ni xitoloveto xa leswaku ndzi mi tshunxela xidyohi hi siku ra Paseka; xana mi ri ndzi mi tshunxela Hosi ya Vayuda xana?”

⁴⁰Kambe va engeta va huwelela hinkwavo, va ku: “Ku nga ri loyi; a ku ve Barabasi.” Kasi Barabasi a a ri khamba.