Read Xitsonga John 3 Bible Online

John 3 - Xitsonga bible

John 3

¹A ku ri ni munhu wa ka Vafarisi, vito ra yena a a ri Nikodema; a a ri hosanyana ya Vayuda;

²a ta eka Yesu nivusiku, a ku eka yena: “Rabi, ha swi tiva leswaku u mufundhisi la humaka eka Xikwembu, hikuva a ku na munhu la nga endlaka mahlori lawa u ma endlaka, loko Xikwembu xi nga ri na yena.”

³Yesu a hlamula, a ku eka yena: “Kunenenene ndzi ri eka wena: Loko munhu a nga tswariwi ra vumbirhi, a nga ka a nga voni ku fuma ka Xikwembu.”

⁴Nikodema a ku eka yena: “Xana munhu loko a dyuharile, a nga tswarisiwa ku yini? Xana a nga tlhela a vuyela ekhwirini ra mana wa yena, a tlhela a tswariwa xana?”

⁵Yesu a hlamula, a ku: “Kunenenene ndzi ri eka wena: Loko munhu a nga tswariwi hi mati ni Moya, a nga ka a nga ngheni eku fumeni ka Xikwembu.

⁶Leswi tswariweke hi nyama, i nyama; kambe leswi tswariweke hi Moya, i Moya.

⁷U nga hlamali loko ndzi ku eka wena: ‘Swa fanela leswaku mi tswariwa ra vumbirhi.’

⁸Moya wu hungela laha wu rhandzaka kona, kutani u twa mpfumawulo wa wona, kambe a ku tivi laha wu humaka kona, ni laha wu yaka kona. Swi tano ni ka hinkwavo lava tswariweke hi Moya.”

⁹Nikodema a hlamula, a ku eka yena: “Swilo leswi, swi nga endlekisa hi ku yini xana?”

¹⁰Yesu a n'wi hlamula, a ku: “U mufundhisi wa Israele, kasi a ku tivi timhaka leti xana?

¹¹Ndzi vurisile ndzi ri eka wena: Hi vula leswi hi swi tivaka, kutani hi vula vumbhoni bya leswi hi swi voneke; kambe a mi amukeri vumbhoni bya hina.

¹²“Kungakuloko ndzi mi byela swa laha emisaveni, kutani mi nga pfumeri, xana mi ta pfumerisa ku yini loko ndzi mi byela swa le tilweni?

¹³A ku na munhu la tshamaka a tlhandlukela etilweni, loko a nga ri la xikeke etilweni, a nga N'wana wa Munhu la nga etilweni.

¹⁴Kukotisa Muxe loko a hayekile nyoka emananga, N'wana wa Munhu u fanekele ku hayekisiwa sweswo;

¹⁵leswaku un'wana ni un'wana la pfumelaka eka yena a nga tshuki a lova, kambe a va ni vutomi lebyi nga heriki.”

¹⁶Hikuva Xikwembu xi rhandzile misava swonghasi, xi ko xi nyika N'wana wa xona la nga tswariwa a ri swakwe, leswaku un'wana ni un'wana la pfumelaka eka yena, a nga tshuki a lova, kambe a va ni vutomi lebyi nga heriki.

¹⁷Hikuva Xikwembu a xi rhumanga N'wana wa xona emisaveni ku ta avanyisa misava, kambe hileswaku misava yi ponisiwa ha yena.

¹⁸La pfumelaka eka yena, a nga avanyisiwi; kambe la nga pfumeriki, wa avanyisiwa, hikuva a nga pfumelangi vito ra N'wana wa Xikwembu la nga tswariwa a ri swakwe.

¹⁹Ku avanyisa hi kuloku: Ku vonakala ku tile emisaveni, kambe vanhu va rhandzile munyama ku tlurisa ku vonakala, hikuva mitirho ya vona a yi ri leyo biha.

²⁰Hikuva un'wana ni un'wana la endlaka leswo biha, u venga ku vonakala, kutani a nga ti eku vonakaleni, mitirho ya yena yi nga ti tshuka yi tshinyiwa.

²¹Kambe la endlaka swinene, wa ta eku vonakaleni, mitirho ya yena yi ta vonaka leswaku yi endleriwa Xikwembu.

²²Endzhaku ka sweswo, Yesu a ya etikweni ra Yudiya a ri ni vadyondzisiwa va yena, kutani a tshama kona na vona, a khuvula vanhu.

²³Yohane na yena, a a khuvula le Enoni, ekusuhi na Salime, hikuva mati a ma tele kona, ni vanhu a va ya kona ku ya khuvuriwa;

²⁴hikuva Yohane a a nga si nghenisiwa ekhotsweni.

²⁵Kutani ku humelela ku kanetana emhakeni ya ku tibasisa exikarhi ka vadyondzisiwa va Yohane ni Vayuda.

²⁶Va ta eka Yohane va ku eka yena: “Rabi, loyi ngi u ri na yena entsungeni wa hase wa Yordani, loyi u nga vula vumbhoni ehenhla ka yena, wa khuvula na yena, kutani hinkwavo va ya eka yena.”

²⁷Yohane a hlamula, a ku: “Munhu a nga ka a nga amukeri nchumu loko xi nga ri lexi a xi nyikiweke hi tilo.

²⁸N'wina mi timbhoni ta mina leswaku ndzi vurile ndzi ku: ‘A hi mina Kriste, kambe ndzi rhumiwile ku n'wi rhangela emahlweni.’

²⁹Loyi a fuwaka mutekiwa, i muteki; kambe xangwana ya muteki leyi yimaka yi n'wi yingisa, yi tsaka hi ku tsaka lokukulu, loko yi twa rito ra muteki; hi kona ku tsaka ka mina loku hetisekeke.

³⁰Yena u fanele ku kula, mina ndzi tsongahala.”

³¹La humaka etilweni u le henhla ka hinkwavo; la humaka emisaveni, i wa misava, kutani u vulavula hi swa misava; la humaka etilweni u le henhla ka hinkwavo.

³²Kutani lexi a xi voneke, ni lexi a xi tweke, hi lexi a xi tiyisaka; kambe a ku na munhu la amukelaka vumbhoni bya yena.

³³La amukelaka vumbhoni bya yena, u tiyisile leswaku Xikwembu xa tshembeka.

³⁴Hikuva la rhumiweke hi Xikwembu, u vula marito ya Xikwembu, hikuva Xikwembu xi n'wi nyika Moya ku nga ri hi mpimo.

³⁵Tatana u rhandza N'wana, u vekile swilo hinkwaswo emavokweni ya yena.

³⁶La pfumelaka eka N'wana, u ni vutomi lebyi nga heriki; kambe la nga yingisiki N'wana, a nga ka a nga voni vutomi, kambe ku kariha ka Xikwembu ku tshame ehenhla ka yena.