Read Xitsonga John 7 Bible Online

John 7 - Xitsonga bible

John 7

¹Endzhaku ka sweswo, Yesu a fambafamba eGaleliya, a nga rhandzi ku tshama eYudiya, hikuva Vayuda a va lava ku n'wi dlaya.

²Kambe nkhuvo wa Vayuda wa Mitsonga a wu ri ekusuhi;

³kutani vamakwavo va ku eka yena: “Suka la, u ya eYudiya, vadyondzisiwa va wena na vona va ta vona mitirho leyi u yi endlaka.

⁴Hikuva a ku na munhu la endlaka nchumu exihundleni loko a rhandza ku tiviwa; loko u endlisa sweswo, tikombise eka misava.”

⁵Hikuva na vona vamakwavo a va nga pfumeri eka yena.

⁶Hilaha Yesu a nga ku eka vona: “Nkarhi wa mina a wu si fika; kambe nkarhi wa n'wina wu kona hi masiku.

⁷Misava yi nga ka yi nga mi vengi, kambe mina ya ndzi venga hikuva ndzi vula vumbhoni leswaku mitirho ya yona yi bihile.

⁸N'wina tlhandlukelani enkhubyeni wolowo, mina a ndzi tlhandlukeri enkhubyeni wolowo, hikuva nkarhi wa mina a wu si hetiseka.”

⁹Kuteloko a va byerile timhaka teto, a titshamela eGaleliya.

¹⁰Kambe vamakwavo loko va tlhandlukile, na yena a tlhandlukela enkhubyeni, ku nga ri eku vonakaleni, kambe a famba exihundleni.

¹¹Kutani Vayuda a va n'wi lava enkhubyeni, va ku: “Loyi, u kwihi?”

¹²Kutani ku hambana a ku ri lokukulu ehenhla ka yena exikarhi ka ntshungu. Van'wana va ku: “I munhu lonene”; van'wana va ku: “E-e, kambe u xisa vanhu.”

¹³Hambiswiritano, a ku vanga na munhu la n'wi vulaka erivaleni hikwalaho ka ku chava Vayuda.

¹⁴Loko ku ri exikarhi ka nkhuvo, Yesu a tlhandlukela etempeleni, a ya dyondzisa kona.

¹⁵Kutani Vayuda va hlamala, va ku: “Xana loyi u tiva ha yini Matsalwa, kasi a nga dyondzanga?”

¹⁶Yesu a va hlamula, a ku: “Dyondzo ya mina, a hi ya mina, kambe i ya la ndzi rhumeke.

¹⁷Kungakuloko munhu a rhandza ku endla ku rhandza ka Xikwembu, u ta tiva dyondzo ya mina leswaku xana yi huma eka Xikwembu, kumbexana ndzi vulavula ndzi tisungulela swa mina.

¹⁸La tisungulelaka swa yena u tilavela ku dzunisiwa, kambe la lavaka ku dzunisiwa eka la n'wi rhumeke, hi yena loyi a nga wa ntiyiso, kutani ku homboloka a ku kona eka yena.

¹⁹Xana Muxe a nga mi nyikanga nawu xana? Hambiswiritano, a ku na un'we xikarhi ka n'wina la hlayisaka nawu. Mi lavela yini ku ndzi dlaya?”

²⁰Vunyingi byi n'wi hlamula, byi ku: “U ni demona, i mani la lavaka ku ku dlaya?”

²¹Yesu a va hlamula, a ku: “Ndzi endlile ntirho wu ri wun'we, kutani mi hlamele hinkwenu ha wona.

²²Muxe u mi nyikile ku yimba (a hileswaku ku hume eka Muxe, kambe ku humile eka vakokwana va khale), kutani mi yimbisa munhu hi Savata!

²³Xana leswi munhu a yimbisiwaka hi Savata, leswaku nawu wa Muxe wu nga tluriwi, mi ndzi karihelela yini loko ndzi hanyisile munhu miri wa yena hinkwawo hi Savata?

²⁴Mi nga avanyisi hi nghohe ntsena, avanyisani hi ku avanyisa loku lulameke.”

²⁵Kutani vaaki van'wana va Yerusalema va ku: “Xana a hi yena loyi va n'wi lavaka ku n'wi dlaya xana?

²⁶Kasi vonani, a vulavula erivaleni, a va n'wi hlamuri; xana kumbe tihosi ti n'wi tivile kunene leswaku i Kriste hi xiviri xana?

²⁷Kambe loyi, ha n'wi tiva laha a humaka kona, kasi Kriste, siku a taka, a ku na munhu la nga ta tiva laha a humaka kona.”

²⁸Kutani Yesu a tlakusa rito etempeleni, a dyondzisa, a ku: “Ma ndzi tiva, mi tiva ni laha ndzi humaka kona; a ndzi tanga ha mina, kambe la ndzi rhumeke wa tshembeka, kutani a mi n'wi tivi.

²⁹Mina ndza n'wi tiva, hikuva ndzi huma eka yena, ndzi rhumiwile hi yena.”

³⁰Kutani va lava ku n'wi khoma; kambe a ku vanga na munhu la tlakuseke voko ehenhla ka yena, hikuva nkarhi wa yena a wu nga si ta.

³¹Kambe lavo tala exikarhi ka vunyingi va pfumela eka yena, va ku: “Kutakuloko Kriste a ta, xana u ta endla masingita lama tlulaka lama endliwaka hi loyi xana?”

³²Vafarisi va twa hilaha vunyingi byi vulaka timhaka ta yena hi ku n'unun'uta, kutani vaprista lavakulu ni Vafarisi va rhuma malandza ku ya n'wi khoma.

³³Kutani Yesu a ku eka vona: “Ndza ha ri na n'wina nkarhinyana, kutani ndzi ya eka la ndzi rhumeke.

³⁴Mi ta ndzi lava, kambe mi nga ka mi nga ndzi voni; ni laha ndzi nga kona, mi nga ka mi nga ti.”

³⁵Hilaha Vayuda va vutisanaka, va ku: “U ta ya kwihi loyi, laha hi nga ta tsandzeka ku n'wi kuma; xana u ta ya eka lava hangalakeke exikarhi ka Vagriki, a dyondzisa Vagriki xana?

³⁶Mhaka leyi a yi vulaka yi ri yini, loko a ku: ‘Mi ta ndzi lava, kambe mi nga ka mi nga ndzi voni, ni laha ndzi yaka kona, mi nga ka mi nga ti’?”

³⁷Hi siku ra ku hetelela ka nkhuvo, ri nga lerikulu, Yesu a a yimile, kutani a huwelela, a ku: “Kungakuloko munhu a ri ni torha, a a te eka mina, a nwa.

³⁸La pfumelaka eka mina, ‘milambu ya mati lama khulukaka yi ta pfelela exifuveni xa yena,’ hilaha Matsalwa ma vuleke hakona.”

³⁹Hi rito lero, a a ringanisa Moya lowu lava pfumelaka eka yena va nga ta wu nyikiwa; hikuva Moya a wu nga si va kona, hikuva Yesu a a nga si dzunisiwa.

⁴⁰Lavo tala exikarhi ka vanhu lava hlengeletaneke, kuteloko va yingisile rito rero, va ku: “Hakunene, loyi i muprofeta.”

⁴¹Van'wana va ku: “Loyi i Kriste.” Kambe van'wana va ku: “Kambe xana Kriste a nga huma eGaleliya-ke?

⁴²Xana Matsalwa a ma vuri leswaku Kriste u ta huma erixakeni ra Davhida emutini wa Betlehema, laha Davhida a humeke kona-ke?”

⁴³Kutani mitshungu yi hambana hikwalaho ka yena.

⁴⁴Kavaloko van'wana va vona va rhandza ku n'wi khoma, kambe a ku vanga na munhu la yisaka mavoko ehenhla ka yena.

⁴⁵Kavaloko malandza ma tlhelela eka vaprista lavakulu ni ka Vafarisi, kutani vona va ma vutisa, va ku: “A mi n'wi tisanga ha yini-ke?”

⁴⁶Malandza ma hlamula, ma ku: “A hi si vona munhu la vulavulaka kukotisa munhu loyi, ni siku ni rin'we.”

⁴⁷Kutani Vafarisi va hlamula, va ku: “Xana na n'wina mi dyeleriwile?

⁴⁸I mani eka lavakulu ni ka Vafarisi la pfumeleke eka yena xana?

⁴⁹Kambe vunyingi byebyo, lebyi nga tiviki nawu, ingi byi rhukaniwa!”

⁵⁰Un'wana wa vona, Nikodema, la tshamaka a ta eka Yesu nivusiku, a ku eka vona:

⁵¹“Xana nawu wa hina wu nga avanyisa munhu loko a nga si yingisiwa, ku nga si tiviwa leswi a swi endleke xana?”

⁵²Va hlamula, va ku eka yena: “Xana na wena u Mugaleliya-ke? Xiyaxiya, u ta vona leswaku a ku na muprofeta la humaka eGaleliya.”

⁵³Kutani va tifambela, un'wana ni un'wana endlwini ya yena.