Read Xitsonga John 19 Bible Online

John 19 - Xitsonga bible

John 19

¹Kavaloko Pilato a teka Yesu, a n'wi ba.

²Kutani tinhenha ti luka harhi ya mitwa, ti n'wi tlhandleka yona enhlokweni; ti n'wi funengeta hi nguvu ya xivunguvungu,

³ti ku: “Xewani, Hosi ya Vayuda!” Kambe ti n'wi ba hi swihahati.

⁴Pilato a engeta a humela ehandle, a ku eka vona: “Vonani, ndzi n'wi humesile ehandle eka n'wina, mi ta tiva leswaku a ndzi kumi nandzu eka yena hambi wu ri wun'we.”

⁵Yesu a humela ehandle, a tlhandlekiwile harhi ya mitwa enhlokweni, a funengele xivunguvungu. Kutani Pilato a ku eka vona: Hi yeloye munhu.

⁶Kambe vaprista lavakulu ni malandza kakuloko va n'wi vona, va huwelela, va ku: “N'wi vambe, n'wi vambe!” Pilato a ku eka vona: “N'wi tekeni, mi ri n'wina, mi ya n'wi vamba; hikuva mina a ndzi voni nandzu eka yena.”

⁷Vayuda va n'wi hlamula va ku: “Hi ni nawu, kutani hi nawu wa hina u fanele hi ku fa, hikuva u tiendle N'wana wa Xikwembu”.

⁸Pilato, kakuloko a twa ku vulavula koloko, a engeta a chava.

⁹Kutani a tlhela a nghena ehubyeni, a ku eka Yesu: “U wa kwihi xana?” Kambe Yesu a nga n'wi hlamulanga.

¹⁰Pilato a ku eka yena: “Xana a ku vulavuri na mina ha yini-ke? Xana a ku tivi leswaku ndzi ni matimba ya ku ku vamba, ni matimba ya ku ku tshunxa?”

¹¹Yesu a hlamula, a ku: “A wu nga ti va na matimba ehenhla ka mina ni switsongo, loko u nga ma nyikiwanga hi tilo; hikwalaho, la ndzi nyiketeke wena u ni nandzu lowu tlurisaka.”

¹²Ku sungula enkarhini lowo, Pilato a lava hilaha a nga ta n'wi tshunxa ha kona; kambe Vayuda va huwelela, va ku: “Loko u tshunxa loyi, a ku rhandzi Khezari.”

¹³Kuteloko Pilato a twa mhaka yoleyo, a humesela Yesu ehandle, a tshamisa exitshan'weni xa ku avanyisa exivandleni lexi va nge i Ribye; hi Xiheveru, i Gavata.

¹⁴A ri ri siku ra ku lunghisa Paseka; nkarhi, wona, a wu lava ku va wa ntlhanu na wun'we. Kutani Pilato a ku eka Vayuda: “Vonani, hosi ya n'wina.”

¹⁵Kambe va huwelela, va ku: “N'wi suse, n'wi suse, u n'wi vambe!” Pilato a ku eka vona: “Ndzi ta vamba hosi ya n'wina xana?” Vaprista lavakulu va hlamula, va ku: “A hi na hosi yimbe loko a nga ri Khezari.”

¹⁶Kavaloko a va nyiketa yena, leswaku va n'wi vamba. Kutani va khoma Yesu, va famba na yena.

¹⁷Kutani Yesu a huma a rhwele xihambano xa yena, a ya exivandleni lexi va nge i Ripala; hi Xiheveru va te i Gologota.

¹⁸Va n'wi vamba kona, a ri ni van'wana vambirhi, un'wana hitlhelo rin'wana, un'wana hitlhelo rin'wana, Yesu a ri exikarhi.

¹⁹Pilato a tsala ni papila, a ri nameka ehenhla ka xihambano; a ku tsariwile leswaku: “Yesu wa Nazareta, Hosi ya Vayuda.”

²⁰Vayuda lavo tala a va hlaya papila rero, hikuva xivandla lexi Yesu a nga vambiwa ka xona, a xi ri ekusuhi ni muti; kambe a ri tsariwile hi Xiheveru, ni Xigriki, ni Xirhoma.

²¹Kutani vaprista lavakulu va Vayuda va ku eka Pilato: “U nga tsari: ‘Hosi ya Vayuda,’ kambe tsala leswaku ‘Hi yena la nga te: Hi mina hosi ya Vayuda.’ ”

²²Pilato a hlamula, a ku: “Lexi ndzi xi tsaleke, ndzi tsarile.”

²³Kuteloko tinhenha ti vambile Yesu, ti teka tinguvu ta yena ti avelana ha vumune, leswaku nhenha yin'wana ni yin'wana yi va ni swa yona: va teka ni nkhancu, kambe nkhancu a wu nga rhungiwanga, wu lukiwile wu hlangene ku suka ehenhla ku fika ehansi.

²⁴Kutani va byelana, va ku: “Hi nga ka hi nga wu handzuri, kambe a hi wu hlahluveni hi nhlolo hi ta tiva leswaku wu ta va wa mani.” A swi ri leswaku ku hetiseka Tsalwa leri nga te: “Va avelane tinguvu ta mina, va ti hlahluve hi nhlolo.” Tinhenha ti endlisa sweswo.

²⁵Kambe mana wa Yesu ni makwa wa mana wa yena, Mariya, nsati wa Klopasi, na Mariya wa Magadala, a va yimile ekusuhi ni xihambano.

²⁶Yesu loko a vona mana wa yena, ni mudyondzisiwa la n'wi rhandzaka a xaxamele na yena, a ku eka mana wa yena: “Wansati, n'wanaku, hi loyi.”

²⁷Kutani a ku eka mudyondzisiwa: “Mana wa wena, hi loyi.” Ku sukela nkarhi wolowo, mudyondzisiwa yeloyi, a n'wi rhurhela endyangweni wa yena.

²⁸Endzhaku ka sweswo, Yesu, hi ku tiva leswaku timhaka hinkwato ti hetisekile, a ku: “Ndzi ni torha”; swi ri leswaku Tsalwa ri hetiseka.

²⁹Mbita leyi teleke hi ntsuvi a yi ri kwalaho, kutani va tata xikhuvi hi ntsuvi, va xi tlhoma enhongeni ya hisopa, va xi yisa enon'wini wa yena.

³⁰Kuteloko Yesu a tekile ntsuvi, a ku: “Swi hetisekile.” Kutani a jovota nhloko, a nyiketa moya.

³¹Vayuda va khongela Pilato, leswaku lava nga vambiwa va tshoviwa mahlapfana, va hawuriwa, leswaku mitsumbu yi nga sari swihambanweni hi siku ra Savata, hikuva a ku lunghiseriwa rona, kutani siku rero ra Savata a ri ri lerikulu.

³²Kutani tinhenha ti ta, ti tshova mahlapfana ya lowo rhanga, ni ya un'wana la nga vambiwa na yena.

³³Kuteloko va ta eka Yesu, a va n'wi tshovanga mahlapfana, hikuva a va vona leswaku u file.

³⁴Kambe un'wana wa tinhenha a n'wi tlhava tsheve hi fumu kutani kan'we ku huma ngati ni mati.

³⁵Kutani la nga swi vona, u vurile vumbhoni, kutani vumbhoni bya yena byi tiyile; u tiva leswaku u vula ntiyiso, leswaku mi pfumela.

³⁶Hikuva timhaka teto ti humelerile leswaku Tsalwa ri hetiseka leri nge: “A ku na rhambu ra yena leri nga ta tshoviwa.”

³⁷Kambe rin'wana Tsalwa ri te: “Va ta Vona loyi va n'wi tlhaveke.”

³⁸Endzhaku ka sweswo, Yosefa wa Arimatiya, loyi ngi a ri mudyondzisiwa wa Yesu, kambe a tifihlile hi ku chava Vayuda, a kombela eka Pilato leswaku a pfumeleriwa ku ya hawula ntsumbu wa Yesu; kutani Pilato a n'wi pfumelela. Kutani a ya susa ntsumbu wa Yesu.

³⁹Na yena Nikodema, loyi a nga ta nivusiku eka Yesu, a ta, a rhwele mirha ni mhangana leswi nga pfanganisiwa; ku tika ka swona ku lava ku endla dzana ra mimpimo.

⁴⁰Kutani va teka ntsumbu wa Yesu, va wu phutsela hi mikumba ni mirhi, hi mukhuva lowu Vayuda va lahlaka ha wona.

⁴¹Kambe exivandleni xexo, laha a nga vambiwa kona, entanga a wu ri kona, ni sirha lerintshwa a ri ri kona entangeni, laha ku nga siki lahliwaka munhu kona.

⁴²Va lahla Yesu eka rona, hikwalaho ka ku lunghisela ka Vayuda, hikuva sirha a ri ri ekusuhi.